নতুন দিল্লীত অনুষ্ঠিত হৈছে BRICS Summit 2026। এই সন্মিলনক কেন্দ্ৰ কৰি ভাৰতৰ ৰাজধানী চহৰখনত এতিয়া বিশ্বৰ কেইবাখনো গুৰুত্বপূৰ্ণ দেশৰ ৰাষ্ট্ৰপতি, প্ৰধানমন্ত্ৰী আৰু উচ্চপদস্থ প্ৰতিনিধিৰ সমাৱেশ ঘটিছে। ইতিমধ্যে ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু ইৰাণৰ ৰাষ্ট্ৰপতি মাছুদ পেজেছকিয়ান নতুন দিল্লীত উপস্থিত হৈছে। আনহাতে, আজি ভাৰতত উপস্থিত হ’ব চীনৰ ৰাষ্ট্ৰপতি জিনপিং। এই সন্মিলনৰ মাজতে ভাৰতৰ প্ৰধানমন্ত্ৰী নৰেন্দ্ৰ মোদীৰ সূচীও যথেষ্ট ব্যস্ত। বিভিন্ন দেশৰ ৰাষ্ট্ৰনেতাৰ সৈতে দ্বিপাক্ষিক বৈঠকৰ লগতে আজি জিনপিঙৰ সৈতে হ’বলগীয়া বৈঠকখনক বিশেষ গুৰুত্ব দিয়া হৈছে।
আজি পুৱা ১০ বজাত হায়দৰাবাদ হাউছত ইথিওপিয়াৰ প্ৰধানমন্ত্ৰী আবি আহমেদ আলীৰ সৈতে বৈঠকত মিলিত হ’ব প্ৰধানমন্ত্ৰী মোদী। ইয়াৰ পিছতে পুৱা ১০:৩০ বজাত মালয়েছিয়াৰ প্ৰধানমন্ত্ৰী আনোৱাৰ ইব্ৰাহিমৰ সৈতে বৈঠক অনুষ্ঠিত হ’ব। পুৱা ১১ বজাত আবুধাবিৰ ক্ৰাউন প্ৰিন্স শ্বেইখ খালিদ বিন মহম্মদ বিন জায়েদ আল নাহিয়ানৰ সৈতে আলোচনাত মিলিত হ’ব মোদী। ইয়াৰ পিছত পুৱা ১১:৩০ বজাত ভিয়েটনামৰ প্ৰধানমন্ত্ৰী লে মিন হাঙৰ সৈতে বৈঠক অনুষ্ঠিত হ’ব। ইফালে, ইৰাণৰ ৰাষ্ট্ৰপতি মাছুদ পেজেছকিয়ানেও আজি ভাৰতৰ ৰাষ্ট্ৰপতি দ্ৰৌপদী মুৰ্মুৰ সৈতে ৰাষ্ট্ৰপতি ভৱনত বৈঠকত মিলিত হোৱাৰ কথা আছে।
আজি অনুষ্ঠিত হ’বলগীয়া বৈঠকসমূহৰ ভিতৰত আটাইতকৈ চৰ্চিত তথা অন্যতম হৈছে ভাৰতৰ প্ৰধানমন্ত্ৰী নৰেন্দ্ৰ মোদী আৰু চীনৰ ৰাষ্ট্ৰপতি ছি জিনপিঙৰ বৈঠক। সন্ধিয়া প্ৰায় ৫:৪৫ বজাত ভাৰত মণ্ডপমত দুয়োগৰাকী নেতাৰ মাজত বৈঠক অনুষ্ঠিত হ’ব। ভাৰত আৰু চীনৰ মাজৰ সম্পৰ্কৰ প্ৰেক্ষাপটত এই বৈঠকখন যথেষ্ট গুৰুত্বপূৰ্ণ বুলি বিবেচিত হৈছে। দুয়োখন দেশৰ মাজৰ বিভিন্ন দ্বিপাক্ষিক বিষয়ৰ লগতে আঞ্চলিক আৰু আন্তঃৰাষ্ট্ৰীয় পৰিস্থিতিও আলোচনালৈ অহাৰ সম্ভাৱনা আছে।
বিয়লি ২:৩৫ বজাত BRICS সদস্য দেশসমূহৰ বৈঠক অনুষ্ঠিত হ’ব। ইয়াৰ পিছত বিয়লি ৪:২৫ বজাত বিশ্বনেতাসকলে ‘ইণ্ডিয়া ইনোভেটছ’ প্ৰদৰ্শনী পৰিদৰ্শন কৰিব। সন্ধিয়া ৫:০৫ বজাত অনুষ্ঠিত হ’ব চৰকাৰী সমূহীয়া ফটো আৰু যৌথ বৃক্ষৰোপণ অনুষ্ঠান। ইয়াৰ পিছতে সন্ধিয়া ৫:৪৫ বজাত মোদী-জিনপিঙৰ গুৰুত্বপূৰ্ণ বৈঠক অনুষ্ঠিত হ’ব। শনিবাৰে সন্ধিয়া ৭:৩০ বজাত ভাৰত মণ্ডপামত BRICSৰ ৰাষ্ট্ৰপতি আৰু নেতাসকলৰ সন্মানত এক বিশেষ ডিনাৰৰ আয়োজন কৰিছে প্ৰধানমন্ত্ৰী নৰেন্দ্ৰ মোদীয়ে।
এই ডিনাৰত কেন্দ্ৰীয় চৰকাৰৰ একাংশ মন্ত্ৰীৰ লগতে প্ৰায় ১৪-১৫খন ৰাজ্যৰ মুখ্যমন্ত্ৰীও উপস্থিত থাকিব। নিৰাপত্তা আৰু যান-বাহন নিয়ন্ত্ৰণৰ প্ৰতি লক্ষ্য ৰাখি ৰাজ্যসমূহৰ মুখ্যমন্ত্ৰীসকলে একেলগে বাছেৰে ভাৰত মণ্ডপামলৈ যাত্ৰা কৰিব। সকলো মুখ্যমন্ত্ৰীক সন্ধিয়া ৫ বজাৰ পৰা ৫:৩০ বজাৰ ভিতৰত সংসদ ভৱনত উপস্থিত থাকিবলৈ কোৱা হৈছে। তাৰ পিছত প্ৰায় সন্ধিয়া ৬ বজাত তেওঁলোকে একেলগে বাছেৰে ভাৰত মণ্ডপামলৈ ৰাওনা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
