২ মাহ পূৰ্বেই হৈ গৈছিল সকলো পৰিকল্পনা, মুম্বাইতে থাকি নিৰিক্ষণ কৰিছিল সকলো
বাবা ছিদ্দিকী হত্যাকাণ্ড সন্দৰ্ভত বহু চাঞ্চল্যকৰ প্ৰকাশ পাইছে। জানিব পৰা মতে, এন চি পিৰ নেতা তথা মহাৰাষ্ট্ৰৰ প্ৰাক্তন মন্ত্ৰী বাবা ছিদ্দিকীক হত্যাৰ বাবে দুমাহ পূৰ্বে গুলীচালনাকাৰীয়ে প্ৰস্তুতি চলাইছিল। আৰক্ষীৰ সূত্ৰ অনুসৰি গুলীচালনাকাৰীয়ে বাবা ছিদ্দিকী আৰু তেওঁৰ পৰিয়ালৰ সম্পূৰ্ণ তথ্য সংগ্ৰহ কৰি ৰাখিছিল।
সূত্ৰ অনুসৰি, আৰক্ষীৰ জেৰাৰ সময়ত এই আক্ৰমণকাৰীয়ে জনোৱা মতে, বাবা ছিদ্দিকিৰ কাৰ্যালয়, তেওঁৰ পুত্ৰ জীছান ছিদ্দিকীৰ কাৰ্যালয়ত অহৰহ নজৰ ৰখাৰ লগতে বাবা ছিদ্দিকীৰ নিৰাপত্তাৰ বাবে কিমানজন আৰক্ষী নিয়োগ কৰা হৈছে আৰু কিমানজন লোকৰ সৈতে থাকে সেই বিষয়েও খবৰ ৰাখিছিল তেওঁলোকে।
এই গুলীচালনাকাৰীসকলে বহু দিন পূৰ্বৰে পৰা মুম্বাইত বাস কৰি এই সম্পূৰ্ণ হত্যাকাণ্ডৰ পৰিকল্পনা কৰি আছিল বুলি তথ্য লাভ আৰক্ষীৰ তদন্তত । ইয়াত এই গুলীচালনাকাৰীসকলক কোনে সহায় কৰিছিল সেই বিষয়েও মুম্বাই ক্ৰাইম ব্ৰাঞ্চে বিচাৰি উলিয়াইছে।
আৰক্ষী সূত্ৰই জনোৱা মতে, লক্ষ্যৰ পৰিচয় প্ৰকাশ নকৰাকৈয়ে গোচৰৰ মাষ্টাৰমাইণ্ডে গুলীচালনাৰ বাবে হত্যাকাৰীক ধন দিয়া বুলি সন্দেহ কৰি গোচৰটোৰ ‘চুক্তিবদ্ধ’ এংগেলৰ ওপৰতো তদন্ত অব্যাহত ৰাখিছে।
বাবা ছিদ্দিকী কংগ্ৰেছৰ এজন পুৰণি নেতা আছিল। কিন্তু চলিত বৰ্ষৰ ফেব্ৰুৱাৰী মাহত তেওঁ কংগ্ৰেছৰ সৈতে থকা চাৰি দশক পুৰণি সম্পৰ্ক ভাঙি অজিত পাৱাৰ নেতৃত্বাধীন এন চি পিত যোগদান কৰিছিল। লাভ কৰা তথ্য অনুসৰি মাত্ৰ ১৫ দিন পূৰ্বে তেওঁক মৃত্যুৰ ভাবুকি দিয়া হৈছিল, তাৰ পিছত তেওঁক ‘ৱাই’ শ্ৰেণীৰ নিৰাপত্তা দিয়া হৈছিল। কিন্তু এই নিৰাপত্তাৰ ব্যৱস্থাই তেওঁৰ জীৱন ৰক্ষাৰ বাবে অপৰ্যাপ্ত বুলি প্ৰমাণিত হয়।
শনিবাৰে নিশা বাবা ছিদ্দিকী ৯:১৫ বজাত বাণ্ড্ৰা ইষ্টৰ নিৰ্মল নগৰৰ কলগেট খেলপথাৰৰ সমীপৰ বিধায়ক পুত্ৰ জীশন ছিদ্দিকিৰ কাৰ্যালয়ৰ পৰা ওলাই আহিছিল, তেতিয়াই ৩জন আক্ৰমণকাৰীয়ে গুলীচালনা কৰে। এই আক্ৰমণকাৰীসকলে একেলগে ৬টা গুলী চলায়, ইয়াৰে ২টা গুলী ছিদ্দিকিৰ বুকুত আঘাত কৰে, যাৰ বাবে তেওঁৰ মৃত্যু হয়।
গুলীচালনাৰ পিছত তিনিওজন আক্ৰমণকাৰী সেই স্থানৰ পৰা পলায়ন কৰে যদিও তাত অলপ দূৰৈত নিয়োজিত আৰক্ষীয়ে দুজনক কৰায়ত্ত কৰে, আনহাতে তৃতীয় আক্ৰমণকাৰীয়ে তাৰ পৰা পলায়ন কৰিবলৈ সক্ষম হয়।
মুম্বাই ক্ৰাইম ব্ৰাঞ্চৰ সূত্ৰই জনোৱা মতে, গুলীচালনাৰ এজন গুলীচালনাকাৰী হাৰিয়ানাৰ কাইথালৰ বাসিন্দা গুৰমাইল বলজিৎ সিং বুলি চিনাক্ত হোৱাৰ বিপৰীতে আনজন গুলীচালনাকাৰী হৈছে ইউ পিৰ বাসিন্দা ধৰ্মৰাজ কাশ্যপ। জেৰাৰ সময়ত দুয়োজনে দাবী কৰে যে তেওঁলোক লৰেন্স বিষ্ণয় গেঙৰ সৈতে জড়িত। অৱশ্যে তেওঁৰ এই দাবীৰ তদন্তত ব্যস্ত আৰক্ষী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
