নতুন দিল্লীত অনুষ্ঠিত হ’বলগীয়া ১৮ সংখ্যক BRICS সন্মিলনক লৈ দেশৰ ৰাজধানীত এতিয়া ব্যাপক প্ৰস্তুতি চলিছে। আজিৰে পৰা দুদিনীয়াকৈ অনুষ্ঠিত হ’বলগীয়া এই সন্মিলনত BRICSৰ সদস্য দেশ, অংশীদাৰ দেশ, আঞ্চলিক সংগঠন আৰু আন্তঃৰাষ্ট্ৰীয় প্ৰতিষ্ঠানৰ শীৰ্ষ পৰ্যায়ৰ প্ৰতিনিধিসকলে অংশগ্ৰহণ কৰিছে। ইতিমধ্যে পুটিন, জিনপিঙকে ধৰি বিশ্বৰ বিভিন্ন প্ৰান্তৰ ৰাষ্ট্ৰপতি, প্ৰধানমন্ত্ৰী, কূটনীতিবিদ, ব্যৱসায়িক প্ৰতিনিধি আৰু অন্যান্য বিশিষ্ট অতিথি নতুন দিল্লীত উপস্থিত হৈছে। অতিথিসকলৰ থকাৰ বাবে দিল্লীৰ কেইবাখনো বিলাসী হোটেলত বিশেষ ব্যৱস্থা কৰা হৈছে। কেৱল থকাৰ ব্যৱস্থাই নহয়, অতিথিসকলৰ বাবে ভাৰতীয় খাদ্যৰ বৈচিত্ৰ্য আৰু স্বাদ তুলি ধৰিবলৈ বিশেষ মেনুও প্ৰস্তুত কৰা হৈছে।
পুটিন-জিনপিঙৰ খাদ্যৰ তালিকা
BRICS সন্মিলনত চীনৰ ৰাষ্ট্ৰপতি জিনপিং, ৰাছিয়াৰ ৰাষ্ট্ৰপতি ভ্লাদিমিৰ পুটিন, ইজিপ্তৰ ৰাষ্ট্ৰপতি আব্দেল ফাত্তাহ আল-ছিছি, দক্ষিণ আফ্ৰিকাৰ ৰাষ্ট্ৰপতি চাইৰিল ৰামাফোছা, ইণ্ডোনেছিয়াৰ ৰাষ্ট্ৰপতি প্ৰব’ও চুবিয়াণ্টো, ইৰানৰ ৰাষ্ট্ৰপতি মাছুদ পেজেছকিয়ান আৰু ইথিওপিয়াৰ প্ৰধানমন্ত্ৰী অবি আহমেদ আলীকে ধৰি কেইবাজনো শীৰ্ষ নেতা অংশগ্ৰহণ কৰিব। সকলো প্ৰতিনিধি আৰু অতিথিৰ খাদ্যাভ্যাস, পছন্দ আৰু সাংস্কৃতিক বৈচিত্ৰ্যৰ প্ৰতি লক্ষ্য ৰাখি ভাৰতীয় খাদ্যৰ লগতে আন্তঃৰাষ্ট্ৰীয় খাদ্যৰো ব্যৱস্থা কৰা হৈছে। নতুন দিল্লীৰ তাজমহল হোটেলত অতিথিসকলৰ বাবে ‘Tradition to Table’ নামৰ বিশেষ খাদ্য সংকলন আগবঢ়োৱা হ’ব বুলি প্ৰতিবেদনত প্ৰকাশ পাইছে। এই মেনুত ভাৰতৰ বিভিন্ন ৰাজ্যৰ, বিভিন্ন জনজাতীয় পৰম্পৰাগত জলপান আৰু খাদ্যও অন্তৰ্ভুক্ত কৰা হৈছে। দিল্লীত উপস্থিত হোৱা বিয়াগোম নেতাসকলৰ নিজৰ নিজৰ পছন্দৰ খাদ্যৰ লগতে ভাৰতৰ বিভিন্ন খাদ্যৰ ভিতৰত তাজ হোটেলৰ মেনুত এই প্ৰতিনিধিসকলৰ বাবে স্থান পাইছে— কাশ্মীৰৰ টেঙা আখৰোট, পুৰণি দিল্লীৰ আটাৰ কাজু, মহাৰাষ্ট্ৰৰ ভাকৰৱাড়ী,ৰাজস্থানৰ মিনি কচোৰী, বংগৰ কুচো নিম্বাকি, তামিলনাডুৰ মুৰুক্কু আদি। দেশৰ বিভিন্ন ৰাজ্যৰ পৰম্পৰাগত সোৱাদ একেখন মেনুত তুলি ধৰাৰ চেষ্টা কৰা হৈছে।
দ্য লীলাৰ মেনুত ‘পদুম’ৰ বিশেষ ব্যঞ্জন!
আনহাতে নতুন দিল্লীৰ দ্য লীলা পেলেচতো অতিথিসকলৰ বাবে আছে এক বিশেষ আকৰ্ষণ—‘Edible Lotus’ অৰ্থাৎ খাব পৰা পদুম। ভাৰতৰ জাতীয় ফুল পদুমক BRICS India 2026ৰ ল’গ’তো স্থান দিয়া হৈছে। সেইবাবেই এই বিশেষ খাদ্যবিধ মেনুত অন্তৰ্ভুক্ত কৰা হৈছে। গোলাপ, কেশৰ আৰু ইলাচিৰে প্ৰস্তুত কৰা এই খাব পৰা পদুম থলুৱা ভাৰতীয় ফলৰ সৈতে পৰিৱেশন কৰা হ’ব। ইয়াৰ উপৰি দ্য লীলাৰ মেনুত আছে বাজৰাৰ কুকিজ, হাতেৰে প্ৰস্তুত কৰা গ্ৰেনোলা বাৰ আৰু বিভিন্ন ধৰণৰ ৱেলনেছ ইনফিউজন বা স্বাস্থ্যকৰ পানীয়।
‘দ্য ললিত’ৰ গালোটি কাবাব
দিল্লীৰ আন এখন বিলাসী হোটেল ‘দ্য ললিত’-এও BRICS অতিথিসকলৰ বাবে ভাৰতীয় আৰু আন্তঃৰাষ্ট্ৰীয় খাদ্যৰ এক বিশেষ সংমিশ্ৰণ প্ৰস্তুত কৰিছে। মেনুত গালোটি কাবাব আৰু তন্দুৰী ব্ৰেডৰ দৰে ভাৰতীয় খাদ্যৰ উন্নত ৰূপৰ লগতে বিভিন্ন বাজৰা-ভিত্তিক খাদ্য ৰখা হৈছে। কেৱল ভাৰতীয় খাদ্যই নহয়, আন্তঃৰাষ্ট্ৰীয় সোৱাদৰ কথাও মনত ৰখা হৈছে। মেনুত আছে মিছ’ পেষ্টৰ সৈতে ব্ৰেইজড বেঙেনা, লাহে লাহে সিজোৱা চাইনিজ কবি আৰু এম্বাৰ চচৰ সৈতে জাপানীজ ষ্টাইলৰ মিঠা কিডনী বিনৰ খাদ্য।
ভাৰতীয় পৰম্পৰা আৰু আধুনিকতাৰ সংমিশ্ৰণ
এইবাৰৰ BRICS সন্মিলনৰ খাদ্য মেনুৰ বিশেষত্ব হৈছে—ভাৰতৰ বিভিন্ন প্ৰান্তৰ পৰম্পৰাগত খাদ্যক আধুনিক ধৰণে অতিথিসকলৰ সন্মুখত উপস্থাপন কৰা। কাশ্মীৰৰ আখৰোট, মহাৰাষ্ট্ৰৰ ভাকৰৱাড়ী, ৰাজস্থানৰ কচোৰী, তামিলনাডুৰ মুৰুক্কুৰ পৰা আৰম্ভ কৰি গালোটি কাবাব আৰু বাজৰাৰ খাদ্যলৈকে—ভাৰতৰ খাদ্য সংস্কৃতিৰ এক বৃহৎ বৈচিত্ৰ্য এই মেনুত প্ৰতিফলিত হৈছে। তাৰ লগতে বিদেশী অতিথিসকলৰ খাদ্যাভ্যাসৰ প্ৰতি লক্ষ্য ৰাখি জাপানী, চীনা আৰু অন্যান্য আন্তঃৰাষ্ট্ৰীয় খাদ্যও ৰখা হৈছে। অৰ্থাৎ, BRICS সন্মিলনত বিশ্বৰ শীৰ্ষ নেতাসকলে কেৱল গুৰুত্বপূৰ্ণ কূটনৈতিক আলোচনাতে অংশ নল’ব; দিল্লীৰ বিলাসী হোটেলসমূহত তেওঁলোকে একেলগে সোৱাদ ল’ব ভাৰতৰ বিভিন্ন প্ৰান্তৰ অনন্য খাদ্য সংস্কৃতিৰো।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
