পুৱাই প্ৰচণ্ড ভূমিকম্পৰ জোকাৰণি। এটা ঘন্টাৰ ভিতৰতে তিনি বাৰকৈ ভয়ংকৰ ভুমিকম্পৰ জোকাৰণি। সোমবাৰে দক্ষিণ ফিলিপাইনছৰ মিন্দানাওৰ উপকূলত ৭.৮ ৰিখটাৰৰ স্কেলৰ প্ৰাৱল্যৰ এক শক্তিশালী ভূমিকম্প। ভূ-পৃষ্ঠৰ পৰা মাত্ৰ ১০ কিলোমিটাৰ তলত আছিল এই ভয়ংকৰ অভিকেন্দ্ৰ। ভূমিকম্পৰ ফলত ফিলিপাইনছ, ইণ্ডোনেছিয়াকে ধৰি আন্তঃৰাষ্ট্ৰীয় নিৰীক্ষণ সংস্থাসমূহে ছুনামীৰ সতৰ্কবাণী জাৰি কৰিছে।
আমেৰিকা আৰু প্ৰশান্ত মহাসাগৰীয় ছুনামী সতৰ্কবাণী কেন্দ্ৰৰ লগতে স্থানীয় সংস্থাসমূহে এক মিটাৰতকৈও অধিক উচ্চতাৰ ঢৌ আৰু উপকূলীয় অঞ্চলসমূহৰ ব্যাপক ক্ষতিৰ সতৰ্কবাণী দিছে, যিটো কেইবা ঘণ্টা ধৰি চলি থাকিব পাৰে।
ফিলিপাইনছত ফিলিপাইনছ ইনষ্টিটিউট অৱ ভলকেন’লজী এণ্ড ছিজম’লজি (ফিভলক্স)-এ ভূমিকম্পৰ সম্ভাৱ্য ক্ষতি আৰু এক মিটাৰতকৈ অধিক উচ্চতাৰ ছুনামী ঢৌৰ সতৰ্কবাণী দিছিল। এই ভুমিকম্পত তাচপাতৰ দৰে খহিছে অট্টালিকা। বহু অট্টালিকাত ফাঁট মেলাৰ লগতে কেইবাটাও ঘৰ ভাঙি পৰাৰ খবৰ পোৱা গৈছে। আনহাতে শ শ লোকৰ মাজত সৃষ্টি হৈছে হাহাকাৰ পৰিস্থিতিৰ।
ৰাষ্ট্ৰীয় বতৰ সংস্থাটোৱে এক্সত প্ৰকাশ কৰা অনুসৰি ইণ্ডোনেছিয়াই বোৰ্নিও দ্বীপৰ কালিমন্তান আৰু চুলাৱেছিৰ কিছু অংশকে ধৰি কেইবাটাও অঞ্চলৰ বাবে ছুনামীৰ সতৰ্কবাণী জাৰি কৰিছে আৰু তিনি মিটাৰ পৰ্যন্ত ঢৌৰ সম্ভাৱনা আছে।
(এই প্ৰতিবেদন যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
