প্ৰধানমন্ত্ৰী নৰেন্দ্ৰ মোদীৰ মন্তব্যৰ পিছত হঠাৎ সামাজিক মাধ্যমত চৰ্চিত হৈ পৰিছে বিয়াৰ কথা! বহুতে ভাবিছে, বিয়া কেতিয়া পাতিব! দেওবাৰে তেলেংগানাত ৰাজহুৱা সভাত ভাষণ দি প্ৰধানমন্ত্ৰী মোদীয়ে নাগৰিকসকলক এবছৰৰ বাবে সোণ ক্ৰয়ৰ পৰা বিৰত থাকিবলৈ আহ্বান জনায়। কেৱল সেয়াই নহয়, পেট্ৰ’ল আৰু ডিজেলৰ বিবেচনাপূৰ্ণ ব্যৱহাৰৰ বাবেও আহ্বান জনায়। তেওঁ উল্লেখ কৰে যে, বিশ্বজুৰি চলি থকা যুদ্ধই ভাৰতকে ধৰি বহু দেশত প্ৰভাৱ পেলাইছে। যুদ্ধৰ ফলত পেট্ৰ’ল আৰু সাৰৰ দাম যথেষ্ট বৃদ্ধি পাইছে, আৰু যোগান শৃংখলৰ ওপৰত হেঁচা পৰিছে। প্ৰধানমন্ত্ৰীয়ে উল্লেখ কৰে যে কেন্দ্ৰীয় চৰকাৰে এই কষ্টৰ পৰা মানুহক ৰক্ষা কৰিবলৈ কাম কৰি আছে। তেওঁ নাগৰিকসকলক দায়িত্ব পালন আৰু সম্পদসমূহ ৰাষ্ট্ৰীয় স্বাৰ্থত বুদ্ধিমানৰূপে ব্যৱহাৰ কৰিবলৈ আহ্বান জনায়। জানি লওক প্ৰধানমন্ত্ৰী মোডীৰ ভাষণৰ মূল কথা।
এবছৰ সোণ কিনিব নালাগে
সোণৰ আমদানিত হোৱা উল্লেখযোগ্য বৈদেশিক মুদ্ৰা ব্যয়ৰ উদ্ধৃতি দি প্ৰধানমন্ত্ৰী মোদীয়ে জনসাধাৰণক এবছৰলৈ সোণৰ গহনা ক্ৰয় কৰাৰ পৰা বিৰত থাকিবলৈ আহ্বান জনায়। তেওঁ কয়, সৰু সৰু ত্যাগেও দেশৰ অৰ্থনীতি শক্তিশালী কৰিব পাৰে।
ৰে’লযোগে সামগ্ৰী প্ৰেৰণ কৰক
মোদীয়ে কয় যে যদি আমি ক’ৰবালৈ সামগ্ৰী পঠিয়াব লাগে, তেন্তে আমি ৰে’ল সেৱা যিমান পাৰো ব্যৱহাৰ কৰিবলৈ চেষ্টা কৰা উচিত, যাতে, বৈদ্যুতিক ৰে’লৱেৰ বাবে পেট্ৰ’ল-ডিজেলৰ প্ৰয়োজন নহয়। যিসকলে পাৰে ইলেক্ট্ৰিক বাহন ব্যৱহাৰ কৰিব পাৰে।
Work From Home কৰক
ক’ভিড-১৯ মহামাৰীৰ সময়ত আমি ঘৰৰ পৰা কাম, অনলাইন মিটিং, ভিডিঅ’ কনফাৰেন্স আদি বহুতো ব্যৱস্থা বিকশিত কৰিলোঁ, আৰু সেইবোৰৰ লগত আমি অভ্যস্ত হৈ পৰিলোঁ। আজিৰ সময়ৰ দাবী এনেকুৱা যে এই ব্যৱস্থাসমূহ পুনৰ আৰম্ভ কৰাটো ৰাষ্ট্ৰীয় স্বাৰ্থত হ’ব। আমি ঘৰৰ পৰা কাম, অনলাইন কনফাৰেন্স, আৰু ভাৰ্চুৱেল মিটিংক পুনৰ অগ্ৰাধিকাৰ দিব লাগিব। বন্ধুসকল, আজিৰ সংকটত আমি বৈদেশিক মুদ্ৰা সঞ্চয়ৰ ওপৰতো প্ৰবল গুৰুত্ব দিব লাগিব। যিহেতু বিশ্বজুৰি পেট্ৰ’ল-ডিজেল মূল্যবান হৈ পৰিছে, সেয়েহে আগৰ তুলনাত বহুগুণ বেছি মূল্য বৃদ্ধি পাইছে।
এই যুদ্ধই সমগ্ৰ বিশ্বকে প্ৰভাৱিত কৰিছে
প্ৰধানমন্ত্ৰী মোদীয়ে উল্লেখ কৰে যে, বিশ্ব যুদ্ধ আৰু উত্তেজনাৰ প্ৰভাৱ সমগ্ৰ বিশ্ব অৰ্থনীতিত অনুভৱ কৰা হৈছে। পেট্ৰ’ল আৰু সাৰৰ মূল্য বৃদ্ধি ইয়াৰ এক প্ৰধান উদাহৰণ। তেওঁ লগতে কয় যে, যোগান শৃংখলৰ ওপৰত বৰ্ধিত হেঁচাত বহু দেশ অসুবিধাৰ সন্মুখীন হৈছে। ভাৰতো এই প্ৰত্যাহ্বানসমূহৰ পৰা সম্পূৰ্ণ অস্পৃশ্য নহয়। অৱশ্যে পৰিস্থিতি পৰিচালনাৰ বাবে চৰকাৰে অহৰহ প্ৰচেষ্টা অব্যাহত ৰাখিছে।
পেট্ৰল আৰু ডিজেল ৰাহি কৰিবলৈ আহ্বান
প্ৰধানমন্ত্ৰীয়ে প্ৰয়োজন সাপেক্ষেহে পেট্ৰ’ল-ডিজেল ব্যৱহাৰ কৰিবলৈ পৰামৰ্শ দিয়ে। তেওঁ কয় যে জাতিটোৰ কল্যাণৰ বাবে শক্তি সংৰক্ষণ অতি প্ৰয়োজনীয়। বিবেচনাপূৰ্ণভাৱে ইন্ধন ব্যৱহাৰ কৰিলে দেশৰ ওপৰত অৰ্থনৈতিক চাপ হ্ৰাস পাব পাৰে। তেওঁ ইয়াক এক বৃহৎ ৰাষ্ট্ৰীয় সংকল্প হিচাপে গ্ৰহণ কৰিবলৈ আহ্বান জনায়।
দেশক প্ৰত্যাহ্বানৰ পৰা উলিয়াই অনাত গুৰুত্ব
মোদীয়ে কয় যে, বিশ্ব সংকটৰ সময়ত প্ৰতিজন নাগৰিকৰ দায়িত্ব বাঢ়ি যায়। ৰাইজক সকাহ দিয়াৰ বাবে চৰকাৰে নিৰন্তৰ পদক্ষেপ গ্ৰহণ কৰি আছে বুলিও তেওঁ কয়। অৱশ্যে নাগৰিকসকলেও সহযোগ কৰিব লাগিব। তেওঁ কয় যে যেতিয়া বিশ্বই কঠিন সময়ৰ মাজেৰে পাৰ হৈ যায় তেতিয়া দেশক প্ৰথম স্থান দিয়াটো গুৰুত্বপূৰ্ণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
