নিৰাপদে ঘুৰি আহিব পাৰিবনে সুনীতা, নাছাৰ হাতত মাত্ৰ ১৯ দিন বাকী
মহাকাশচাৰী সুনীতা উইলিয়ামছ আৰু বুচ উইলম’ৰক আন্তঃৰাষ্ট্ৰীয় মহাকাশ কেন্দ্ৰ আই এছ এছৰ পৰা নিৰাপদে ঘূৰাই আনিবলৈ এতিয়া নাছাৰ হাতত মাত্ৰ ১৯ দিন বাকী আছে। দুয়োগৰাকী মহাকাশচাৰীয়ে তেওঁলোকৰ বয়িং ষ্টাৰলাইনাৰ মহাকাশযানৰ কাৰিকৰী সমস্যাৰ বাবে আই এছ এছত আবদ্ধ হৈ আছে।
১৩ জুনত আই এছ এছত উপস্থিত হোৱা ষ্টাৰলাইনাৰে প্ৰথমে এসপ্তাহজোৰা অভিযানৰ অন্তত পৃথিৱীলৈ উভতি অহাৰ কথা আছিল। আনহাতে মহাকাশযানখনৰ থ্ৰাষ্টাৰ আৰু হিলিয়াম ব্যৱস্থাৰ সমস্যাৰ বাবে তেওঁলোকৰ উভতি অহাত পলম হৈছিল। যাৰ বাবে নাছাৰ ক্ৰু-৯ মিছনৰ আগমনৰ পূৰ্বে সমস্যা সমাধানৰ বাবে মাত্ৰ ১৯ দিন বাকী আছে।
৫ জুনত ফ্ল’ৰিডাৰ কেপ কানাভেৰেল মহাকাশ বাহিনী ষ্টেচনৰ পৰা উৎক্ষেপণ কৰা হৈছিল সুনীতা উইলিয়ামছ আৰু বুচ উইলম’ৰক। তেওঁলোকৰ মিছন আছিল ষ্টাৰলাইনাৰ বিমানখনৰ প্ৰথমখন মানুহবিহীন বিমানত পৰীক্ষা কৰা। যিটো বয়িঙৰ কমাৰ্চিয়েল ক্ৰু প্ৰগ্ৰেমৰ বাবে এক উল্লেখযোগ্য মাইলৰ খুঁটি আছিল।
মহাকাশযানখনে আই এছ এছৰ সৈতে সফলতাৰে কাম কৰে। কিন্তু ওচৰ চাপি অহাৰ লগে লগে ইয়াৰ ২৮টা থ্ৰাষ্টাৰৰ ভিতৰত পাঁচটা অভাৱনীয়ভাৱে বন্ধ হৈ পৰে। ইয়াৰ উপৰিও অভিযন্তাসকলে মহাকাশযানখনৰ চাৰ্ভিচ মডিউলত ৫টা সৰু সৰু হিলিয়াম লিক আৱিষ্কাৰ কৰে। এই সমস্যাৰ বাবে ষ্টাৰলাইনাৰে নিৰাপদে পৃথিৱীলৈ ঘূৰি আহিব নোৱাৰে।
নাছা আৰু বয়িংৰ অভিযন্তাসকলে ষ্টাৰলাইনাৰৰ সমস্যা নিৰ্ণয় আৰু সমাধানৰ বাবে অক্লান্তভাৱে কাম কৰি আছে। বৰ্তমান নাছাই জনাইছে যে উইলিয়ামছ আৰু উইলম’ৰৰ উভতি অহাৰ সময়সীমা এতিয়াও নিৰ্ধাৰণ কৰা হোৱা নাই। মহাকাশযানখনৰ থ্ৰাষ্টাৰ আৰু হিলিয়াম ব্যৱস্থা পৃথিৱীৰ বায়ুমণ্ডলত নিৰাপদে পুনৰ প্ৰৱেশৰ বাবে অতি গুৰুত্বপূৰ্ণ।
যিকোনো বিজুতিয়ে মহাকাশচাৰীৰ সুৰক্ষাৰ বাবে যথেষ্ট বিপদৰ সৃষ্টি কৰিব পাৰে। যদিহে ষ্টাৰলাইনাৰৰ বিজুতিৰ সমাধান নহয় তেন্তে নাছাই উইলিয়ামছ আৰু উইলম’ৰক পৃথিৱীলৈ ঘূৰাই অনাৰ বাবে বিকল্প পদ্ধতিৰ কথা বিবেচনা কৰিবলগীয়া হ’ব পাৰে। য’ত সম্ভৱতঃ স্পেচএক্স ড্ৰেগন কেপচুল ব্যৱহাৰ কৰাটোও অন্তৰ্ভুক্ত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
