অসম লাইভ২৪ঃ ৰাম মন্দিৰ উদ্বোধনৰ পূৰ্বে ‘তপস্যা’ আৰম্ভ কৰিছে প্ৰধানমন্ত্ৰী মোদীয়ে। আগন্তুক ১১ দিন আধ্যাত্মিক চেতনাৰ উন্মেষ ঘটাবলৈ ঋষি-মুনিসকলৰ পথ অনুসৰণ কৰিছে মোদীয়ে। পালন কৰিব একাধিক কঠোৰ নিয়মো। আগন্তুক ১১ দিনত কি কি কৰিব মোদীয়ে?
সূত্ৰৰ খবৰ অনুসৰি আগন্তুক ১১ দিন মাটিত শুব প্রধানমন্ত্ৰীগৰাকী। কাহিলী পুৱাতে উঠি ভগৱানৰ চৰণত প্ৰাৰ্থনা কৰিব। দিনৰ মধ্যবেলা জপ কৰিব। ধ্যানো কৰিব। মন শান্ত ৰাখিবৰ বাবে শৰীৰচৰ্চা কৰিব। দিনৰ বেছিভাগ সময়েই মৌনব্ৰত পালন কৰিব নৰেন্দ্ৰ মোদীয়ে। খাদ্যতালিকাতো আছে বিশেষ কিছু খাদ্য। খুব কম পৰিমাণে খাদ্য খাব মোদীয়ে। যি খাদ্যই খাব একেবাৰে সাত্ত্বিক আহাৰ হ’ব। ধৰ্মীয় পুথি পঢ়িব, ঘৰ চফা কৰা আদি নিজৰ সমস্ত ৰাম নিজেই কৰিব মোদীয়ে। হিন্দু ধৰ্মৰ ৰীতি অনুসৰি প্ৰধানমন্ত্ৰী মোদীয়ে ৰামমন্দিৰত ৰামলালৰ প্ৰাণ প্ৰতিষ্ঠা নকৰালৈকে এই সমূহ নিয়ম মানি চলিব। ভগৱানৰ সান্নিধ্য পাবৰ বাবে আগন্তুক ১১ দিন দেশৰ একাধিক ধৰ্মীয় স্থান ভ্ৰমণ কৰিব মোদীয়ে।
শুকুৰবাৰৰ পৰাই প্রধানমন্ত্ৰীয়ে ১১ দিনীয়া কাৰ্যসূচীৰ শুভাৰম্ভ কৰিছে। অনুষ্ঠানৰ আৰম্ভণিতে মোদী উপস্থিত হৈছে নাচিকৰ শ্ৰী কলাৰাম মন্দিৰত। গোদাবৰী নদীৰ তীৰত অৱস্থিত পঞ্চবটী মন্দিৰ প্ৰাংগনৰ পৰা আৰম্ভ হৈছে অনুষ্ঠান। ভগৱান ৰামৰ ভক্তসকলৰ বাবে এই মন্দিৰৰ গুৰুত্ব অপৰিসীম। মন্দিৰৰ ভিতৰত মোদীক ভজনৰ অনুষ্ঠানত অংশ লোৱাও দেখা গৈছে। ৰামায়নৰ অজানা গাথা এই ভজনত গোৱা হয়। ৰামায়ণৰ যুদ্ধকাণ্ড পাঠো শুনিছে মোদীয়ে। প্রধানমন্ত্ৰী মনোযোগেৰে শুনিছে অযোধ্যালৈ ৰাম উভতি অহাৰ কাহিনী।
মোদীৰ ১১ দিনীয়া ব্ৰতক লৈ মহন্ত নাভাল কিশোৰে কৈছে, ‘এই কৰ্মসূচী পালনৰ বাবে সম্ভৱ হ’লে মাটিত শুব লাগে। সূৰ্যাস্তৰ পূৰ্বে টোপনিৰ পৰা উঠি গা ধুব লাগে। দিনৰ বেছিভাগ সময়েই জপ কৰিব লাগে। ভগৱান ৰামৰ ছবিৰ সন্মুখত এটা প্ৰদীপ জ্বলাই ৰাখি পুজা অৰ্চনাও কৰিব লাগে। এই সময়ত স্বল্পাহাৰ কৰা উচিত। মূলত ফলাহাৰ কৰিলেই শুভ। দিনৰ বেছিভাগ সময়েই মৌনব্ৰত ৰখাটো ভাল। ভগবানৰ প্ৰতি নিজকে অৰ্পণ কৰিব কৰি আত্মাক শুদ্ধি কৰিব লাগে। ভগবান ৰামৰ প্রাণ প্ৰতিষ্ঠাৰ পূৰ্বে এই নিয়ম মোদীয়েও পালন কৰিব লাগিব।’
স্বামী দীপাংকৰেও এই সন্দৰ্ভত কয়, ‘এই ধৰণৰ পবিত্ৰ উৎসৱত চামিল হ’বৰ বাবে বহুতেই মৌনব্ৰত লয়। ভগৱান ৰামৰ জপো কৰে। ইয়াৰোপৰি জপ কৰা নিৰ্দিষ্ট আসনত বহা আৰু শুৱাৰ অভ্যাস গঢ়ি তোলা উচিত। এই ১১ দিন চুলি, দাঢ়ি, নখো কাটিব নালাগে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
