দেশৰ লগতে বিশ্বৰ বহুতো অনন্য বিবাহ আপুনি নিশ্চয় দেখিছে৷ স্বচক্ষে নেদেখিলেও তেনে বিবাহৰ খবৰ আপুনি পঢ়িছে৷ ভাৰত পাকিস্তান দুয়োখন দেশ এখন আনখনৰ শত্ৰু হ’লেও দুই দেশৰ বহু যুৱক যুৱতীয়ে প্ৰেমত পৰে৷ দেশৰ সীমা পাৰ হৈ কোনোবা যদি পাকিস্তানলৈ যায় কোনোবা আকৌ পাকিস্তানৰ পৰা ভাৰতলৈ আহে৷ প্ৰেমে নামানে কোনো ৰেডক্লিফ লাইন৷ হৃদয়ৰ তাঁৰডাল যিকোনো বাধা অতিক্ৰমী বান্ধ খায়েই যায়৷
তেনে এহাল প্ৰেমিক প্ৰেমিকাৰেই কাহিনী এয়া৷ কাহিনী উত্তৰপ্ৰদেশৰ জৌনপুৰৰ বিজেপি নেতাৰ পুত্ৰৰ৷ বিজেপি নেতাৰ পুত্ৰই অনলাইনযোগেই বিয়া কৰালে এগৰাকী পাকিস্তানী যুৱতীক৷ বিয়া কৰাই বিপদত এতিয়া বিজেপি নেতাৰ পুত্ৰ৷ প্ৰেমে বাধা নামানিলেও বাধা হৈ থিয় দিছে এতিয়া ভিছা৷ কইনাক ভাৰতলৈ আনিবলৈ ভিছাৰ বাবে ৰৈ থাকিব লগা হৈছে যুৱকজন৷ উপায়হীন হৈ যুৱকজনে এতিয়া সহায় বিচাৰিছে ভাৰত চৰকাৰৰ৷ দৰাৰ আৰ্জি কইনাক ভিছা প্ৰদান কৰক যাতে তাই ভাৰতলৈ আহিব পাৰে৷ এই প্ৰেমৰ বান্ধোনতেই দুই দেশৰ বন্ধুত্বৰ ছবিখন যাতে ফুটি উঠে৷ দুই দেশৰ মাজত দূৰত্ব শেষ কৰি সম্পৰ্ক সুদৃঢ় হয় তাৰবাবে চেষ্টা কৰিবলৈকো আহ্বান জনাইছে বিজেপি নেতাৰ পুত্ৰই৷
কি কাৰণত অনলাইন বিবাহ কৰালে বিজেপি নেতাৰ পুত্ৰই?
উত্তৰপ্ৰদেশৰ নগৰ কোতৱালি থানা এলেকাৰ অন্তৰ্গত মখদুমশ্বাহ আধনৰ বাসিন্দা তথা বিজেপিৰ কাউন্সিলাৰ তেহছিন শ্বাহিদৰ পুত্ৰ মহম্মদ আব্বাছৰ এগৰাকী পাকিস্তানী যুৱতীৰ সৈতে প্ৰেম গঢ়ি উঠে৷ পাকিস্তানৰ লাহোৰত বাস কৰা তেওঁৰ আত্মীয়ৰ কন্যাৰ সৈতে প্ৰেম গঢ়ি উঠে মহম্মদ আব্বাছৰ৷ এবছৰ পূৰ্বে পৰিয়াল এই প্ৰেমৰ বিষয়ে জ্ঞাত হয়৷ বিবাহো ঠিক হয় দুয়োৰে৷ তাৰপিছতেই পৰিয়ালে ভিছাৰ বাবে আবেদন কৰে৷ ইফালে কইনাৰ মাতৃ ৰাণা ইয়াছমিন জাইদীৰ হঠাৎ স্বাস্থ্যৰ অৱনতি ঘটে৷ স্বাস্থ্যজনিত কাৰণত তেওঁক হাস্পতালৰ আইচিইউত ভৰ্তি কৰাব লগা হয়৷ কইনাৰ মাতৃৰ স্বাস্থ্যৰ খবৰ পায় দৰাৰ পৰিয়ালে আৰু ভিছালৈ অপেক্ষা কৰি নাথাকিল৷ অনলাইনযোগেই তেওঁলোকে পুত্ৰৰ বিবাহ কৰোৱাৰ সিদ্ধান্ত লয়৷
১৮ অক্টোবৰ শুকুৰবাৰে তেওঁলোকৰ বিবাহ সম্পন্ন হৈছে৷ শুকুৰবাৰে নিশা তেনছিন শ্বাহিদে বৰযাত্ৰীক লৈ শোভাযাত্ৰা কৰি ইমাম্বৰা কল্লু মাৰহুমত উপস্থিত হয়৷ এখন ডাঙৰ পৰ্দা লগাই সকলোৰে সন্মুখত অনলাইযোগে নিকাহ পাঠ কৰোৱাই দুয়োকে৷ দুয়োখন দেশৰ মৌলানাই বিবাহ সম্পন্ন কৰোৱাই৷ লাহোৰত বহু আত্মীয় কইনাৰ ঘৰত গোট খায়৷
মোদী চৰকাৰলৈ দৰাৰ কি কি আহ্বান?
নিকাহ পাঠ কৰাবলৈ অহা চিয়া ধৰ্মীয় গুৰু মৌলানা মাহফজুল হাছান খানে নিকাহ পঢ়োৱাৰ অন্তত কয় যে ইছলাম ধৰ্মত যুৱতীগৰাকীৰ অনুমতিৰ প্ৰয়োজন হয় যিটো নিকাহৰ বাবে যুৱতীগৰাকীয়ে নিজেই মৌলানাক দিব লাগে৷ এই অৱস্থাত যদি যুৱতীগৰাকীয়ে অনলাইনত অনুমতি দিয়ে তেন্তে দুয়োজন মৌলানাই একেলগে বহি বিয়াখন সম্পন্ন কৰিব পাৰে৷ মৌলানাই কয় যে, দুয়োখন দেশৰ ৰাজনৈতিক সম্পৰ্কৰ অৱনতি ঘটাৰ বাবে দুয়োপক্ষৰ লোকে বহু সমস্যাৰ সন্মুখীন হবলগীয়া হৈছে৷
এই পৰিস্থিতিত দুয়োখন দেশৰ শাসকে ইচ্ছা কৰিলে এই প্ৰতিশোধৰ জুইকুৰা নুমুৱাব পাৰে৷ শেহতীয়াকৈ ভাৰতৰ বৈদেশিক মন্ত্ৰী এছ জয়শংকৰৰ পাকিস্তান ভ্ৰমণে ৰাইজৰ মাজত আশাৰ সঞ্চাৰ কৰিছে। বিয়াৰ পিছত দৰা মহম্মদ আব্বাছ হাইদৰেও মোদী চৰকাৰক শীঘ্ৰে ভিছা প্ৰদান কৰিবলৈ আহ্বান জনাইছে যাতে ছোৱালীজনীয়ে সোনকালে ভাৰতলৈ আহিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
