অসম লাইভ ২৪ঃ ‘তুমি কেতিয়াবা অসম গৈছা? মোৰ শৈশৱ অসমতেই পাৰ হৈছে। মোৰ পত্নীও অসমৰেই। বিয়াৰ পিছত আমি তাতেই আছিলো। ঠাইখন বৰ ধুনীয়া। মোৰ জীৱনটোও তাত সুন্দৰ আছিল। ভালপোৱাৰ কথাবোৰ অসমেই শিকাইছিল। মই এজন পেছাদাৰী এনিমেটৰ। ভুপেন হাজৰিকাৰ দুটাকৈ গানত মই এনিমেচনৰো কামো কৰিছো।’ এইয়া দাক্ষিণাত্যৰ চিনেমাত অসমৰ প্ৰসংগত কোৱা কথা। অসমৰ পাৰিপাৰ্শ্বিক, সৌন্দৰ্য, অসমীয়া মানুহৰ মহানুভৱতা, অসমৰ শিল্পীৰ কথা সকলোবোৰেই প্ৰাধান্য পাইছে দাক্ষিণাত্যৰ চিনেমাত।
‘বিস্তৃৰ্ণ পাৰৰে অসংখ্য জনৰে, হাহাকাৰ শুনিও নিশব্দে নিৰবে, বুঢ়া লুইত তুমি বুঢ়া লুইত বোৱা কিয়?’ ভূপেন হাজৰিকাই যদিও এই গীতটি হিন্দীতো পৰিবেশন কৰিছে তথাপিও অসমীয়া ভাষাত গোৱা গানটোৱেই চিনেমাখনত দিয়া হৈছে। অসমীয়াই শিল্পী সন্মান কৰিব নাজানে, অসমীয়াই নিজেই নিজৰ সংস্কৃতিত কালিমা সানিছে আদি কথাই সামাজিক মাধ্যমত চৰ্চা লাভ কৰাৰ সময়তে কণ্ঠশিল্পী সীমান্ত শেষৰে দাক্ষিণাত্যৰ এই বিশেষ ভিডিঅ’ ক্লিপটো নিজৰ সামাজিক মাধ্যমত শ্বেয়াৰ কৰিছে।
দাক্ষিণাত্যৰ জনপ্ৰিয় অভিনেতা মোহনলাল অভিনীত এখন চলচ্চিত্ৰত অসমৰ কথা, ভাৰত ৰত্ন ড° ভূপেন হাজৰিকাৰ কথা সুন্দৰৰূপত প্ৰকাশ কৰিছে। ৰূপকোঁৱৰৰ নাটক ‘লভিতা’-ক বিকৃতৰূপত উপস্থাপন কৰাকলৈ ৰাজ্যজুৰি সামাজিক মাধ্যমত চলা বিতৰ্কৰ মাজতেই একাংশ নেটিজেনে প্ৰশ্ন কৰিছিল। ৰূপকোঁৱৰক সন্মান কৰিব নোৱাৰা অসমীয়াই ভূপেন হাজৰিকাক পাহৰিবলৈনো কেইটা দিন? অসমত শিল্পীও সময়ৰ সোঁতত পুৰণি হয়। অসমীয়াই নিজৰ সংস্কৃতিকেই সংৰক্ষণ কৰিব নাজানে আজি বিষয় উত্থাপন হৈ থকাৰ মাজতেই দাক্ষিণাত্যৰ এই ক্লিপটোৱে কৈ গৈছে বহু কথা।
শিল্পীৰ জানো দেশ থাকে, পৰিধি থাকে! শিল্পী পৃথিৱীৰ যিকোনো কোণতেই জনসাধাৰণৰ মনত জী থাকে। অসমবাসীয়ে মনত ৰাখক বা নাৰাখক ভূপেন হাজৰিকা পৃথিৱীৰ প্ৰান্তে প্ৰান্তে বহুতৰে আবেগ হৈ জী আছে। অসমীয়াই নাজানিলেও দাক্ষিণাত্যই শিল্পীক সন্মান জনাব জানে। অসমীয়াই আজি দাক্ষিণাত্যৰ পৰা শিকিব লগা বহু কথাই আছে বুলি বহুতেই সামাজিক মাধ্যমত উল্লেখ কৰা পৰিলক্ষিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
