২০২২ চনৰ নৱেম্বৰ৷ যৌনতাৰ ফান্দত পৰি পাকিস্তানলৈ গুৰুত্বপূৰ্ণ তথ্য প্ৰেৰণ কৰাৰ অভিযোগত গ্ৰেপ্তাহ হৈছিল কেন্দ্ৰীয় বিদেশ মন্ত্ৰণালয়ৰ এগৰাকী কৰ্মী৷ তেওঁৰ বিৰুদ্ধে গুপ্তচৰবৃত্তিৰ অভিযোগ উঠিছিল৷ আৰক্ষীৰ দাবী আছিল তেওঁ হানিট্ৰেপৰ চিকাৰ হৈছে৷ ইয়াৰ পূৰ্বেও আৰু পাছতো গুপ্তচৰ সংস্থাৰ বহু অফিচাৰে যৌনতাৰ ফান্দত ভৰি দি দেশৰ গোপন তথ্য পাকিস্তানৰ হাতত তুলি দিয়া অভিযোগ কম নহয়৷ ২০১৫ চনত ভাৰতীয় বায়ুসেনাৰ অফিচাৰ কে কে ৰঞ্জিতকো একেধৰণেই ফচাইছিল পাক গুপ্তচৰ সংস্থাই৷
২০০৮ত ৰ’ ৰ অফিচাৰ মনমোহন শৰ্মাইয়ো হানিট্ৰেপৰ কৱলত পৰি দেশৰ বহু গোপন তথ্য তেঁওলোকৰ হাতত তুলি দিছিল৷ ২০০৭ চনতো ৰৰ আৰু দুজন অফিচাৰ ৰবি নায়াৰ আৰু কে ভি উন্নিকৃষ্ণণো এই ফান্দত পৰি তথ্য গতাই দিছিল পাকিস্তানক৷ হানিট্ৰেপত দেশৰ প্ৰতিৰক্ষা সংক্ৰান্তিয় খবৰ ফাঁছ কৰাৰ অভিযোগ উঠিছিল প্ৰাক্তন বিজেপি সাংসদ বৰুণ গান্ধীৰ বিৰুদ্ধেও৷
কিন্তু এই হানিট্ৰেপ প্ৰকৃততে কি? পশ্চিমৰ দেশসমূহত হানিট্ৰেপিং বিষয়টো খুবেই প্ৰচলিত৷ ইংৰাজী সাহিত্যত হানিট্ৰেপ শব্দটো প্ৰথমে আহে জন লে কাৰৰ লেখা টিঙ্কাৰ, টেলৰ, ছোলজাৰ, স্পাই নামৰ নভেলৰ মাধ্যমেৰে৷ ১৯৭৮ চনত সেই উপন্যাসকেই প্ৰথম হানিট্ৰেপ শব্দটো ব্যৱহাৰ কৰা হৈছিল৷ পাছলৈ ধীৰে ধীৰে সেয়া বহুলভাৱে প্ৰচলিত হ’ব ধৰে৷ সুন্দৰ কোনো নাৰী বা পুৰুষক টোপ হিচাপে ব্যৱহাৰ কৰি কাৰোবাৰ পৰা কোনো গোপন নথি উলিয়াই নিয়াৰ বাবে হানিট্ৰেপৰ ফান্দ পতা হয়৷
যিসমূহ নাৰী বা পুৰুষক এই কামত ব্যৱহাৰ কৰা হয় তেওঁলোকে তেওঁলোকৰ সংগী হিচাপে বাচি লোৱা অইন ব্যক্তিজনৰ ব্যক্তিগত মুহূৰ্তৰ ছবি বা ভিডিঅ’ তুলি সেয়া দেখুৱাই ব্লেকমেইল কৰে৷ বহুসময়ত বিবাহ বহিৰ্ভূত সম্পৰ্ক ধৰিবলৈকো কাৰোবাক হানিট্ৰেপ হিচাপে ব্যৱহাৰ কৰা দেখা যায়৷
শীৰ্ষ ভাৰতীয়া অধিকাৰীসকলক হানিট্ৰেপত পেলোৱাৰ অভিযোগ বহুদিন ধৰিয়েই উঠি আহিছে৷ পাকিস্তানৰ বিৰুদ্ধে এই অভিযোগ বহুসময়ত উঠি আহিছে৷ ২০২২ চনৰ এক ৰিপৰ্টত প্ৰকাশ পাইছিল যে হানিট্ৰেপৰ ফান্দত ভৰি দিছিল জাতীয় নিৰাপত্তাৰ দায়িত্বত থকা ভাৰতীয় সেনাৰ কেইবাজনো বিষয়া৷ ২০২১ চনত এক সংবাদ প্ৰকাশ পাইছিল যে পাকিস্তানে ‘অপাৰেছন হায়দৰাবাদ’ নামৰ এক অভিযান চলাই ভাৰতৰ ২০০ সেনাক হানিট্ৰেপৰ ফান্দত পেলাইছে৷ অৰ্থনীতি ডুবন্ত অৱস্থাৰ মাজতো পাকিস্তানে বাহাল ৰাখিছে ভাৰতীয় প্ৰতিৰক্ষা বিভাগৰ কৰ্মীক হানিট্ৰেপ কৰাৰ বাবে ISIৰ দ্বাৰা পৰিচালিত এক বিশেষ বিভাগ৷ সেই নিৰ্দিষ্ট বিভাগটোৰ বাবে বাৰ্ষিক ৩৫০০ কোটি টকা মুকলাই দিয়ে দুখীয় দেশখনে৷
সংবাদমাধ্যমৰ প্ৰতিবেদন অনুসৰি কেৱল হানিট্ৰেপৰ প্ৰশিক্ষণ দিয়াৰ বাবে এখন বিশ্ববিদ্যালয়ো খুলিছে ৰাওৱালপিণ্ডিৰ সেনা সদৰ দপ্তৰে৷ পাকিস্তানৰ স্থানীয় কলেজসমূহৰ পৰা বাচি বাচি ৯০০ গৰাকী সুন্দৰী তৰুণীক নিয়োগ কৰা হৈছে সেই বিশ্ববিদ্যালয়ত৷ তাতেই ভাৰতীয় সেনা বিষয়াসকলক যৌনতাৰ ফান্দত কেনেকৈ পেলাব তাৰ প্ৰশিক্ষণ দি থকা হৈছে সুন্দৰী তৰুণীসকলক৷ পাক সেনাৰ এটা বিশেষ ইউনিট ৪১২ য়ে সিন্ধ প্ৰদেশৰ হায়দৰাবাদৰ পৰা চলাই আছে হানিট্ৰেপিঙৰ কাম৷ কিন্তু কেনেকৈ প্ৰশিক্ষণ দিয়া হয় তৰুণীসকলক?
প্ৰতিবেদনত প্ৰকাশ পোৱা অনুসৰি প্ৰথমে সেই পাক তৰুণীসকলক নাম সলনি কৰি পূজা, মুছকান, হৰলিন, ববিতা ইত্যাদি ৰখা হয়৷ ইয়াৰ পাছতেই চলে যৌনতাৰ ফান্দত পেলোৱা প্ৰশিক্ষণ৷ পাঞ্জাৱী, ৰাজস্থানী, হিন্দি আৰু কেইবাটাও ভাষা শিকোৱা হয় তেওঁলোকক৷ কেৱল সেয়াই নহয় তেওঁলোকৰ চালচলন, আচাৰ ব্যৱহাৰ, পোছাক পিন্ধাৰ ধৰণ সকলোবোৰ সলনি কৰোৱা হয়৷ এনেকৈ প্ৰশিক্ষণ দিয়া হয় যে পাক গুপ্তচৰ বুলি জানিব পৰাৰ বিন্দুমাত্ৰও উপায় নাথাকে৷
মিছন চলোৱাৰ বাবে কলেজৰ ছাত্ৰীসকলৰ ওপৰিও স্থানীয় যৌনকৰ্মী আৰু দুখীয়া মহিলাসকলক কামত লগোৱা হয়৷ তেওঁলোকক পাকিস্তান ইণ্টেলিজেন্স অপাৰেটিভে প্ৰশিক্ষণ দিয়ে৷ পাক সেনাৰ কেপ্টেইন পদমৰ্যাদাৰ অধিকাৰীসকলে মহিলাসকলক প্ৰশিক্ষণ দিয়ে৷ পাক সেনাৰ এই মহিলাসকলৰ বিভিন্ন নামেৰে পৰিচয়পত্ৰ তৈয়াৰ কৰি দিয়া হয়৷ যাৰ জৰিয়তে বাধাহীনভাৱে তেওঁলোকে ভিছা উলিয়াই ভাৰতত প্ৰৱেশ কৰে৷ ভাৰতলৈ নাহিলেও বিভিন্ন হোটেল বুক কৰি হোটেলৰ পৰাই চিকাৰ ধৰাৰ বাবে জাল মেলি দিয়ে৷ হোটেল একোখনক ঘৰৰ দৰে দেখুৱাই বিভিন্ন নামী দামী ভাৰতীয় অফিচাৰক টাৰ্গেট কৰে৷
যদি ভিডিঅ’ কলৰ মাধ্যমেৰে ফান্দ পতা হয় তেন্তে সেই ঘৰত হিন্দু দেৱ দেৱীৰ ছবি দি এনেকৈ সজোৱা হয় যে তেওঁলোকক অহিন্দু বুলি কবলৈ কোনো পথেই বিচাৰি পোৱা নাযায়৷ তেনেকৈ প্ৰথমে বন্ধুত্ব গঢ়ে৷ নিজকে ভাৰতীয় তৰুণী বা মহিলা বুলি পৰিচয় দিয়ে৷ তাৰপিছতেই ঘনিষ্ঠ কথোপকথন৷ শেষত নগ্ন ছবি বা ভিডিঅ’ বিচাৰি জালত পেলায়৷ আৰু সেই ভিডিঅ’ চেভ কৰি ৰাখি ব্লেকমেইল কৰে৷ দেশ সম্পৰ্কীয় যাৱতীয় তথ্য বিচাৰি ব্লেকমেইল কৰে৷ ভয় ভাবুকি দি ধনো সৰকাই৷
২০২৩ চনৰ মে মাহত গুপ্তচৰবৃত্তিৰ অভিযোগত গ্ৰেপ্তাৰ কৰা হৈছিল ডিফেন্স ৰিচাৰ্ছ এণ্ড ডেভেলপমেণ্ট অৰ্গেনাইজেছনৰ বিজ্ঞানী প্ৰদীপ কুৰুলকৰক৷ তেওঁৰ বিৰুদ্ধে অভিযোগ যে হানিট্ৰেপৰ ফান্দত পৰি দেশৰ প্ৰতিৰক্ষা সংক্ৰান্তিয় অত্যন্ত গুৰুত্বপূৰ্ণ আৰু সংবেদনশীল কিছু তথ্য পাক গুপ্তচৰ সংস্থাৰ এগৰাকী মহিলা কৰ্মীক দিছিল৷ তদন্তত নামি মহাৰাষ্ট্ৰৰ সন্ত্ৰাস দমন শাখাই জনাই যে সেই মহিলাৰ সৈতে দেখা কৰি ব্ৰহ্মছ ক্ষেপণাস্ত্ৰ সংক্ৰান্তিয় গোপন তথ্য দেখোৱাব বুলি জনাইছিল সেই বিজ্ঞানীয়ে৷
উল্লেখ কৰা প্ৰয়োজন যে হানিট্ৰেপৰ ফান্দত ভৰি দিলেও ভাৰতীয় বিষয়াসকলৰ বেছিভাগে এই ফান্দ ধৰিব পাৰে৷ যাৰ বাবে প্ৰতিনিয়ত চেষ্টা কৰিও ব্যৰ্থ হৈছে পাক গুপ্তচৰ সংস্থা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
