দেশজুৰি বিক্ষোভৰ মাজতেই পলোৱাৰ চেষ্টা কৰিছে নেকি নেপালৰ প্ৰধানমন্ত্ৰী কে পি শৰ্মা অলিয়ে? সূত্ৰৰ দাবী যে বাংলাদেশৰ শেখ হাছিনাৰ দৰেই তেওঁ দেশ এৰি যাব পাৰে৷ এইক্ষেত্ৰত তেওঁৰ গন্তব্য হ’ব পাৰে সংযুক্ত আৰৱ আমিৰশাহিৰ ডুবাই৷ প্ৰধানমন্ত্ৰীৰ ঘনিষ্ঠ সূত্ৰই উল্লেখ কৰিছে এই কথা৷ ইণ্ডিয়া টুডেই এই তথ্য সম্প্ৰচাৰো কৰিছে৷ সূত্ৰৰ দাবী যে নেপালৰ সেনাপ্ৰধান অশোক ৰাজ ছিগদেলে প্ৰধানমন্ত্ৰী অলিক প্ৰধানমন্ত্ৰী পদ ত্যাগ কৰাৰ পৰামৰ্শ দিয়াৰ পাছতেই প্ৰধানমন্ত্ৰীয়ে কিছু মুহূৰ্তৰ পূৰ্বে পদত্যাগ কৰিছে৷
সূত্ৰৰ দাবী যে চিকিৎসাৰ বাবে ডুবাই যোৱাৰ অজুহাত দি দেশ এৰাৰ পৰিকল্পনা অলিৰ৷ ব্যক্তিগত বিমান সংস্থা হিমালয় এয়াৰলাইন্সৰ সৈতেও যোগাযোগ কৰিছে অলিয়ে৷ ইতিমধ্যেই তেওঁ মন্ত্ৰীসভাৰ দায়িত্ব উপপ্ৰধানমন্ত্ৰীৰ হাতত অৰ্পণ কৰিছে৷ মঙলবাৰে সন্ধিয়া ৬ বজাত সৰ্বদলীয় বৈঠকো মতা হৈছে৷ কিন্তু এই বৈঠকৰ সময়লৈকে তেওঁ নেপালত থাকিবনে সেই বিষয়ক লৈ সন্দিহান হৈ পৰিছে সকলো৷
এক বাৰ্তাত নেপালৰ প্ৰধানমন্ত্ৰীয়ে লিখিছে, ‘এই পৰিস্থিতিৰ মোকাবিলা আৰু সমাধান বিচৰাৰ বাবে আমি নিৰ্দিষ্ট কিছু দলৰ সৈতে আলোচনা চলাইছো৷ মঙলবাৰে সন্ধিয়া ৬ বজাত এক সৰ্বদলীয় বৈঠক আয়োজন কৰিছো৷ এই কঠিন পৰিস্থিতিত সকলোকে শান্ত থাকিবলৈ অনুৰোধ জনাইছো৷’
উল্লেখ কৰা প্ৰয়োজন যে সামাজিকমাধ্যমত নিষেধাজ্ঞা জাৰি কৰিছিল নেপাল চৰকাৰে৷ সেই বিষয়ক কেন্দ্ৰ কৰিলেই আৰম্ভ হৈছিল বিতৰ্ক৷ দীৰ্ঘদিনৰ পুঞ্জীভূত ক্ষোভত ঘৃতাহুতি দিয়ে অলিৰ এই সিদ্ধান্তই৷ প্ৰতিবাদত নামে দেশৰ ছাত্ৰসমাজ৷ তেওঁলোকৰ বিক্ষোভে সোমবাৰে অগ্নিগৰ্ভ কৰি তোলে ৰাজধানী কাঠমাণ্ডু৷ পৰিস্থিতি সম্ভালিবলৈ আৰক্ষীয়ে গুলিচালনাও কৰে৷ এই গুলিচালনাত মৃত্যু হয় ১৯জন বিক্ষোভকাৰীৰ৷ তাৰপিছতেই আৰু জংগী হৈ উঠে বিক্ষোভকাৰী দল৷ আন্দোলনকাৰীৰ চাপতেই নেপাল চৰকাৰে সামাজিকমাধ্যমৰ ওপৰত থকা নিষেধাজ্ঞা তুলি লবলৈকো বিবৃত্তি জাৰি কৰে৷ কিন্তু তাৰপিছতো প্ৰতিবাদকাৰী শান্ত হোৱা নাই৷ তেওঁলোকে অলিৰ পদত্যাগৰ দাবীৰে প্ৰতিবাদ অব্যাহত ৰাখে আৰু শেষত পদত্যাগ কৰিবলৈ বাধ্য হৈছে প্ৰধানমন্ত্ৰী অলিয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
