শ্বেৰ-ঈ-পাঞ্জাব T20 লীগ ২০২৬ত বেটিঙৰ এক অবিশ্বাস্য প্ৰদৰ্শনেৰে সকলোৰে দৃষ্টি আকৰ্ষণ কৰিছে মুম্বাই ইণ্ডিয়ানছৰ অলৰাউণ্ডাৰ নমন ধীৰে। ‘অমৃতসৰ ছুৰমাছ’ৰ হৈ খেলি ‘মোহালী কিংছ’ৰ বিৰুদ্ধে মাত্ৰ ৬৪টা বলত ১৭৩ ৰান সংগ্ৰহ কৰি তেওঁ লীগখনৰ ইতিহাসত এক নতুন অভিলেখ গঢ়ে। তেওঁৰ এই বিধ্বংসী ইনিংছত আছিল ১৬টা চাৰি আৰু ১২টা সুবিশাল ছিক্সাৰ। অৰ্থাৎ কেৱল বাউণ্ডেৰীৰ পৰাই তেওঁ ১৩৬ ৰান সংগ্ৰহ কৰে। কেৱল শ্বেৰ-ঈ-পাঞ্জাব t20 লীগেই নহয় t20 ফৰ্মেটত কোনো বেটাৰৰ এয়া দ্বিতীয় সৰ্বাধিক ব্যক্তিগত স্ক’ৰ।
মোহালীৰ আই এছ বিন্দ্ৰা ষ্টেডিয়ামত অনুষ্ঠিত হোৱা মেচখনত মোহালী কিংছে টছত জিকি প্ৰথমে বলিং কৰাৰ সিদ্ধান্ত লৈছিল। অমৃতসৰ ছুৰমাছৰ হৈ ইনিংছ মুকলি কৰিবলৈ ক্ৰিজলৈ আহিছিল নমন ধীৰ। সাধাৰণতে মিডল অৰ্ডাৰত বেটিং কৰা ধীৰে এইবাৰ অ’পেনাৰ হিচাপে সুযোগ পাই সেই সুযোগৰ সম্পূৰ্ণ সদ্ব্যৱহাৰ কৰে। প্ৰথম কেইটামান বলত অলপ সময় লৈ খেলাৰ পাছতে ধীৰে নিজৰ স্বাভাৱিক আক্ৰমণাত্মক ৰূপ দেখুৱাবলৈ আৰম্ভ কৰে। তাৰ পাছত মোহালী কিংছৰ বলাৰসকলৰ ওপৰত যেন ৰুদ্ৰ ৰূপ ধাৰণ কৰে তেওঁ। চাৰি-ছয়ৰ বৰষুণেৰে খেলপথাৰ ভৰাই তোলা ধীৰে মাত্ৰ ৩৭টা বলতে শতক সম্পূৰ্ণ কৰে। এই শতক শ্বেৰ-ঈ-পাঞ্জাব T20 লীগৰ অন্যতম দ্ৰুততম শতক হিচাপে পৰিগণিত হয়।
ইয়াৰ পাছত তেওঁৰ বেটিং আৰু অধিক বিধ্বংসী হৈ পৰে। মাত্ৰ ৫৪টা বলতে ১৫০ ৰান সম্পূৰ্ণ কৰে ধীৰে। শেষলৈ গৈ ৬৪টা বলৰ সন্মুখীন হৈ ১৭৩ ৰানত আউট হয়। ইনিংছৰ শেষ অভাৰত আয়ুষ গোৱেলৰ বলত আউট হৈ এই ঐতিহাসিক ইনিংছৰ অন্ত পেলায়। নমন ধীৰৰ ১৭৩ ৰানৰ ইনিংছৰ আটাইতকৈ উল্লেখযোগ্য দিশ আছিল তেওঁৰ বাউণ্ডেৰীৰ সংখ্যা। তেওঁ ১৬টা চাৰি আৰু ১২টা ছয়, মুঠ ২৮টা বাউণ্ডেৰী কোবায়। ৬৪টা বলত ১৭৩ ৰান অৰ্থাৎ তেওঁৰ ষ্ট্ৰাইক ৰেট আছিল প্ৰায় ২৭০.৩১।
এই ইনিংছৰ জৰিয়তে ধীৰে শ্বেৰ-ঈ-পাঞ্জাব T20 লীগৰ ইতিহাসত সৰ্বাধিক ব্যক্তিগত স্ক’ৰৰ অভিলেখ নিজৰ নামত কৰাই নহয় বিশ্বৰ ICC বা যিকোনো বোৰ্ডৰ স্বীকৃতিপ্ৰাপ্ত T20 ফৰ্মেটৰ দ্বিতীয় সৰ্বাধিক ব্যক্তিগত স্ক’ৰ। মাত্ৰ ২ ৰানৰ বাবে ক্ৰিছ গেইলৰ অপৰাজিত ১৭৫ ৰানৰ ইনিংছটো এতিয়াও সৰ্বাধিক ব্যক্তিগত স্ক’ৰৰ ৰেকৰ্ড হিচাপে অক্ষত থাকে। ২০১৩ চনত পুনে ৱাৰিৱৰ্ছৰ বিৰুদ্ধে RCBৰ হৈ ক্ৰিছ গেইলে খেলিছিল এই দুৰ্দান্ত ইনিংছটো। অৱশ্যে আন্তঃৰাষ্ট্ৰীয় T20ত সৰ্বাধিক ব্যক্তিগত স্ক’ৰ ৰেকৰ্ড আছে প্ৰাক্তন অষ্ট্ৰেলিয়ান অধিনায়ক আৰন ফিন্সৰ নামত। আৰন ফিন্সে ২০১৮ত জিম্বাবুৱেৰ বিৰুদ্ধে ৭৬টা বলত খেলিছিল ১৭২ ৰানৰ এই ইনিংছটো।
নমন ধীৰৰ এই ধুমুহা ইনিংছৰ ফলতে অমৃতসৰ সূৰমাছে ২০ অভাৰত ৭ উইকেটত ২৭৯ ৰান সংগ্ৰহ কৰে। অৰ্থাৎ মোহালী কিংছৰ সন্মুখত জয়ৰ বাবে ২৮০ ৰানৰ লক্ষ্য নিৰ্ধাৰণ হয়। নমন ধীৰৰ এই ইনিংছ কেৱল এটা ব্যক্তিগত অভিলেখ নহয়; ই তেওঁৰ বেটিং ক্ষমতাৰ এক শক্তিশালী নিদৰ্শনো। বিশেষকৈ অ’পেনাৰ হিচাপে সুযোগ লাভ কৰি তেওঁ যি ধৰণেৰে ইনিংছটো গঢ়ি তুলিলে, সেয়া আগন্তুক সময়ত তেওঁৰ বাবে অতি গুৰুত্বপূৰ্ণ হ’ব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
