যৌন মিলনৰ সন্মতিৰ বয়স ১৮ ৰ পৰা কমাই ১৬ কৰা হওক, এই আবেদন জমা হৈছে ছুপ্ৰিম কৰ্টত৷ পকছো আইনৰ এই সংক্ৰান্তিয় নিয়মক লৈ আপত্তিও তুলিছে বহুজনে৷ ছিনিয়ৰ অধিবক্তা ইন্দিৰা জয়সিংহই বৃহস্পতিবাৰে শীৰ্ষ আদালতত এই বিষয়ে তেওঁৰ আবেদন লিখিত আকাৰে জমা দিছে৷ ইন্দিৰাৰ বক্তব্য, পকছো আইনত ১৬ৰ পৰা ১৮ বছৰ বয়সীয়াৰ মাজত যৌন কাৰ্যকলাপক অপৰাধৰ পৰ্যায়ত ধৰা হয়৷ সেয়া উচিত নহয়৷ ইয়াত কিশোৰ কিশোৰীৰ সাংবিধানিক অধিকাৰ লঙ্ঘিত হয়৷
১৬ ৰ পৰা ১৮ বছৰ বয়সীয়াৰ মাজত সন্মতিসূচক প্ৰেমৰ সম্পৰ্কৰ অধিকাৰৰ বাবে যুঁজ দিছে ইন্দিৰাই৷ তেওঁ জনাইছে যে কিশোৰ বয়সৰ প্ৰেমক ধৰ্ষণৰ পৰ্যায়লৈ আইনেই লৈ গৈছে৷ এয়া সঠিক নহয়৷ কৈশোৰৰ মানসিক পৰিণতি, সিদ্ধান্ত লোৱাৰ ক্ষমতাক অস্বীকাৰ কৰা হয়৷ তেওঁ কয়, ‘সন্মতিৰ বয়স ১৬ৰ পৰা ১৮ বছৰ বয়সলৈ বঢ়াই দিয়াৰ কোনো যুক্তিসংগত কাৰণ নাই৷’ ৭০ বছৰ ধৰি সন্মতিৰ বয়স আছিল ১৬, কিন্তু মাজতে সেই বয়স বঢ়াই দিয়া হল৷
ইন্দিৰাই জনাইছে যে ২০১৩ চনৰ ফৌজাদাৰী সংশোধন আইন অহাৰ পূৰ্বলৈকে সন্মতিৰ বয়স আছিল ১৬ বছৰ৷ কিন্তু এই বয়সসীমা কাৰণ অবিহনেই বৃদ্ধি কৰা হৈছে৷ ন্যায়াধীশ বৰ্মা কমিটিৰ সদস্যসকলেও এই বয়সসীমা ১৬ ৰখা হৈছিল বুলি জনাইছে ইন্দিৰাই৷ এই বিষয়ে কিছু বৈজ্ঞানিক আৰু সামাজিক তথ্য পৰিসংখ্যাও তুলি ধৰিছে তেওঁ৷ নেশ্ব্যনেল ফেমিলি হেলথ ছাৰ্ভেৰ তথ্যই কৈছে যে কৈশোৰত যৌন কাৰ্যকলাপ অস্বাভাৱিক নহয়৷ ইন্দিৰাই দিয়া পৰিসংখ্যাই কৈছে যে ২০১৭ চনৰ পৰা ২০২১ চনৰ মাজত পকছো আইনত ১৬ৰ পৰা ১৮ বছৰ বয়সীয়াসকলৰ বিৰুদ্ধে আইনী প্ৰক্ৰিয়া ১৮০ শতাংশ বাঢ়ি গৈছে৷
ইন্দিৰাই কৈছে, বেছিভাগ অভিযোগেই পিতৃ মাতৃসকলে কৰে৷ বেছিভাগ ক্ষেত্ৰতেই সেইসমূহ কন্যৰ ইচ্ছাৰ বিৰুদ্ধ৷ ইয়াত বিভিন্ন জাতি আৰু ধৰ্মৰ মাজত পাৰস্পৰিক সম্পৰ্কৰো নজিৰ আছে৷ ইন্দিৰাৰ মত এই আইনৰ ফলত কিশোৰ কিশোৰীৰ প্ৰেম লুকাই কৰা, পলাই যোৱা আদি সমস্যা বৃদ্ধি পাইছে৷
এই সমস্যাৰ সমাধানৰ বাবে আইনত ব্যতিক্ৰমৰ প্ৰয়োজনীয়তাৰ কথা কৈছে ইন্দিৰাই৷ শীৰ্ষ আদালতত সেই আবেদনেই জনাইছে ইন্দিৰাই৷ তেওঁৰ আবেদন, কিশোৰ কিশোৰীৰ মাজত সন্মতিসূচক প্ৰেমক পকছোৰ পৰা অব্যাহতি দিয়া হওক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
