কাশ্মীৰৰ পহেলগাওঁৰ সন্ত্ৰাসবাদী আক্ৰমণৰ NIAৰ চাৰ্জশ্বিট হাতত পৰিছে ৰাষ্ট্ৰীয় সংবাদমাধ্যমৰ৷ এই এক্সক্লুছিভ চাৰ্জশ্বিটত চাঞ্চল্যকৰ তথ্য প্ৰকাশ কৰিছে৷ পাৰভেজ আৰু ৱাছিৰ আহমেদ নামৰ দুজন লোকেল গাইডে ২৬জনৰ জীৱন সেইদিনা ৰক্ষা কৰিব পাৰিলহেতেন৷ কিন্তু তেওঁলোকৰ নীৰবতাই সন্ত্ৰাসবাদীসকলক সমৰ্থন দিয়ে৷ যাৰ বাবে এই দেশ কঁপাই যোৱা ঘটনা সংঘটিত কৰিব পাৰিলে সন্ত্ৰাসবাদীয়ে৷
চাৰ্জশ্বীট অনুসৰি আক্ৰমণৰ এদিন পূৰ্বে অৰ্থাৎ ২১ এপ্ৰিল ২০২৫ত ফয়ছল জাট ওৰফে ছুলেমান, হাবিব তাহিৰ ওৰফে ছোটু আৰু হামজা আফগানি এই তিনিজন সন্ত্ৰাসবাদীয়ে পহেলগাওঁ এলেকাত ঘূৰাফুৰা কৰিছিল৷ তাৰেই স্থানীয় বাসিন্দাসকলৰ ওচৰত তেওঁলোকে আশ্ৰয় বিচাৰিছিল৷
ঘৰত আতিথ্য দিয়া হৈছিল সন্ত্ৰাসবাদীক!
NIAক দিয়া বিবৃত্তিত ৱাছিৰ আহমেদে কৈছে যে তেওঁ তিনিজন সন্ত্ৰাসবাদীক দেখিছিল৷ তেতিয়াই সন্ত্ৰাসবাদী কেইটাই ৱাছিৰক সহায় বিচাৰিছিল৷ ইয়াৰপাছতেই ৱাছিৰে সন্ত্ৰাসবাদীকেইটাক এজোপা গছৰ তলত অপেক্ষা কৰিবলৈ কৈ পাৰভেজৰ ঘৰলৈ যায়৷ পাৰভেজ আৰু তেওঁৰ পত্নীক মুখ খুলিবলৈকো বাধা দিয়ে৷
বিয়লি প্ৰায় ৫ বজাত ৱাছিৰে তিনিটা সন্ত্ৰাসবাদীক পাৰভেজৰ ঘৰলৈ ইংগিতেৰে মাতে৷ চাৰ্জশ্বিট অনুসৰি সন্ত্ৰাসবাদীসকলৰ ওচৰত বেগ ভৰ্তি অস্ত্ৰও আছিল৷ সন্ত্ৰাসবাদীকেইটাই উৰ্দুত কথা কৈছিল যদিও উচ্চাৰণত পাঞ্জাৱীৰ টান আছিল৷ সোধপোছৰ সময়ত ৱাছিকে স্বীকাৰ কৰে যে সন্ত্ৰাসবাদীৰ চেহেৰা দেখি মুজাহিদ অৰ্থাৎ সন্ত্ৰাসবাদী হিচাপে চিনিব পৰা গৈছিল৷
সন্ত্ৰাসবাদীয়ে অত্যন্ত ক্লান্ত আৰু তৃষ্ণাৰ্ত থকাৰ কথা জনাই আল্লাহৰ নামত সাহায্যৰ বাবে মিনতি কৰিছিল৷ ইয়াৰপাছতেই পাৰভেজ আৰু ৱাছিৰে সন্ত্ৰাসবাদীকেইটাক পানী খাবলৈ দিয়ে৷ তদন্তত জনা গৈছে যে তিনি সন্ত্ৰাসবাদীয়ে প্ৰায় ৫ঘণ্টা সময় পাৰভেজৰ ঘৰত আছিল৷ সেই সময়ত সন্ত্ৰাসবাদীকেইটাৰ স্থানীয় ব্যক্তিৰ সৈতে দীৰ্ঘসময় ধৰি কথাবতৰাও হৈছিল৷
অভিযোগপত্ৰ অনুসৰি সন্ত্ৰাসবাদীয়ে অমৰনাথ যাত্ৰা, পহেলগাওঁ নিৰাপত্তা বাহিনীৰ শিৱিৰ, বাহিনীৰ গতিবিধি আৰু এলেকাৰ নিৰাপত্তা ব্যৱস্থা সম্পৰ্কিত তথ্যও সংগ্ৰহ কৰিছিল৷ NIA ই জনাইছে যে পাৰভেজ আৰু ৱাছিৰে সম্পূৰ্ণৰূপে সন্ত্ৰাসবাদীকেইটাক সহায় কৰিছিল৷
আক্ৰমণৰ মাত্ৰ কেইঘণ্টা পূৰ্বে সন্ত্ৰাসবাদীকেইটাক দেখা গৈছিল
নিশা ১০ বজাৰ পাছত সন্ত্ৰাসবাদীকেইটাই ঘটনাস্থল এৰাৰ সময়ত পাৰভেজ আৰু ৱাছিৰে সন্ত্ৰাসবাদীকেইটাৰ বাবে ১০খন ৰুটি আৰু চব্জীও বান্ধি দিছিল৷ হালধি, নিমখ, জলকীয়া আৰু এটা চৰু আৰু এখন হেতাও লৈ গৈছিল৷ কোৱা হৈছে যে সন্ত্ৰাসবাদীয়ে ইয়াৰ বিনিময়ত পাৰভেজক ৩০০০ টকা দিছিল৷
তদন্তত আৰু জনা গৈছে, আক্ৰমণৰ দিনা অৰ্থাৎ ২২ এপ্ৰিল, পাৰভেজ আৰু ৱাছিৰে বৈছৰণ উপত্যকাৰ ওচৰত তিনিটা সন্ত্ৰাসবাদীক বহি থকা দেখিছিল৷ সেইদিনাই দুয়ো পৰ্যটকৰ সৈতে বৈছৰণ উপত্যকালৈ গৈছিল৷ পৰ্যটকক লৈ উভতাৰ পথত সন্ত্ৰাসবাদীক দেখি সতৰ্ক হৈ যায়৷ ইয়াৰ কিছুসময় পাছতেই পহেলগাওঁত উপস্থিত হয় গাইড আৰু পৰ্যটক৷ সেই সময়তে বৈছৰণ উপত্যকাত এক আক্ৰমণ হয়৷ আক্ৰমণৰ পাছত দুই স্থানীয় বাসিন্দাই আত্মগোপন কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
