বাক্সা জিলাৰ বৰমাত চাকৰি দিয়াৰ প্ৰলোভনেৰে নিবনুৱা যুৱকৰ পৰা কোটি কোটি টকা সংগ্ৰহ কৰাৰ অভিযোগক কেন্দ্ৰ কৰি চাঞ্চল্যৰ সৃষ্টি হৈছে। বৰমা উচ্চতৰ মাধ্যমিক বিদ্যালয়ৰ এগৰাকী অৱসৰপ্ৰাপ্ত অধ্যক্ষা আৰু তেওঁৰ ভগ্নীৰ বিৰুদ্ধে প্ৰায় ১৮ কোটি টকা লুণ্ঠনৰ অভিযোগ উত্থাপন হৈছে। অভিযোগ অনুসৰি, বৰমা, পাটাছাৰকুছি, নলবাৰী আদি অঞ্চলৰ প্ৰায় ৭০ৰ পৰা ৮০গৰাকী নিবনুৱা যুৱকক BTCৰ বিভিন্ন বিভাগত চাকৰি দিয়াৰ প্ৰলোভন দেখুৱাই বৃহৎ পৰিমাণৰ ধন সংগ্ৰহ কৰা হৈছিল।
এই সমগ্ৰ ঘটনাত অৱসপ্ৰাপ্ত অধ্যক্ষাগৰাকীৰ প্ৰাক্তন ছাত্ৰ ধ্ৰুৱজ্যোতি হালৈৰ বেংক একাউণ্ট ব্যৱহাৰ কৰাৰ অভিযোগ উত্থাপন হৈছে। ধ্ৰুৱজ্যোতিৰ অভিযোগ অনুসৰি, প্ৰাক্তন অধ্যক্ষাগৰাকীয়ে চাকৰিৰ নামত সংগ্ৰহ কৰা ধন তেওঁৰ SBIৰ দিশপুৰ শাখাৰ বেংক একাউণ্টত জমা কৰিছিল। পৰৱৰ্তী সময়ত সেই ধন একাউণ্টৰ পৰা উলিয়াই নিয়া হৈছিল বুলিও অভিযোগ কৰিছে ধ্ৰুৱজ্যোতিয়ে। তেওঁৰ দাবী অনুসৰি, এই ধৰণে চাকৰি দিয়াৰ নামত ধনৰ লেনদেন চলি আছিল।
অভিযোগ অনুসৰি, ২০২৪ চনৰ পৰা BTCৰ বিভিন্ন বিভাগত চাকৰি দিয়াৰ প্ৰলোভনেৰে নিবনুৱা যুৱকৰ পৰা ধন সংগ্ৰহ কৰা হৈছিল। সেই সময়ত BTCৰ মুখ্য কাৰ্যবাহী সদস্য হিচাপে প্ৰমোদ বড়ো কাৰ্যনিৰ্বাহ কৰি আছিল। অভিযোগকাৰীৰ মতে, প্ৰাক্তন অধ্যক্ষাগৰাকীৰ পুত্ৰই প্ৰমোদ বড়োৰ খুলশালীয়েকক বিৱাহ কৰোৱাৰ বিষয়টোক লৈ চাকৰি প্ৰদানৰ ক্ষেত্ৰত প্ৰভাৱ থকা বুলি এক ধাৰণা সৃষ্টি কৰা হৈছিল। ইয়াৰ সুযোগ লৈ চাকৰিৰ নামত ধন সংগ্ৰহৰ এক নেটৱৰ্ক গঢ়ি তোলা হৈছিল বুলিও অভিযোগ উত্থাপন হৈছে।
অভিযোগ অনুসৰি, প্ৰতিশ্ৰুতি দিয়াৰ পিছতো বহু যুৱকে চাকৰি লাভ নকৰাত পৰিস্থিতি জটিল হৈ পৰে। ধ্ৰুৱজ্যোতি হালৈয়ে অভিযোগ কৰা মতে, এই পৰিস্থিতিত তেওঁক মানসিকভাৱে হাৰাশাস্তি কৰাৰ লগতে মৃ*ত্যুৰ বাবে উচটনি দিয়া হৈছিল। অৱশ্যে এই অভিযোগসমূহৰ সত্যতা তদন্ত সম্পূৰ্ণ হোৱাৰ পিছতহে স্পষ্ট হ’ব।
ঘটনাক কেন্দ্ৰ কৰি ধ্ৰুৱজ্যোতি হালৈয়ে ইতিমধ্যে দিছপুৰ থানাত পাঁচগৰাকী লোকৰ বিৰুদ্ধে গোচৰ ৰুজু কৰিছে। গোচৰটোত পুলেন চন্দ্ৰ গোস্বামী, তেওঁৰ পত্নী, বৰমা উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষা, চক্ৰধৰ বৰ্মন আৰু বনজিৎ ৰয়ৰ নাম উল্লেখ কৰা হৈছে। বিগত ২০ আগষ্টত দিশপুৰ থানাত ০৬১৭ নম্বৰত গোচৰটো পঞ্জীয়ন কৰা হয়। গোচৰটোত BNSৰ 316(2), 318(4), 336(3) আৰু 61(2) ধাৰা আৰোপ কৰা হৈছে বুলি জানিব পৰা গৈছে।
বৰ্তমান ঘটনাটোৰ তদন্ত দিশপুৰ থানাৰ SI দিপাংকৰ চুতীয়াই চলাই আছে। আৰক্ষীৰ তদন্ত আগবঢ়াৰ লগে লগে বেংক একাউণ্টৰ লেনদেন, চাকৰিৰ নামত ধন সংগ্ৰহৰ অভিযোগ আৰু জড়িত লোকসকলৰ ভূমিকা সন্দৰ্ভত অধিক তথ্য পোহৰলৈ অহাৰ সম্ভাৱনা আছে। প্ৰায় ১৮ কোটি টকাৰ দৰে বৃহৎ পৰিমাণৰ ধন লেনদেনৰ অভিযোগ উত্থাপন হোৱাত ঘটনাটোৱে স্বাভাৱিকতে ব্যাপক চাঞ্চল্যৰ সৃষ্টি কৰিছে। এতিয়া আৰক্ষীৰ তদন্ততেই পোহৰলৈ আহিব—চাকৰিৰ নামত প্ৰকৃততে কিমান ধন সংগ্ৰহ কৰা হৈছিল আৰু এই সমগ্ৰ ঘটনাৰ আঁৰত কোন কোন লোক জড়িত আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
