আজি অসমৰ নগাঁও লোকসভা সমষ্টিৰ উপ নিৰ্বাচনৰ ভোটগ্ৰহণ শান্তিপূৰ্ণভাৱে সমাপ্ত হয়। নগাঁওৰ উপৰিও পশ্চিমবংগৰ নন্দিগ্ৰাম আৰু ৰেজিনগৰ বিধানসভা সমষ্টিতো কটকটীয়া নিৰাপত্তাৰ মাজত উপ-নিৰ্বাচনৰ ভোটগ্ৰহণ অনুষ্ঠিত হয়। এখন লোকসভা আৰু দুখনকৈ বিধানসভাৰ আসনতে পুৱা ৭ বজাৰ পৰা ভোটগ্ৰহণ আৰম্ভ হয়। পশ্চিমবংগৰ নন্দিগ্ৰাম আৰু ৰেজিনগৰত ভোটগ্ৰহণৰ মাজতে কেইবাটাও ঘটনাক লৈ ৰাজনৈতিক পৰিস্থিতি উত্তপ্ত হৈ পৰে। তিনিওখন আসনৰ ফলাফল ৯ অক্টোবৰত ঘোষণা কৰা হ’ব।
পশ্চিমবংগৰ মুৰ্ছিদাবাদ জিলাৰ ৰেজিনগৰ বিধানসভা সমষ্টিত ভোটদানৰ সময়ত আম জনতা উন্নয়ন পাৰ্টি (AJUP)-ৰ মুৰব্বী তথা নাওদাৰ বিধায়ক হুমায়ুন কবীৰক আৰক্ষীয়ে আটক কৰে।
খবৰ অনুসৰি, ভোটদান কৰাৰ পাছত আৰক্ষীৰ সৈতে তেওঁৰ তৰ্ক-বিতৰ্ক হয়। পৰিস্থিতি উত্তপ্ত হৈ পৰাৰ পিছত আৰক্ষীয়ে তেওঁক থানালৈ লৈ যায়। এই ঘটনাক লৈ তেওঁৰ সমৰ্থকসকলৰ মাজত অসন্তুষ্টিৰ সৃষ্টি হয়। আনহাতে, আৰক্ষীৰ মতে আইন-শৃংখলাজনিত পৰিস্থিতি নিয়ন্ত্ৰণত ৰখাৰ বাবেই তেওঁক আটক কৰা হয়।
নন্দিগ্ৰাম আৰু ৰেজিনগৰ দুয়োখন আসনতে শান্তিপূৰ্ণভাৱে ভোটগ্ৰহণ সম্পন্ন কৰাৰ বাবে ব্যাপক নিৰাপত্তা ব্যৱস্থা কৰা হয়। ভোটগ্ৰহণৰ পূৰ্বে নন্দিগ্ৰাম থানাৰ ভাৰপ্ৰাপ্ত বিষয়াকো সলনি কৰা হৈছিল। বিৰোধী দলসমূহে পূৰ্বৰ বিষয়াগৰাকীৰ নিৰপেক্ষতাক লৈ অভিযোগ উত্থাপন কৰাৰ পিছতে এই পদক্ষেপ লোৱা হয়। নন্দিগ্ৰামত ভোটগ্ৰহণৰ সময়ত ভোটিং এজেণ্টক বুথৰ পৰা আঁতৰাই দিয়াৰ অভিযোগো উত্থাপন কৰে কংগ্ৰেছে। বিজেপিয়ে অৱশ্যে এই অভিযোগ অস্বীকাৰ কৰে আৰু ভোটগ্ৰহণ শান্তিপূৰ্ণভাৱে চলা বুলি দাবী কৰে।
নন্দিগ্ৰাম বিধানসভা আসনৰ উপ-নিৰ্বাচনক লৈ আৰম্ভণিৰে পৰাই যথেষ্ট ৰাজনৈতিক আগ্ৰহ দেখা গৈছে। বিজেপি, কংগ্ৰেছকে ধৰি বিভিন্ন দলে এই আসনত প্ৰতিদ্বন্দ্বিতা কৰিছে। ভোটগ্ৰহণৰ দিনটোতো বিভিন্ন অভিযোগ-প্ৰতি অভিযোগে সমষ্টিটোৰ ৰাজনৈতিক পৰিৱেশ উত্তপ্ত কৰি ৰাখে। নিৰ্বাচন আয়োগে ভোটগ্ৰহণ যাতে সুৰক্ষিত আৰু নিয়মমাফিকভাৱে অনুষ্ঠিত হয়, তাৰ বাবে কেন্দ্ৰীয় বাহিনী আৰু ৰাজ্যিক আৰক্ষীৰ ব্যাপক ব্যৱস্থা কৰিছে। মুৰ্ছিদাবাদ জিলাৰ ৰেজিনগৰ আসনখন হুমায়ুন কবীৰে পূৰ্বে জয়লাভ কৰিছিল। পিছত তেওঁ নাওদা বিধানসভা আসনখন ৰখাৰ সিদ্ধান্ত লোৱাত ৰেজিনগৰ আসনখন খালী হয়। সেই খালী আসন পূৰণৰ বাবেই এই উপ-নিৰ্বাচন অনুষ্ঠিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
