জনপ্ৰিয় ভোটকুশলী হিচাপে তেওঁ দেশৰ চিনাকি নাম৷ নাম ক’লেই চিনি পায় দেশৰ প্ৰথম শাৰীৰ ৰাজনৈতিক নেতাসকলেও৷ বহু দলক নিজৰ কৌশল দি তেওঁ অনায়াসে ভোটযুদ্ধত জিকাই আনিছে৷ সেই প্ৰশান্ত কিশোৰেই এতিয়া নিজৰ দল গঢ়ি ৰাজনৈতিক যুদ্ধত নামিছে৷
সন্মুখত বিহাৰৰ নিৰ্বাচন৷ তাতেই ভোটযুদ্ধত নামিব প্ৰশান্ত কিশোৰৰ দল৷ হঠাৎ তেওঁৰ এক বিতৰ্কিত মন্তব্যইয়ো সংবাদ শিৰোনাম দখল কৰিছে৷ তেওঁ জনাইছে, কোনো ৰাজনৈতিক দলৰ হৈ ভোটকুশলীৰ কাম কৰাৰ বাবে তেওঁৰ ফিজ প্ৰায় ১০০ কোটি টকা৷ তেওঁৰ দাবী, দেশৰ ১০খন ৰাজ্যত এই মুহূৰ্তত যি চৰকাৰ চলিছে সেয়া প্ৰকৃততে তেঁও তৈয়াৰ কৰি দিয়া কৌশলৰহে ফলশ্ৰুতি৷
আগন্তুক ১৩ নৱেম্বৰত বিহাৰৰ চাৰি বিধানসভা কেন্দ্ৰত হ’ব উপনিৰ্বাচন৷ তাতেই যুঁজ দিব প্ৰশান্ত কিশোৰৰ দল৷ পাছৰ বছৰ বিহাৰৰ বিধানসভা নিৰ্বাচন তেওঁৰ টাৰ্গেট৷ বেলাগঞ্জত এক জনসভাত তেওঁ কয় যে, বহুতেই তেওঁৰ পৰা জানিব বিচাৰে যে দল চলোৱাৰ বাবে তেঁও কৰ পৰা ইমান ধন পাইছে? আৰু সেই প্ৰসংগতেই নিজৰ ভোটকুশলী হিচাপে ইনকামৰ অংক সকলোকে জনাই দিয়ে৷
প্রশান্ত কিশোৰে কয়, ‘আপোনালোকে কি ভাৱে? মোৰ প্ৰচাৰৰ খৰচ কোনে দিছে বুলি ভাৱিছে? আপোনালোকে ভাৱে নেকি যে মই দুৰ্বল? বিহাৰত মোৰ দৰে ফীজ লোৱা মানুহৰ কথা হয়তো শুনা নাই৷ যদি কোনো নিৰ্বাচনত মই পৰামৰ্শ দিব লাগে তেন্তে তাৰবাবে মই ১০০ কোটিকৈ লওঁ৷ কেতিয়াবা বেছিও লওঁ৷ আগন্তুক ২ বছৰত মই মোৰ সকলো প্ৰচাৰৰ খৰচ যাতে চলাব পাৰো তাৰ বাবে এটা নিৰ্বাচনত কোনো এটা দলক পৰামৰ্শ দিলেই প্ৰয়োজনীয় খৰচ ওলাই যায়৷’
উল্লেখ্য যে বিহাৰৰ উপনিৰ্বাচনত ইমামগঞ্জ, বেলাগঞ্জ, ৰামগড় আৰু তাৰাৰি কেন্দ্ৰত নিৰ্বাচন৷ সকলো কেন্দ্ৰতেই প্ৰাৰ্থী দিছে কিশোৰৰ দলে৷ নিৰ্বাচনী ফলাফল প্ৰকাশ পাব আগন্তুক ২৩ নৱেম্বৰত৷ এই মুহূৰ্তত জোৰদাৰ প্ৰচাৰ চলি আছে৷ তাৰমাজতেই প্ৰশান্ত কিশোৰৰ এই মন্তব্যই নতুনকৈ বিতৰ্কৰো সৃষ্টি কৰিছে৷ নিজৰ দলক তুলি ধৰিবলৈ গৈ তেওঁ বাকীসকলক মাটিত পেলাই দিয়া বুলিও একাংশই মন্তব্য কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
