বজাৰত ধাৰ লাগিছে প্ৰায় ৩০০ কোটি ডলাৰ৷ ভাৰতীয় মুদ্ৰাত প্ৰায় চাৰে ২৫ হাজাৰ কোটি টকা৷ এই বিপুল ধাৰ মাৰিবলৈকে নতুন ঋণ বিচাৰিছে মুকেশ আম্বানীৰ নেতৃত্বাধীন ৰিলায়েন্স গোষ্ঠীয়ে৷ ঋণৰ বাবে প্ৰায় আধা ডজন বেংকৰ সৈতে আলোচনাও কৰিছে মুকেশে৷ ঋণ মঞ্জুৰ হ’লে ২০২৩ চনৰ পাছত ৰিলায়েন্সেই প্ৰথম সংস্থা হ’ব যিয়ে এই বিপুল পৰিমাণে ঋণ বেংকৰ পৰা ল’ব৷
নামপ্ৰকাশত অনিচ্ছুক সংস্থাৰ এক সূত্ৰই সংবাদমাধ্যমত জনাইছে যে ৩০০ কোটি ডলাৰৰ নতুন ঋণক লৈ আম্বানীৰ সৈতে ৬টা বেংকৰ কথা চলিছে৷ ২০২৫ চনৰ প্ৰথম ৩মাহৰ মাজত সেই সংখ্যা আৰু বাঢ়িব পাৰে বুলিও ধাৰণা কৰা হৈছে৷ যদিও কোনো বেংকৰ সৈতে এতিয়াও কোনো চুক্তি চূড়ান্ত কৰা হোৱা নাই৷
২০২৫ চনত প্ৰকৃত সুদ মিলাই প্ৰায় ২৯০ কোটি ডলাৰ বজাৰত বকেয়া আছে ৰিলায়েন্সৰ৷ ইয়াৰ পূৰ্বে ২০২৩ চনত ৮০০ কোটি ডলাৰৰ বেছি ঋণ লৈছিল ৰিলায়েন্স গোষ্ঠীয়ে৷ ব্লুমবাৰ্গৰ তথ্য অনুসৰি ৰিলায়েন্সৰ জিঅ’ ইনফোকম লিমিটেডৰ বাবে মুঠ ৫৫ ঋণদাতাৰ পৰা সেই ঋণ লৈছিল ৰিলায়েন্স গোষ্ঠীয়ে৷ নতুন ঋণ মঞ্জুৰ হ’লে সেই টকা লৈ ২০২৩চনৰ বকেয়া শোধ কৰিব বুলিও ধাৰণা কৰিছে বহুতেই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
