অসম লাইভ২৪ঃ
‘এই দেশৰ প্ৰধানমন্ত্ৰী এজন কাপুৰুষ, লগাই দিয়ক মোৰ ওপৰতো দুটা কেছ, লৈ যাওক মোক কাৰাগাৰলৈ। মোৰ শ্বহীদ দেউতাক অপমান কৰিছে, মোৰ দেউতাৰ মৃতদেহ ত্ৰিৰংগাত মেৰিয়াই অনা হৈছিল। সেই পিতৃৰেই সন্তান আমি। শ্বহীদৰ পুত্ৰক আপোনালোকে দেশদ্ৰোহী কয়? আপোনালোকহে একোজন মীৰজাফৰ। গণতন্ত্ৰ কাক কয় আমি জানো। সেয়া আমাৰ তেজত ৰোপন কৰি থোৱা আছে। মোৰ মাতৃক অপমান কৰিছে৷ আমি পিছুৱাই আহিম বুলি নাভাৱিব, আমি আমাৰ আদৰ্শলৈয়েই আগবাঢ়ি যাম৷’
ৰাহুল গান্ধীৰ সাংসদ পদ খাৰিজ হোৱাৰ পিছতেই প্ৰিয়ংকা গান্ধীয়ে দেওবাৰে দিয়া এক মন্তব্যক লৈ চলিছে সমগ্ৰতে চৰ্চা৷ প্ৰিয়ংকা গান্ধীয়ে কৰা মন্তব্যৰ পিছতেই প্ৰিয়ংকাৰ সাহসিকতাক বহুতেই ধন্যবাদো জনাইছে৷ প্ৰিয়ংকাৰ ভিতৰত এনে কি গুণ কি যিয়ে সকলোকে আকৰ্ষিত কৰে?
প্ৰিয়ংকাৰ ভিতৰত আছে এইকেইটা ভাল গুণ
ৰাহুলৰ তুলনাত প্ৰিয়ংকাই সাধাৰণ নাগৰিকক ভাষণেৰে সহজে আকৃষ্ট কৰিব পাৰে৷ ৰাহুল গান্ধীয়ে বহু সময়ত হিন্দীত ভাষণ দিওতে ৰৈ যাবলগীয়া হয়৷ তাৰবিপৰীতে প্ৰিয়ংকাই হিন্দীত প্ৰত্যেকটো কথাই সুন্দৰৰূপত ফুটাই তুলিব পাৰে৷ ভাৰতবৰ্ষত প্ৰায় ৪৮ শতাংশ মহিলা ভোটাৰ আছে৷ মহিলা আৰু যুৱপ্ৰজন্মৰ মাজত প্ৰিয়ংকাৰ ৰাহুলতকৈ বেছি জনপ্ৰিয়তাও আছে৷ ৰাহুলক শাসক দল বিজেপিয়ে পাপ্পু টেগ দিয়াৰ বিপৰীতে প্ৰিয়ংকাক তেনে কোন টেগ দিয়া হোৱা নাই৷ সেয়ে প্ৰিয়ংকাৰ বাঢ়ি অহা জনপ্ৰিয়তাক অন্য নামেৰে সহজে উপলুঙা কৰা এতিয়া সহজ নহয়৷ প্ৰিয়ংকাৰ আৰু এটা বিশেষ গুণ হৈছে প্ৰিয়ংকাই মৰমেৰেও কথাবোৰ বুজাই ক’ব পৰাৰ দৰে সময়ত খঙেৰেও প্ৰত্ত্যুত্তৰ দিব পাৰে৷ প্ৰিয়ংকাই আইতাক ইন্দিৰা গান্ধীৰ জীৱনশৈলীক যেন ভালধৰণেই অনুসৰণ কৰিছিল৷ তাৰেই প্ৰমাণ প্ৰিয়ংকাই কালি দিয়া বিশেষ ভাষণটো৷ বহুসংখ্যকেই এতিয়া প্ৰিয়ংকাৰ মাজত আইতাক ইন্দিৰা গান্ধীৰ প্ৰতিচ্ছবিও দেখা পায়৷
সক্ৰিয় ৰাজনীতিত অচিৰেই আহিব প্ৰিয়ংকা
ৰাহুল গান্ধীৰ কাৰাগাৰ যাত্ৰা হওক বা নহওক কিয় প্ৰিয়ংকাই সক্ৰিয় ৰাজনীতিত অচিৰেই আহিব৷ আগন্তুক নিৰ্বাচনত প্ৰিয়ংকাই নিৰ্বাচন খেলাৰ পূৰ্ণ সম্ভাৱনা আছে৷ প্ৰিয়ংকাই বায়নাড সমষ্টিৰ পৰা নিৰ্বাচনত প্ৰতিদ্বন্দিতা কৰাৰ পূৰ্ণ সম্ভাৱনা আছে৷ ইপিনে যদি ৰাহুলৰ ওপৰত থকা গোচৰসমূহ উঠাই লয় তেন্তে ’২৪ ত ৰাহুলে আমেথি বা ৰায়বৰেলিৰ পৰা নিৰ্বাচন খেলাৰ পূৰ্ণ সম্ভাৱনা আছে৷
সক্ৰিয় ৰাজনীতিত প্ৰিয়ংকাই সন্মুখীন হ’ব পৰা প্ৰতিবন্ধক কি কি?
ভাৰতৰ ৬৫ সংখ্যক ভোটাৰেই ৩৫ বছৰৰ তলৰ৷ পৰিয়ালকেন্দ্ৰীক ৰাজনীতিৰ বিৰুদ্ধে ভাৰতীয় যুৱসমাজে প্ৰায় প্ৰতিসময়তে বিৰোধ কৰি আহিছে৷ তেনেক্ষেত্ৰত প্ৰিয়ংকা অথৱা ৰাহুলে সক্ৰিয় ৰাজনীতিত নিৰ্বাচন জিকাটো সম্ভৱ হ’বনে সেই বিষয়টোক লৈ একাংশ সচেতন ৰাজনীতিবিদেও মন্তব্য কৰিছে৷ বৰ্তমান সময়ত বিজেপি এক শক্তিশালী দল হৈ পৰিছে৷ তেওঁলোকৰ ৰাজনৈতিক ষ্ট্ৰেটেজিও বহুত উন্নত৷ সেয়ে ইমান শক্তিশালী দলৰ বিৰুদ্ধে যুঁজি জয়লাভ কৰাটো সহজ নহয়৷
প্ৰিয়ংকাই শেষ ভৰষা নেকি কংগ্ৰেছৰ?
ৰাহুলৰ তুলনাত বহুতেই অধিক ভৰষা কৰে প্ৰিয়ংকাৰ ওপৰত৷ বিগত তিনি-চাৰি বছৰত যিসকলে কংগ্ৰেছ দল ত্যাগ কৰিছে তেওঁলোকৰ বেছিভাগেই ৰাহুলৰ বিৰুদ্ধে ক্ষোভিত হৈয়ে দল ত্যাগ কৰিছে৷ কিন্তু দলত্যাগ কৰাসকলেও কাহানিও প্ৰিয়ংকাৰ বিৰুদ্ধে বেয়া মন্তব্য কৰা নাই৷ ৰাহুলৰ বাবেই এদিন দলত্যাগ কৰা মুখ্যমন্ত্ৰী হিমন্ত বিশ্ব শৰ্মাইয়ো প্রশংসা কৰে কংগ্ৰেছ নেত্ৰী প্ৰিয়ংকাৰ৷ ইপিনে শেহতীয়াভাৱে হিমাচল প্ৰদেশৰ নিৰ্বাচনী যুঁজত প্ৰিয়ংকাৰ নেতৃত্বতেই কংগ্ৰেছ দলটোৱে জয়ৰ মুখ দেখিছে৷ একেদৰে ছত্তিচগড়তো প্ৰিয়ংকাৰ নেতৃত্বতেই ভূপেশ বাঘেলে চৰকাৰ গঢ়িবলৈ সক্ষম হৈছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
