অসম লাইভ২৪ঃ বাঘবৰ সমষ্টিৰ বাঘমাৰাচৰত বৃহস্পতিবাৰে AIUDFৰ সভাপতি তথা সাংসদ বদৰুদ্দিন আজমলে এখন বিশাল জনসভাত অংশ গ্ৰহণ কৰি কংগ্ৰেছক তীব্ৰ সমালোচনা কৰিছে। আজমলে সেই সভাতেই কয়, ‘অসমত এতিয়া AIUDF আৰু BJP য়েহে কাম কৰি আছে। কংগ্ৰেছ বৰ্তমান ময়দানত নাই। এনেও কংগ্ৰেছে পৰাজয় মানি লৈছে। কংগ্ৰেছে জানে তেওঁলোকে নগাঁও, ধুবুৰী আৰু কৰিমগঞ্জত জিকিব নোৱাৰে। কংগ্ৰেছে বৰ্তমান ঘৰত বহিয়েই নিৰ্বাচনী অংক কৰি আছে। কংগ্ৰেছে টাউন অঞ্চলৰ ভোট হিচাপ কৰি আছে আৰু কংগ্ৰেছে টাউনত যিমান বেছি লাগি থাকিব AIUDF য়ে গাঁও অঞ্চলৰ সকলো ভোট লাভ কৰিব। অৰ্থাৎ আজিৰ তাৰিখত কংগ্ৰেছে ভোটৰ অংকই শিকিব নোৱাৰিলে। এই ক্ষেত্ৰত কংগ্ৰেছক মই ধন্যবাদ দিও।’
ৰাহুল গান্ধীৰ ন্যায় যাত্ৰাকো কটাক্ষ কৰি আজমলে কয় যে, ৰাহুল গান্ধীয়ে ভাৰত জোড়ো যাত্ৰাৰ জৰিয়তেনো কিমান সফল হৈছে? ভাৰতবৰ্ষৰ ৫০ শতাংশ ঠাই ঘুৰি ফুৰি বিগত নিৰ্বাচনত কেইখন আসন লাভ কৰিছে কংগ্ৰেছে? ৰাহুল গান্ধী নেহৰু পৰিয়ালৰ এগৰাকী যুৱক হিচাপে তেওঁক চাবলৈ মানুহ যাবই, কিন্তু ভোট নিদিয়ে। ৰাহুল গান্ধীৰ এনে যাত্ৰাৰে একো কাম নহ’ব। উজনি অসমত কংগ্ৰেছৰ এতিয়া কোনো ভোট বেংক নাই। সেয়ে এতিয়া নামনি অসমত জঁপিয়াই পৰিছে কংগ্ৰেছ দল। অসম কংগ্ৰেছত বৰ্তমান যিমান মানুহ আছে সকলোবোৰ বিজেপি আৰু হিমন্ত বিশ্ব শৰ্মাৰ এজেন্ট। বিজেপিৰ এই কংগ্ৰেছী এজেন্টসকলে হিমন্ত বিশ্ব শৰ্মাৰ কথা মতেই আজমলক আক্ৰমণ কৰিছে। যাৰ ফলত লাভৱান হব বিজেপি৷
ইয়াৰোপৰি আজমলে নিৰ্বাচনক কেন্দ্ৰ কৰি কয়, ‘আমি খেলত নামিছো যেতিয়া খেল হ’বই। বিগত সময়ত কা’ৰ বিৰুদ্ধে কিমান আন্দোলন হৈছিল, কেইবাজন শ্বহীদো হৈছিল কিন্তু নিৰ্বাচনততো বিজেপিয়েই জয়ী হ’ল। গতিকে নিৰ্বাচন বেলেগ মানুহৰ মন বেলেগ।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
