বৃদ্ধি পাই গৈ আছে নিহতৰ সংখ্যা, ২০০০ৰ ঘৰ অতিক্ৰম, এতিয়াও সন্ধানহীন বহু
ম্যানমাৰত সংঘটিত ভয়ংকৰ ভূমিকম্পৰ ফলত নিহত হোৱা লোকৰ সংখ্যা পুনৰ বৃদ্ধি পাইছে। ২৮ মাৰ্চত অহা ৭.৭ ৰিখটাৰ স্কেলৰ ভূমিকম্পৰ পাছতে দিনে দিনে বৃদ্ধি পাই হৈ আছে নিহত হোৱা লোকৰ সংখ্যা। সোমবাৰে ৩১ মাৰ্চ এই নতুন পৰিসংখ্যা প্ৰকাশ কৰে জুন্টা চৰকাৰে।
এই ভয়াৱহ ভূমিকম্পত মৃত্যু হোৱা লোকৰ সংখ্যা ২০৫৬ লৈ বৃদ্ধি পোৱাৰ লগতে ৩৯০০ৰো অধিক লোক আহত হৈছে। ভাঙি পৰা অট্টালিকাৰ ধ্বংসাৱশেষৰ পৰা উদ্ধাৰ অভিযান অব্যাহত ৰাখিছে উদ্ধাৰ কৰ্মীসকলে। এতিয়াও সন্ধানহীন বহু লোক।
ইফালে ম্যানমাৰে দেশত সংঘটিত হোৱা ভয়াৱহ ভূমিকম্পৰ বাবে এসপ্তাহৰ ৰাষ্ট্ৰীয় শোক ঘোষণা কৰিছে, মৃত্যুৰ সংখ্যাই ২০০০ অতিক্ৰম কৰিছে আৰু দিন বাগৰাৰ লগে লগে ধ্বংসপ্ৰাপ্ত অট্টালিকাৰ ধ্বংসাৱশেষত আৰু অধিক জীৱিত লোক বিচাৰি পোৱাৰ আশা ম্লান হৈ পৰিছে।
সংবাদ সংস্থা ৰয়টাৰৰ তথ্য অনুসৰি সোমবাৰে বিষয়াসকলে জনোৱা মতে, ভাঙি পৰা এখন হোটেলৰ ধ্বংসাৱশেষৰ পৰা এগৰাকী মহিলাক জীৱন্তে উদ্ধাৰ কৰা হৈছে। ভূমিকম্পৰ তিনিদিন পিছত জীৱন্তে উদ্ধাৰ হয় মহিলাগৰাকী।
এই ভূমিকম্পৰ ফলত ম্যানমাৰত ব্যাপক ধ্বংসলীলা হোৱাই নহয়, চুবুৰীয়া ৰাষ্ট্ৰ থাইলেণ্ডতো বিপুল ক্ষতিসাধন হয়। দেওবাৰলৈকে থাইলেণ্ডত মৃত্যুৰ সংখ্যা ১৮ জন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
