পশ্চিম এছিয়াৰ যুদ্ধৰ বাবে পেট্ৰল ডিজেলৰ সৰবৰাহত বাধা আহিছে৷ কেৱল সেয়াই নহয় ৰন্ধন গেছক লৈয়ো হাহাকাৰ চলিছে৷ এই পৰিস্থিতিত পাঁচ দেশ ভ্ৰমণৰ বাবে গৈছে দেশৰ প্ৰধানমন্ত্ৰী মোদী৷ শুকুৰবাৰে সংযুক্ত আৰৱ আমিৰশাহীত উপস্থিত হৈয়ে দুখনকৈ ডাঙৰ চুক্তিত চহী কৰিছে প্ৰধানমন্ত্ৰী নৰেন্দ্ৰ মোদীয়ে৷ ইন্ধনৰ সংকট মোকাবিলা কৰিবলৈ এলপিজি সৰবৰাহ আৰু পেট্ৰোলিয়াম মজুতক লৈ মউ চহী কৰিছে দুখন দেশে৷ ইয়াৰ সৈতে চুক্তি হৈছে প্ৰতিৰক্ষা বিষয়তো৷
বিগত দেওবাৰে তেলেঙ্গানাৰ এখন সভাৰ পৰা পেট্ৰল, ডিজেল ব্যৱহাৰত কিছু সতৰ্কতা অৱলম্বন কৰাৰ কথা কৈছিল প্ৰধানমন্ত্ৰী মোদীয়ে৷ ইয়াৰোপৰি আগন্তুক এবছৰৰ বাবে বিদেশ ভ্ৰমণ আৰু সোণ কিনা বন্ধ ৰখাৰ পৰামৰ্শ দিছিল তেওঁ৷ তাৰপিছতেই এইদিনটোত পেট্ৰল ডিজেলৰ দাম ৩টকা বঢ়াই দিয়ে তেল সংস্থাসমূহে৷ চিএনজিৰ দামো কিঃগ্রাঃয়ে প্ৰতি ২টকা বাঢ়িছে৷ ইয়াৰপাছতেই এই দিনটো সংযুক্ত আৰৱ আমিৰশাহিত উপস্থিত হৈছে মোদী৷
এইদিনটোত দুপৰীয়া ১২ বজাত আবু ধাবি আন্তৰ্জাতিক বিমানবন্দৰত অৱতৰণ কৰে মোদীয়ে৷ তাতেই গাৰ্ড অফ অনাৰ দিয়া হয় তেওঁক৷ তাৰপিছতেই তেওঁ প্ৰেছিডেণ্টৰ বাসভৱনলৈ যায়৷ আমিৰশাহিৰ প্ৰেচিডেণ্ট শেখ মহম্মদ বিন জায়েৰ আল নাইয়ানৰ সৈতে বৈঠকত বহে তেওঁ৷ তাতেই এলপিজিক লৈ দুই দেশৰ চুক্তি স্বাক্ষৰ কৰে৷ চুক্তি অনুসৰি ভাৰতত দীৰ্ঘম্যাদত এলপিজি সৰবৰাহ নিশ্চিত কৰিব সংযুক্ত আৰৱ আমিৰশাহিয়ে৷ যুদ্ধৰ মাজত ভাৰতত ৰন্ধন গেছৰ সৰবৰাহত যাতে কোনো সমস্যা নহয় তাৰবাবেই এই পদক্ষেপ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
