অসম লাইভ ২৪ঃ বিগত ৮ মাহে অব্যাহত আছে ৰাছিয়া-ইউক্ৰেইনৰ যুদ্ধ। গণহত্যা, শিশু হত্যা, বিদ্যালয়, হাস্পতাল আদিত কৰা ভয়াৱহ আক্ৰমণৰ সাক্ষী হৈছে ইউক্ৰেইনৰ লগতে সমগ্ৰ বিশ্ববাসী। যুদ্ধ অব্যাহত থকাৰ সময়তে যুদ্ধৰ ন’ ন’ কৌশল উলিয়াইছে ৰুছ বাহিনীয়ে। যুদ্ধৰ মাজতেই ইউক্ৰেনিয়ান মহিলাক ধৰ্ষণো কৰিছে ৰুছ সেনাই বুলি ইউক্ৰেইনৰ সংবাদমাধ্যমত প্ৰকাশিত হৈছে। ধৰ্ষণকো সামৰিক কৌশলৰ অংশ হিচাপে লৈছে ৰুছ বাহিনীয়ে। ৰুছ সেনাক ইউক্ৰেনিয়ান যুৱতীক ধৰ্ষণৰ বাবে যোগান ধৰা হৈছে ভায়েগ্ৰাকে ধৰি বহু যৌন উত্তেজন ঔষধ।
যুদ্ধৰ মাজতেই যৌন জিঘাংসা বৃদ্ধি পোৱাকলৈ সৰব হৈছে ৰাষ্ট্ৰসংঘ। ৰাষ্ট্ৰসংঘৰ বিশেষ প্ৰতিনিধি প্ৰমীলা পাটেনৰ দাবী, ৰুছ চৰকাৰে তেওঁলোকৰ সৈন্যক যোগান ধৰিছে যৌন উত্তেজক ঔষধ। এইদৰে যৌন উত্তেজক ঔষধ প্ৰেৰণকো সামৰিক কৌশলৰ ভিতৰৰে এটা বুলি ধৰিছে ৰুছ বাহিনীয়ে। যুদ্ধৰ অংশ হিচাপেই প্ৰতিদিনে ইউক্ৰেনিয়ান যুৱতী-মহিলাক ধৰ্ষণ কৰিছে ৰুছ সেনাই। ৰাষ্ট্ৰসংঘৰ প্ৰতিনিধি প্ৰমীলাই প্ৰকাশ কৰা অনুসৰি এগৰাকী ইউক্ৰেনিয়ান যুৱতীয়ে এই সম্পৰ্কে সংবাদ মাধ্যমৰ আগত মন্তব্যও তুলি ধৰিছে। ইউক্ৰেনিয়ান যুৱতীগৰাকীয়ে তেওঁৰ ভাষ্যত প্ৰকাশ কৰা অনুসৰি,’এইয়া ৰুছ বাহিনীৰ সামৰিক কৌশল। চৰকাৰীভাৱেই ৰুছ বাহিনীক ভায়েগ্ৰা যোগান ধৰা হৈছে।’
ৰাছিয়া-ইউক্ৰেইনৰ যুদ্ধকলৈ ৰাষ্ট্ৰসংঘৰ প্ৰতিনিধি প্ৰমীলাই কয়, ‘যুদ্ধ চলি থকাৰ সময়তে ৰাষ্ট্ৰসংঘত বহুকেইটা যৌন নিৰ্যাতনৰ গোচৰ ৰুজু হৈছে। এই যুদ্ধৰ মাজত যৌন হিংসাৰ স্বীকাৰ কেৱল মহিলাই হৈছে এনে নহয়। বহু পুৰুষকো যৌন নিৰ্যাতন চলোৱা হৈছে। কেইটামান গোচৰ ৰুজু হোৱা মানেই যে আৰু নিৰ্যাতন হোৱা নাই এনে নহয়। এনে বহু ঘটনাৰ সাক্ষী ইউক্ৰেনিয়ানবাসী। বৰ্তমানলৈ যৌন নিৰ্যাতনৰ স্বীকাৰ হোৱা লোকৰ সঠিক তথ্য যোগান ধৰা সম্ভৱ হোৱা নাই কিয়নো প্ৰত্যেক দিনেই ইউক্ৰেনত যৌন নিৰ্যাতনৰ বলি হৈছে বহুলোক।’
উল্লেখ্য যে সকলো প্ৰকাৰে ৰুছবাহিনীয়ে ইউক্ৰেইন দখল কৰিব বিচাৰিছে যদিও আজিকোপতি হাৰ মনা নাই ইউক্ৰেইন চৰকাৰে। ৰুছ সৈন্যই ধৰ্ষণ, যৌন উৎপীৰণৰ লগতে অন্যান্য বহু বেআইনী কাৰ্যকলাপেৰে ইউক্ৰেনিয়ানক পৰাভূত কৰিব বিচাৰিছে। ৰাষ্ট্ৰসংঘই প্ৰস্তুত কৰা প্ৰতিবেদনত যৌন নিৰ্যাতন স্বীকাৰ হোৱা ব্যক্তিৰ তালিকাত আছে ৮ বছৰীয়া শিশুৰ পৰা ৮২ বছৰীয়া বৃদ্ধাও। যৌন নিৰ্যাতন কৰিয়েই ৰুছ সেনা শান্ত হৈছে এনে নহয় কোনো কোনো ইউক্ৰেনিয়ান পৰিয়ালত ৰুছ সেনাই পৰিয়ালৰ ব্যক্তিৰ সন্মুখতেই যৌন উৎপীৰণ চলোৱাৰ কথাও উত্থাপন হৈছে ৰাষ্ট্ৰসংঘৰ বিশেষ প্ৰতিবেদনত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
