২০২৬ চনৰ আই পি এল শেষ হোৱাৰ পাছতেই ভাৰতৰ এ দল শ্ৰীলংকালৈ যাব৷ তাতেই এখন ত্ৰিদেশীয় এদিনীয়া চিৰিজ খেলিব তেওঁলোকে৷ এই চিৰিজৰ বাবে ঘোষিত দলত শেষ মুহূৰ্তত এক ডাঙৰ পৰিবৰ্তন হৈছে৷ আঘাতৰ কাৰণে দলৰ পৰা বাদ পৰিছে সহ অধিনায়ক ৰিয়ান পৰাগ৷ তেওঁৰ স্থানত সুযোগ পাইছে ঋতুৰাজ গায়কোয়াডে৷ কেৱল দলত সুযোগেই নহয়, সহ-অধিনায়কৰ দায়িত্বও তেওঁক দিয়া হৈছে৷ ২০২৬ চনৰ IPL চলাৰ সময়ত ৰিয়ান পৰাগে আঘাত পাইছিল৷ সেই আঘাতৰ বাবেই তেওঁ ৰাজস্থান ৰয়েলছৰ হৈ এলিমিনেটৰ আৰু দ্বিতীয় কোৱালিফায়াৰ মেচহে খেলে৷ কিন্তু শেষ পৰ্যন্ত এই আঘাতৰ কাৰণেই শ্ৰীলংকা যাত্ৰাত দলৰ পৰা তেওঁক আঁতৰাই দিয়া হৈছে৷ আৰু ৰিয়ানৰ ঠাইত সুযোগ পাইছে ঋতুৰাজ গায়কোৱাডে৷
ঋতুৰাজৰ বাবে ডাঙৰ সুযোগ
ভাৰতৰ এ দলত স্থান পোৱা ঋতুৰাজ গায়কোয়াডৰ বাবে এই খবৰ স্বস্তিৰ খবৰ৷ কাৰণ ২০২৬ চনৰ আই পি এলত তেওঁ নিজৰ ফৰ্মত নাছিল৷ বেট হাতত পালেও প্ৰত্যাশামতে ৰান কৰিব পৰা নাছিল৷ আনকি প্ৰথমবাৰ যেতিয়া ভাৰতৰ এ দলৰ ঘোষণা হৈছিল তেতিয়াও তেওঁৰ নাম নাছিল৷ ফলত শ্ৰীলংকা যাত্ৰালৈ যোৱাৰ সম্ভাৱনা প্ৰায় শেষ বুলিয়েই ধৰা হৈছিল৷ কিন্তু ৰিয়ান পৰাগৰ আঘাতে সকলো সলনি কৰি দিলে৷ বৰ্তমান ঋতুৰাজে দলত স্থান পোৱাই নহয় তেওঁ সহ-অধিনায়কৰ দায়িত্বও পাইছে৷ সেয়ে এই ছিৰিজত তেওঁৰ বাবে এয়া নিজকে নতুনকৈ প্ৰমাণ কৰাৰ এক ডাঙৰ সুযোগ বুলিয়েই ক’ব পাৰি৷
শ্ৰী লংকা যাত্ৰাত ভাৰতৰ এ দলত কোন কোন আছে?
শ্ৰীলংকা যাত্ৰাত ভাৰতৰ এ দলত আছে তিলক বাৰ্মা, ঋতুৰাজ গায়কোয়াড, প্ৰিয়াংশ আৰ্য, বৈভৱ সূৰ্যবংশী, আয়ুশ বাদোনি, নিশান্ত সিন্ধু, সূৰ্যাংশ ছেডগে, প্ৰভাচিমৰণ সিং, কুমাৰ কুশাগ্ৰ, বিপৰাজ নিগম, যশ ঠাকুৰ, যুধবীৰ সিং, অংশুল কম্বোজ, আৰছাদ আৰু অনুকূল ৰায়৷
ত্ৰিদেশীয় চিৰিজৰ সূচী
৯জুনঃ শ্ৰীলংকা এ বনাম ভাৰত এ
১১জুনঃ আফগানিস্তান এ বনাম ভাৰত এ
১৩ জুনঃ শ্ৰীলংকা এ বনাম আফগানিস্তান এ
১৫জুনঃ শ্ৰীলংকা এ বনাম ভাৰত এ
১৭জুনঃ আফগানিস্তান এ বনাম ভাৰত এ
১৯ জুনঃ শ্ৰীলংকা এ বনাম আফগানিস্তান এ
২১ জুৱঃ ফাইনেল
কিয় গুৰুত্বপূৰ্ণ এই চিৰিজ?
ভাৰত এ দলৰ এই চিৰিজক ভৱিষ্যতৰ ক্ৰিকেটাৰসকলৰ বাবে ডাঙৰ মঞ্চ হিচাপে ধৰা হৈছে৷ এই দলত এনে বহু তৰুণ ক্ৰিকেটাৰ আছে যিসকলে আগন্তুক দিনত ভাৰতীয় জাতীয় দলৰ হৈ খেলিব পাৰে৷ বিশেষকৈ নজৰ থাকিব বৈভৱ সূৰ্যবংশীৰ দিশত৷ ২০২৬ চনৰ আই পি এলত এই তৰুণে দুৰ্দান্ত পাৰ্ফৰমেন্স দেখুৱাই সকলোকে তেওঁৰ প্ৰতি আকৰ্ষিত কৰিছে৷ এইবাৰ তেওঁক দেখা যাব ভাৰত এ দলৰ জাৰ্ছিত৷ যদি তেওঁ ভাল খেলিব পাৰে তেতিয়া জাতীয় দলত সুযোগ পোৱাৰ পথ আৰু মসৃণ হৈ পৰিব৷ কেৱল ঋতুৰাজেই নহয় এই চিৰিজত এনে বহু তৰুণ ক্ৰিকেটাৰৰ ভৱিষ্যত কি সেয়া স্পষ্ট হৈ পৰিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
