অসম লাইভ২৪ঃ এখন তালে নাবাজে। এই অপ্তবাক্যশাৰীৰ সৈতে সকলোৱেই পৰিচিত। দেশৰ সাম্প্ৰদায়িক পৰিস্থিতিক লৈ সৃষ্টি হোৱা উত্তেজনাক লৈ এই অপ্তবাক্যশাৰীকেই কৈছে আৰ এছ এছ প্ৰধান মোহন ভাগৱতে। দেশত সাম্প্ৰদায়িক সম্প্ৰীতি গঢ়ি তুলিবলৈ এটা পক্ষৰ প্ৰচেষ্টা থাকিলেই নহ’ব। হিন্দু-মুছলমানৰ ঐক্য গঢ়ি তুলিবলৈ উভয় পক্ষৰেই প্ৰচেষ্টা লাগিব। এই সমম্বয় গঢ়ি তুলিবলৈ আমি প্ৰত্যেকেই ‘জাতীয় পৰিচয়’ক বিশেষ গুৰুত্ব দিব লাগে বুলিও জনাইছে আৰ এছ এছ প্ৰধান মোহন ভাগৱতে।
মহাৰাষ্ট্ৰৰ নাগপুৰত সঙ্ঘৰ এখন সভাত মোহন ভাগৱতে কয়, ‘অতীতৰ কিছু উদাহৰণ আৰু অহংবোধেই হিন্দু-মুছলমানৰ ঐক্যৰ পথত বাধা দিছে। হিন্দু সংগঠিত হৈছে বাবেই অন্যান্য সংখ্যালঘুসকলে ভয় খাব নালাগে। পূৰ্বেও আৰ এছ এছৰ পৰা মুছলমানৰ কোনো বিপদ হোৱা নাই, ভৱিষ্যতেও নহয়।’
উল্লেখ্য যে, এইসমূহৰ মাজতেই এটা কথা ঠিক যে এটা সম্প্ৰদায়ৰ জনসংখ্যা বহু পৰিমানে বৃদ্ধি পাইছে। এইধৰণে জনসংখ্যা বৃদ্ধি পোৱাটো দেশৰ অখণ্ডতাৰ পক্ষে ক্ষতিকাৰক। এই ক্ষতিৰ উদাহৰণ দিবলৈ গৈ মোহন ভাগৱতে টিমোৰ, দক্ষিণ ছুডান, কছোভাৰ দৰে ধৰ্মভিত্তিক ৰাষ্ট্ৰ গঠনৰ উদাহৰণো দাঙি ধৰিছে। ইয়াৰোপৰি মোহন ভাগৱতে কয় যে, ‘ভাৰতত মুছলমানসকল সম্পূৰ্ণ নিৰাপদেই আছে। কিন্তু একাংশই বিষবাষ্প বিয়পোৱাত লাগিছে। যদি দুই সম্প্ৰদায়ৰ মাজত অসুবিধাই দেখা দিছে তেন্তে সেয়া বুজাবুজিৰ মাজেৰেহে সমাধা হ’ব। আলোচনাৰ মাজেৰেহে সেই অবিশ্বাসৰ বাতাবৰণ দূৰ কৰিব পাৰিব। মুছলমানসকল বহিৰাগত নহয়। পূৰ্বে যিসকল বহিৰাগত আহিছিল তেওঁলোকৰ বিৰুদ্ধে আমি যুঁজ কৰি তেওঁলোকক আঁতৰাই পঠিয়াইছো। এতিয়া দেশত কোনো বহিৰাগত নাই। যি ইয়াত আছে তেওঁলোক ইয়াৰেই নাগৰিক।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ