আজিকালি সকলোৱে জিন্স পিন্ধে। আপুনি জিন্স পিন্ধিলে হয়তো দেখিছে যে, সোঁ পকেটৰ ঠিক ওপৰত এখন সৰু পকেট থাকে। বহুতে হয়তো ভাবিব পাৰে যে এইটো কেৱল ডিজাইনৰ সৌন্দৰ্য বৃদ্ধিৰ বাবেহে কৰা হৈছে, কিন্তু বাস্তৱত ইয়াৰ আঁৰত প্ৰায় ১৫০ বছৰ পুৰণি ইতিহাস আছে। এই সৰু পকেটটোৰ উৎপত্তি ১৮৭৩ চনত হৈছিল, যেতিয়া বিশ্ববিখ্যাত ব্ৰেণ্ড ‘লেভি ষ্ট্ৰাউছ’ই প্ৰথমবাৰৰ বাবে এই জিন্স বজাৰলৈ আনিছিল।
১৯ শতিকাত যেতিয়া হাতঘড়ী আজিৰ দৰে জনপ্ৰিয় নাছিল, তেতিয়া পুৰুষৰ ফেশ্বন আৰু প্ৰয়োজনীয়তাৰ মূল অংশ আছিল পকেট ঘড়ী। সোণৰ খনিত কাম কৰা লোক, ৰে’ল চালকে সেই সময়ত শিকলিযুক্ত এই পকেট ঘড়ীবোৰ ব্যৱহাৰ কৰিছিল আৰু কাম কৰাৰ সময়ত ঘড়ীটো সুৰক্ষিত ৰখাটোৱেই আছিল আটাইতকৈ ডাঙৰ প্ৰত্যাহ্বান। যদি আপুনি ইয়াক ডাঙৰ পেণ্টৰ পকেটত ৰাখে, তেন্তে ঘড়ীৰ গ্লাছ ভাঙি যাব বা আন বস্তুৰ দ্বাৰা আঁচোৰ খাব পাৰে।
সেই সমস্যা সমাধানৰ বাবে লেভি ষ্ট্ৰাউছ আৰু দৰ্জী জেকব ডেভিছে এই বিশেষ অতিৰিক্ত পকেটটো জিন্সৰ মূল সোঁফালৰ পকেটত চিলাই কৰিছিল। এই সৰু পকেটটোৱে ঘড়ীটোক সুৰক্ষিতভাৱে ধৰি ৰাখিব আৰু লৰচৰ কৰিলেও ইয়াক বাহিৰলৈ পৰিবলৈ বা ভাঙিবলৈ নিদিব। সেইবাবেই সেই সময়ত চিলাইৰ নথি-পত্ৰ আৰু ফেশ্বন ইতিহাসত ইয়াক আনুষ্ঠানিকভাৱে ‘ৱাটচ পকেট’ বুলি অভিহিত কৰা হৈছিল।
সময়ৰ পৰিবৰ্তনৰ লগে লগে মানুহৰ অভ্যাসত বৃহৎ পৰিবৰ্তন ঘটিছে আৰু আধুনিক হাতঘড়ী আৰু ডিজিটেল ঘড়ীয়ে ১৯ শতিকাৰ পকেট ঘড়ীৰ স্থান দখল কৰিছে। যদিও সময়ৰ লগে লগে পকেট ঘড়ীৰ ব্যৱহাৰ প্ৰায় নাইকিয়া হৈ গৈছে, তথাপিও এই ‘ঘড়ীৰ পকেট’ জিন্সৰ ডিজাইন হৈ পৰিল। ফেশ্বন ডিজাইনাৰসকলৰ মতে, এতিয়া ই জিন্সৰ ক্লাছিক আৰু আইকনিক ভিজুৱেল ডিজাইনৰ অন্যতম অপৰিহাৰ্য অংশ হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
