কিংবদন্তি ফুটবলাৰ ক্রিষ্টিয়ানো ৰোনাল্ডো আৰু তেওঁৰ প্ৰেয়সী জৰ্জিয়ানা ৰড্ৰিগেজে অৱশেষত বিৱাহ বান্ধোনত আৱদ্ধ হ’বলৈ ম’ন মেলিছে। ৰোনাল্ডো-জৰ্জিয়াৰ বিয়াৰ তাৰিখক লৈ চলি থকা জল্পনা-কল্পনাৰ মাজতে তেওঁলোকৰ বিৱাহৰ পূৰ্বে সম্পন্ন হোৱা এখন চুক্তিক লৈ অনুৰাগীৰ মাজত ব্যাপক চৰ্চা আৰম্ভ হৈছে। স্পেইনৰ সংবাদ মাধ্যম মুণ্ডো ডিপ’ৰ্টিভ’ৰ এক প্ৰতিবেদন অনুসৰি তেওঁলোকৰ আইনী দলসমূহে বিৱাহৰ পূৰ্বে চৰ্তৰ খচৰা প্ৰস্তুত কৰিছে।
ৰোনাল্ডো-জৰ্জিয়াৰ চুক্তিখনৰ মূল চৰ্তসমূহ কি কি?
খবৰ অনুসৰি, যদি দুয়োৰে মাজত বিৱাহ বিচ্ছেদ হয় বা বিৱাহৰ পিছত আইনী বিবাদ হয়, তেন্তে ৰোনাল্ডোৰ পৰা জৰ্জিয়ানা ৰড্ৰিগেজে আৰ্থিক সহায় লাভ কৰিব। চুক্তি অনুসৰি জৰ্জিয়াই ব্যক্তিগত খৰচৰ বাবে প্ৰতিমাহে ১ লাখ ২১ হাজাৰ ডলাৰ অৰ্থাৎ প্ৰায় ১ কোটি টকা লাভ কৰিব। আনহাতে আজীৱন ভাট্টা হিচাপে জৰ্জিয়াই লাভ কৰিব প্ৰতিমাহে প্ৰায় ১ লাখ ১০ হাজাৰ ডলাৰ অৰ্থাৎ প্ৰায় ৯২ লাখ টকা। ইয়াৰ উপৰিও সন্তানৰ ৰক্ষণাবেক্ষণ আৰু তেওঁলোকৰ বিলাসী জীৱনশৈলীৰ বাবে প্ৰতিমাহে ৫ লাখ ডলাৰ অৰ্থাৎ প্ৰায় ৪.২ কোটি টকা লাভ কৰিব।
সম্পত্তি আৰু অন্যান্য সুবিধাসমূহ:
বিৱাহ বিচ্ছেদ হলে মাদ্ৰিদ আৰু লিছবনত থকা বিভিন্ন সম্পত্তিকে ধৰি জৰ্জিয়াই লাভ কৰিবলগীয়া মুঠ সম্পত্তিৰ মূল্য ৫৬ লাখ ডলাৰ (প্ৰায় ৪৭ কোটি টকা)। তেওঁৰ জীৱনশৈলী বজাই ৰাখিবলৈ ৰোনাল্ডোই দিব লাগিব বছৰি ২০ লাখ ডলাৰ (প্ৰায় ১৬.৭ কোটি টকা)। ইয়াৰ উপৰিও এই সম্পত্তিৰ তালিকাত আছে দুখন বিলাসী গাড়ী, ব্যক্তিগত জেট বিমান আৰু বছৰত দুবাৰকৈ অৱসৰ বিনোদনৰ খৰচ।
বিগত কিছুদিনৰ পৰা তেওঁলোকৰ বিয়াৰ বাতৰি প্ৰচাৰ হৈ আহিছে যদিও দুয়োৰে পৰিয়ালে এই বাতৰিক অস্বীকাৰ কৰিছে। যোৱা বছৰ দুয়োৰে বাগ্দান হৈছিল যদিও এতিয়ালৈকে কোনো আনুষ্ঠানিক বিয়াৰ তাৰিখ ঘোষণা কৰা হোৱা নাই। অৱশ্যে এই বাতৰিৰ প্ৰতি আনুষ্ঠানিকভাৱে কোনো সঁহাৰি দিয়া নাই ৰোনাল্ডো বা জৰ্জিয়ানাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
