পি এম কিষাণ যোজনাৰ ২৩ নম্বৰ কিস্তিৰ বাবে অপেক্ষা কৰি আছে কোটি কোটি কৃষকে। ২০০০ টকা কেতিয়া একাউণ্টলৈ আহিব পাৰে, সেই কিস্তিৰ সুবিধা কোনে পাব আৰু কোনবোৰ কাম প্ৰথমে সম্পূৰ্ণ কৰাটো গুৰুত্বপূৰ্ণ জানি লওক।
দেশৰ কোটি কোটি কৃষকে আগ্ৰহেৰে অপেক্ষা কৰি আছে প্ৰধানমন্ত্ৰী কিষাণ সন্মান নিধি (PM-Kisan) ৰ ২৩ সংখ্যক কিস্তিৰ বাবে। এই আঁচনিৰ জৰিয়তে চৰকাৰে কৃষকক আৰ্থিক সাহায্য প্ৰদান কৰে। ২০০০ টকাকৈ টকা তিনিটা কিস্তিত পোনপটীয়াকৈ কৃষকৰ বেংক একাউণ্টলৈ প্ৰেৰণ কৰা হয়। যোৱা মাৰ্চ মাহত কৃষকৰ একাউণ্টত জমা হৈছিল ২২ সংখ্যক কিস্তি। দেশৰ কোটি কোটি কৃষকে এতিয়া পৰৱৰ্তী কিস্তিৰ বাবে অপেক্ষা কৰাটো স্বাভাৱিক।
২৩ সংখ্যক কিস্তি কেতিয়া পৰিশোধ কৰা হ’ব সেই সন্দৰ্ভত এতিয়ালৈকে কোনো আনুষ্ঠানিক ঘোষণা কৰা হোৱা নাই। কিন্তু সাধাৰণতে পি এম-কিছান আঁচনিৰ প্ৰতিটো কিস্তি প্ৰায় ৪ মাহৰ ব্যৱধানত পৰিশোধ কৰা হয়। সেই অনুসৰি মাৰ্চ মাহত ২২ সংখ্যক কিস্তি লাভ কৰাৰ পিছত জুন মাহত চাৰি মাহৰ সময়সীমা সম্পূৰ্ণ হৈছে। সেয়ে জুলাই মাহৰ মাজভাগলৈকে কৃষকৰ একাউণ্টলৈ ২৩তম কিস্তিৰ ২০০০ টকা চৰকাৰে প্ৰেৰণ কৰিব পাৰিব বুলি ধাৰণা কৰা হৈছে।
অৱশ্যে এই কিস্তিৰ সুবিধা কেৱল সেইসকল কৃষকেহে পাব যিসকলে চৰকাৰে নিৰ্ধাৰণ কৰা বাধ্যতামূলক চৰ্তসমূহ পূৰণ কৰিছে। ২৩ তম কিস্তি পাবলৈ বেংক একাউণ্টৰ e-KYC সম্পূৰ্ণ কৰি ভূমি পৰীক্ষণ (Land Seeding/Land Verification) সম্পন্ন কৰাটো অতি প্ৰয়োজনীয়।
যিসকল কৃষকে এতিয়াও এই দুটা প্ৰক্ৰিয়া সম্পূৰ্ণ কৰা নাই বা যাৰ বেংক একাউণ্ট আধাৰ আৰু ডিবিটি (ডাইৰেক্ট বেনিফিট ট্ৰেন্সফাৰ)ৰ সৈতে জড়িত নহয়, তেওঁলোকে এই ২০০০ টকাৰ কিস্তিৰ পৰা বঞ্চিত হ’ব পাৰে। সেয়ে সকলো হিতাধিকাৰীকে সময়মতে পি এম-কিছান পৰ্টেলত গৈ নিজৰ স্থিতি পৰীক্ষা কৰিবলৈ পৰামৰ্শ দিয়া হৈছে।
শীঘ্ৰে কৃষকসকলে পিএম-কিছানৰ অফিচিয়েল ৱেবছাইটত গৈ স্মাৰ্টফোনৰ জৰিয়তে ঘৰতে বহি ই-কেৱাইচি সম্পূৰ্ণ কৰিব পাৰিব। প্ৰক্ৰিয়াটো এনেধৰণৰ— পি এম-কিছানৰ অফিচিয়েল ৱেবছাইটলৈ যাওক। হোমপেজত থকা Farmer Corner অংশত ক্লিক কৰক। তাত e-KYC বিকল্পটো নিৰ্বাচন কৰক। আপোনাৰ আধাৰ নম্বৰ লিখক। আধাৰৰ সৈতে সংযুক্ত মোবাইল নম্বৰত এটা অ’টিপি আহিব। নিৰ্দিষ্ট স্থানত অ’টিপি প্ৰৱেশ কৰাৰ পিছত ই-কেৱাইচি প্ৰক্ৰিয়া সম্পূৰ্ণ হ’ব।
(এই প্ৰতিবেদন যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
