শ্বাহৰুখ খানৰ পুত্ৰৰ জীৱনৰ অন্যতম ক’লা অধ্যায় আছিল ড্ৰাগছৰ গোচৰত জড়িত হোৱা। গোটেই ভাৰততে কিং খ্যাত পিতৃয়ে বিচাৰত হাজিৰ হ’বলগীয়া হৈছিল। সেই দুখৰ সময়ত আৰিয়ানৰ প্ৰতি সহানুভূতিৰ হাত আগবঢ়াইছিল ৰিয়া চক্ৰৱৰ্তীয়ে। শেহতীয়াকৈ দিয়া এক সাক্ষাৎকাৰত ৰিয়াই সেই অজ্ঞাত অধ্যায়টো প্ৰকাশ কৰিছিল, যিটো আগতে কেতিয়াও চৰ্চালৈ অহা নাছিল।
ড্ৰাগছৰ গোচৰত আৰিয়ানক গ্ৰেপ্তাৰ কৰাটোৱে ৰিয়াক নিজৰ দিনৰ কথা মনত পেলাই দিলে। ৰিয়াই ক’লে যে আৰিয়ান সেই কঠিন পৰিস্থিতিৰ মাজেৰে পাৰ হৈ যোৱাৰ সময়ত দূৰৰ পৰা চোৱাটো তেওঁৰ বাবে বৰ কঠিন আছিল। অভিনেত্ৰীগৰাকীয়ে কয়, “গোটেই ঘটনাটো মোৰ নিজৰ জীৱনৰ সৈতে হুবহু একেই আছিল। সঁচা কথা ক’বলৈ গ’লে আৰিয়ানৰ কাহিনীটো মোতকৈ মোৰ ভাই শৌভিকৰ কাহিনীৰ সৈতে বেছি মিল আছিল। আনকি তেওঁলোকৰ মুখৰ মাজতো এক অদ্ভুত সাদৃশ্য আছে।” ৰিয়াই স্পষ্টকৈ ক’লে যে আৰিয়ানৰ অসহায়তা দেখি মৌন হৈ থাকিব নোৱাৰে, আৰু তেওঁৰ সৈতে পোনপটীয়াকৈ যোগাযোগ কৰে।
২০২০ চনৰ জুন মাহত সুশান্তৰ আকস্মিক মৃত্যুৰ পিছত ৰিয়াৰ জীৱন ওলট-পালট হৈ গৈছিল। জামিন পোৱাৰ পিছতো দীৰ্ঘদিনলৈ বহিঃৰাজ্য ভ্ৰমণত নিষেধাজ্ঞা আৰোপ কৰা হৈছিল। ৰিয়াই বন্ধু-বান্ধৱীৰ প্ৰতিও কৃতজ্ঞতা প্ৰকাশ কৰে। ৰিয়াই কয়, “তেতিয়া মোক সহায় কৰিবলৈ কোনো আগ্ৰহী নাছিল। মোৰ কাষত থিয় দিয়াসকলক হেৰুৱাবলগীয়া হৈছিল, ভয়ংকৰভাৱে ট্ৰ’ল দিয়া হৈছিল।” কেৱল বন্ধু-বান্ধৱীয়েই নহয়, যেতিয়া ৰিয়া আৰু ভাতৃ জে’লত আছিল তেতিয়া অভিনেতা ছাকিব ছালিম আৰু হুমা কুৰেশ্বীয়ে পিতৃ-মাতৃৰ বাবে আটাইতকৈ ডাঙৰ আৱেগিক সমৰ্থন হৈ পৰিছিল।
দীৰ্ঘদিনীয়া আঘাতৰ পিছত এতিয়া ৰিয়াই লাইমলাইটৰ পৰা আঁতৰি থকাটো পছন্দ কৰে। অভিনেত্ৰীগৰাকীয়ে স্পষ্টকৈ কৈয় যে তেওঁৰ ৰাস্তাত দেখা পালে সকলোৱে তেওঁক এৰাই চলিব বিচাৰে। অৱশ্যে অতীতক পাহৰি নতুন আৰম্ভণি কৰাৰ সময় আহি পৰিছে। দীৰ্ঘ ছবছৰৰ অন্তত অ’টিটি প্লেটফৰ্ম নেটফ্লিক্সৰ ‘ফেমিলি বিজনেছ’ ছিৰিজৰ জৰিয়তে পুনৰ উভতি আহিছে ৰিয়াই। য’ত অনিল কাপুৰ আৰু বিজয় বাৰ্মাৰ সৈতে পৰ্দা শ্বেয়াৰ কৰা দেখা যাব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
