২০০৮ চনৰ ভয়াৱহ চুনামীয়ে দক্ষিণ আৰু দক্ষিণ-পূৱ এছিয়াৰ কেইবাখনো দেশ ধ্বংস কৰি পেলাইছিল৷ ২৬ ডিচেম্বৰ স্থানীয় সময় পুৱা ৭ বাজি ৫৯ মিনিটত ইন্দোনেছিয়াৰ সুমাত্ৰা দ্বীপৰ উপকূলত ৯.১ মাত্ৰাৰ এক ভূমিকম্পই সমুদ্ৰতলত আঘাত কৰে৷ পৰবৰ্তী সাত ঘণ্টাৰ ভিতৰত ভূমিকম্পৰ ফলত সৃষ্টি হোৱা চুনামীয়ে ভাৰত মহাসাগৰ ওফন্দাই তোলে৷ সেই অভিভাতত কঁপি উঠিছিল পূৰ্ব আফ্ৰিকা পৰ্যন্ত উপকূলীয় অঞ্চলসমূহ৷
সেই প্ৰাকৃতিক দুৰ্যোগত ১৫খন দেশৰ আনুমানিক ২ লাখ ২৮ হাজাৰ লোকে প্ৰাণ হেৰুৱাইছিল৷ সকলোতকৈ বেছি ক্ষতিগ্ৰস্থ দেশসমূহৰ মাজত ইন্দোনেছিয়া, শ্ৰীলংকা, ভাৰত, মলদ্বীপ আৰু থাইলেণ্ড আছিল অন্যতম৷ অতীতৰ সেই ভয়াৱহ স্মৃতি আকৌ উভতি আহিব পাৰে জাপানত৷ চলিত বছৰৰ জুলাই মাহতেই ঘটিব পাৰে এনে ঘটনা৷ এই ভৱিষ্যদ্বাণী কৰিছে এগৰাকী জাপানী ব্যক্তিয়ে৷ এই অদ্ভুত ভৱিষ্যদ্বাণীয়ে জাপানসহ সমগ্ৰ বিশ্বত আলোড়নো সৃষ্টি কৰিছে৷
হংকঙৰ এক ভ্ৰমণ সংস্থাই সংবাদমাধ্যমক জনাইছে যে বসন্তকালত জাপানত চেৰিফুলৰ সমাহাৰ চাবলৈ বিশ্বৰ পৰা পৰ্যটক আহে৷ সেই বুকিঙো কমি গৈছে ৫০শতাংশ পৰ্যন্ত৷ আগন্তুক বিপৰ্যয়ৰ সম্ভাৱনাক লৈ কোনোৱে জীৱনটোক বিপদত পেলাব খোজা নাই৷ বহু ভ্ৰমণকাৰীয়ে পূৰ্বে কৰি থোৱা টিকটো কেনছেল কৰিছে৷ সংবাদ মাধ্যম দ্যা গাৰ্ডিয়ানে জনাইছে যে জাপানী চেৰিফুল চাবলৈ এই সময়ত জাপানৰ হোটেলসমূহ প্ৰায়েই বুকিং হৈ থাকে৷ বিগত বছৰৰ তুলনাত এইবাৰ হোটেল বুকিংৰ হাৰ কমিছে৷ কভিড মহামাৰীৰ পাছত কিছু ঠন ধৰি উঠা ব্যৱসায়সমূহত আকৌ ধাক্কা লাগিছে তাতছুকিৰ ভৱিষ্যদ্বাণীৰ ফলত৷
তাতছুকি তেওঁৰ অতীতৰ ভৱিষ্যদ্বাণীসমূহৰ বাবে পৰিচিত৷ তেওঁ কৰা ভৱিষ্যদ্বাণী প্ৰায়সমূহেই সত্য প্ৰমাণিত হৈছে৷ তেওঁ কেইবাটাও ঘটনাৰ ভৱিষ্যদ্বাণী কৰি গৈছে৷ ২০১১ চনৰ মাৰ্চ মাহত তোহোকুটত ভূমিকম্প আৰু ছুনামী আৰু কভিড মহামাৰী সত্য প্ৰমাণিত হৈছে৷ ২০৩০ চনত কভিডে আৰু মাৰাত্মক ৰূপ ল’ব বুলিও দাবী কৰিছে এই ভৱিষ্যদ্ৰষ্টাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
