অসম লাইভ২৪ঃ কৰ্ণাটকত নিৰ্বাচনী প্ৰচাৰলৈ গৈ মোদীয়ে এইবাৰ প্ৰচাৰৰ নতুন কৌশল হিচাপে লৈছে ‘দ্যা কেৰালা ষ্টৰী’ক। তেওঁ কয় যে এই ছবিক নিষিদ্ধ কৰাৰ কথা কৈ কংগ্ৰেছে সন্ত্ৰাসবাদকেই প্ৰশ্ৰয় দিছে। শুকুৰবাৰে কৰ্ণাটকৰ বেলাৰিত বিজেপিৰ নিৰ্বাচনী প্ৰচাৰ সভাত উপস্থিত হৈ এই মন্তব্য কৰিছে প্ৰধানমন্ত্ৰী মোদীয়ে। তেওঁ সভাত কয়, ‘বন্দুক বোমাৰ শব্দ শুনা যায়। কিন্তু সন্ত্ৰাসবাদীৰ ষড়যন্ত্ৰই নিঃশব্দে সমগ্ৰ সমাজখনকেই ভিতৰে ভিতৰে কঁপাই থাকে। কেৱল আমিয়েই এই কথা কোৱা নাই। এই বিষয়ক লৈ উদ্বেগ প্ৰকাশ কৰিছে আদালতেও। বৰ্তমান দেশজুৰি কেৰালা ষ্টৰীক লৈ আলোচনা হৈ আছে। সেই ছবিত জঙ্গি ষড়যন্ত্ৰ আৰু কাৰ্যকলাপো তুলি ধৰা হৈছে।’ ইয়াৰপাছতেই মোদীয়ে কয়, ‘এই বিষয়ক লৈ চিনেমা নিৰ্মাণ কৰাটো ভাল হৈছে কিন্তু ইয়াৰ বিৰোধিতা কৰি ছবিখন নিষিদ্ধ কৰাৰ দাবী উত্থাপন কৰা মানে সন্ত্ৰাসবাদকেই সমৰ্থন কৰা বুজায়। যিটো কংগ্ৰেছ দলে কৰি আছে।’
উল্লেখ্য যে আজি অৰ্থাৎ শুকুৰবাৰে মুক্তিলাভ কৰিছে ‘দ্যা কেৰালা ষ্টৰী’য়ে। ছবিৰ ট্ৰেলাৰ মুক্তিৰ পাছতেই বিতৰ্ক আৰম্ভ হৈছিল। সৰহসংখ্যকৰেই অভিযোগ আছিল, ছবিখনত দেখুওৱা সন্ত্ৰাসবাদ একেবাৰেই মিছা। ৩২ হাজাৰ মহিলা নিখোজ হোৱাৰ খবৰো মিছা। ট্ৰেলাৰত কোৱা হৈছে যে ৩২ হাজাৰ মহিলা নিখোজ হৈ গৈছিল আৰু পৰবৰ্তী সময়ত তেওঁলোকে আইচিছত যোগদান কৰিছে। ছবিৰ মাধ্যমেৰে সংঘই কেৰালাৰ ধৰ্ম নিৰপক্ষ পৰিবেশ নষ্ট কৰাৰ চেষ্টা কৰা বুলিও অভিযোগ আনিছিল কেৰালাৰ মুখ্যমন্ত্ৰী পিনাৰাই বিজয়নে। তাতেই কেৰালা চৰকাৰ আৰু কংগ্ৰেছ দলে ছবিখন কেৰালাত নিষিদ্ধ কৰাৰো দাবী তুলিছিল। ছবি নিৰ্মাতাৰ বিৰুদ্ধে সৰৱ হৈছিল কংগ্ৰেছ নেতা শশী থাৰুৰো। শশী থাৰুৰৰ মতেও ছবিখনত ভুলকৈ বাস্তৱক তুলি ধৰা হৈছে। ইয়াৰোপৰি ছবিখনক বাকস্বাধীনতাৰ অপপ্ৰয়োগ ঘটাৰ কথাও প্ৰকাশ কৰিছে থাৰুৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ