হিন্দুধৰ্ম অনুসৰি সূৰ্যগ্ৰহণ আৰু চন্দ্ৰগ্ৰহণ হৈছে অত্যন্ত গুৰুত্বপূৰ্ণ মহাজাগতিক ঘটনা৷ গ্ৰহণৰ দিনা কিছু বিশেষ বিধি আচাৰ মানি চলাৰ প্ৰথা প্ৰচলিত আছে৷ এই বছৰ মুঠ ৫টা গ্ৰহণ হ’ব৷ ইয়াৰ মাজতেই দুটা সূৰ্যগ্ৰহণ আৰু তিনিটা চন্দ্ৰগ্ৰহণ৷ এই পাঁচ গ্ৰহণৰ মাজত এটা সূৰ্য আৰু চন্দ্ৰগ্ৰহণ ইতিমধ্যেই হৈ গৈছে৷ পৰবৰ্তী সূৰ্য গ্ৰহণ হ’ব আগন্তুক ২ অক্টোবৰত৷ সেইদিনাই আছে মহালয়া বা সৰ্বপিতৃ অমাবস্যাও৷
মহালয়া ২০২৪
প্ৰতিবছৰে আহিন মাহৰ অমাবস্যা তিথিত পালিত হয় মহালয়া৷ হিন্দু ধৰ্মাৱলম্বীসকলৰ ওচৰত মহালয়া তিথি বিশেষভাৱে গুৰুত্বপূৰ্ণ৷ এই দিনটোত পিতৃ তৰ্পণৰ প্ৰথা প্ৰচলিত আছে৷ সেয়ে ইয়াক সৰ্বপিতৃ অমাবস্যা বুলিও কোৱা হয়৷ প্ৰয়াত পূৰ্বপুৰুষসকলৰ উদ্দেশ্যি এই দিনটোত জল তৰ্পণ কৰা হয়৷ প্ৰচলিত বিশ্বাস অনুসৰি পিতৃপক্ষত প্ৰয়াত পিতৃপুৰুষসকলে তেওঁলোকৰ জীৱিত উত্তৰপুৰুষৰ হাতৰ পৰা পানী খাবলৈ নামি আহে৷ মহালয়াৰ দিনা পানী খাই তুষ্ট হৈ উভতি যায়৷ প্ৰয়াত পিতৃপুৰুষক এই দিনটোত বিদায় জনোৱা হয় বাবেই সৰ্বপিতৃ অমাবস্যা হৈছে সকলোতকৈ গুৰুত্বপূৰ্ণ অমাবস্যা তিথি৷
দ্বিতীয় সূৰ্যগ্ৰহণ ২০২৮
এই বছৰ প্ৰথম সূৰ্যগ্ৰহণ হৈছিল এপ্ৰিল মাহত৷ মহালয়া বা সৰ্বপিতৃ অমাবস্যাৰ দিনাই হ’ব ২০২৪ চনৰ দ্বিতীয় সূৰ্য গ্ৰহণ৷ আগন্তুক ২ অক্টোবৰ ২০২৪ত সূৰ্যগ্ৰহণ৷ সেই দিনটোতেই গান্ধী জয়ন্তীও৷ আগন্তুক ২ অক্টোবৰত কন্যা ৰাশি আৰু হস্ত নক্ষত্ৰত হ’ব সূৰ্য গ্ৰহণ৷ সেইদিনটোত চন্দ্ৰ, বুধ আৰু কেতুত সূৰ্যৰ সৈতে অৱস্থান কৰিব৷ ইয়াৰ ফলত গ্ৰহণৰ উল্লেখযোগ্য প্ৰভাৱ বিভিন্ন ৰাশিৰ জাতকৰ ওপৰত পৰিব৷ এতিয়া প্ৰশ্ন হয় গ্ৰহণৰ কাৰণে মহালয়াৰ পিতৃ তৰ্পণত বাধা আহিব নেকি?
দ্বিতীয় সূৰ্য গ্ৰহণৰ সময় আৰু সূতক কাল
এই বছৰৰ দ্বিতীয় সূৰ্যগ্ৰহণ আৰম্ভ হ’ব ২ অক্টোবৰ ২০২৪ৰ বুধবাৰে নিশা ৯ বাজি ১৩ মিনিটত আৰু গ্ৰহণ এৰিব নিশা ৩ বাজি ১৭ মিনিটত৷ গ্ৰহণ স্থায়ী হ’ব ৬ঘণ্টা ৪ মিনিটৰ বাবে৷ যিহেতু মহালয়াত যাৱতীয় পিতৃ তৰ্পণৰ আচাৰ পুৱাতেই সম্পূৰ্ণ হ’ব সেয়ে নিশা গ্ৰহণ লগাৰ কোনো প্ৰভাৱ তৰ্পণৰ কামত নপৰে৷ গ্ৰহণৰ সূতক কালো ইয়াত কাৰ্যকৰী নহয়৷ সাধাৰণভাৱে গ্ৰহণ লগাৰ ১২ ঘণ্টা আগৰ পৰা সূতক কাল আৰম্ভ হয়৷ এই সময়ৰ ভিতৰত কোনো শুভ কাম সম্পন্ন নহয়৷
গ্ৰহণ কৰ পৰা দেখা যাব?
ভাৰতৰ পৰা গ্ৰহণ দেখা নগলেও ২ অক্টোবৰৰ গ্ৰহণ দেখা যাব দক্ষিণ আমেৰিকা, প্ৰশান্ত মহাসাগৰ, আটলান্তিক মহাসাগৰ, আৰ্কটিক, চিলি, পেৰু, হনলুলু, এণ্টাৰ্কটিকা, আৰ্জেণ্টিনা, উৰুগুৱে, ফিজি, ব্ৰাজিল, মেক্সিকো, পেৰুৰ পৰা দেখা যাব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
