সাতখন ৰাজ্যৰ ১৩ খন আসনৰ মাজৰ ১০খনতেই উপনিৰ্বাচনত জয়ী হৈছে ইণ্ডিয়া জোঁট৷ এই বিজয়ৰ পাছতেই প্ৰথম প্ৰতিক্ৰিয়া ব্যক্ত কৰিছে ৰাহুল গান্ধীয়ে৷ শনিবাৰে সন্ধিয়া এক্স হেণ্ডেলত শ্বেয়াৰ কৰিছে বিশেষ পোষ্ট৷ লোকসভাৰ বিৰোধী দলনেতাই এই সন্দৰ্ভত কয়, ‘সাত ৰাজ্যৰ বিধানসভা উপনিৰ্বাচনৰ ফলাফলে প্ৰমাণ কৰিছে যে, বিজেপিয়ে ভয় আৰু বিভ্ৰান্তিৰ পৰিবেশ তৈয়াৰ কৰিছে৷ সেই পৰিবেশ মানুহেই চূৰ্ণ কৰি দিলে৷’ ৰাহুল গান্ধীয়ে লগতে কয়, ‘কৃষক, শ্ৰমিক, যুৱকৰ পৰা আৰম্ভ কৰি ব্যৱসায়ী কিংবা চাকৰিয়াল, সমাজৰ প্ৰতিটো ক্ষেত্ৰতেই মানুহে বিচাৰিছে স্বৈৰাচাৰ ধ্বংস হৈ ন্যায় প্ৰতিষ্ঠা হওক৷ জীৱনশৈলীৰ উন্নতি আৰু সংবিধান ৰক্ষাৰ বাবে এতিয়া প্ৰতিজন মানুহেই ইণ্ডিয়া জোঁটৰ পক্ষত আছে৷ জয় হিন্দুস্তান, জয় সংবিধান৷’
উল্লেখ্য যে লোকসভা নিৰ্বাচনৰ পৰবৰ্তী প্ৰথম উপনিৰ্বাচনৰ ফলপ্ৰকাশ পাইছে শনিবাৰে৷ ৭ ৰাজ্যৰ ১৩ আসনত বিধানসভা উপনিৰ্বাচনত উত্থান ইণ্ডিয়া জোঁটৰ৷ ধৰাশায়ী কেন্দ্ৰৰ শাসকদল৷ উত্তৰাখণ্ডৰ দুখন আসনেই জয় কৰিছে কংগ্ৰেছে৷ বদ্ৰীনাথ আসনক BSPৰ হাতৰ পৰা আঁজুৰি আনিছে কংগ্ৰেছে৷ পশ্চিমবংগত তৃণমূল, হিমাচল, উত্তৰাখণ্ড কংগ্ৰেছ, পঞ্জাৱত আপ আৰু তামিলনাডুত DMK প্ৰাৰ্থীয়ে বহু ব্যৱধানত বিজয় সাবস্ত্য কৰিছে৷ ৭ৰাজ্যৰ ১৩ আসনৰ মাজত মাত্ৰ ২খন আসনহে লাভ কৰিছে BJPয়ে৷
আৰু এটি আসনত NDAশিৱিৰৰ JDU প্ৰাৰ্থীক হৰুৱাই জয়ী হৈছে নিৰ্দলীয় প্ৰাৰ্থী৷ হিমাচলত বিজয় সাব্যস্ত কৰিছে হিমাচল প্ৰদেশৰ মুখ্যমন্ত্ৰী সুখবিন্দৰ সিং সুখুৰ পত্নীয়ে৷ পঞ্জাৱত আপেই উৰুৱাই আছে বিজয় ধ্বজা৷ পশ্চিমবংগত তৃণমূল কংগ্ৰেছে উৰুৱাই আছে বিজয় ধ্বজ্জা৷ লোকসভা নিৰ্বাচনৰ ৪০০পাৰ কৰা টাৰ্গেট আছিল নৰেন্দ্ৰ মোদীৰ৷ বিজেপিৰ টাৰ্গেট আছিল ৩৭০৷ কিন্তু একক সংখ্যাগৰিষ্ঠতা লাভ নকৰিলে গেৰুৱা শিবিৰে৷ ২৪০ত ৰৈ গ’ল বিজেপি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
