ড’নাল্ড ট্ৰাম্পৰ শপত গ্ৰহণ অনুষ্ঠানত ভাৰতৰ হৈ প্ৰতিনিধিত্ব কৰিব এছ জয়শংকৰে
আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পৰ শপত গ্ৰহণ অনুষ্ঠানত অংশগ্ৰহণ কৰিব বৈদেশিক পৰিক্ৰমা মন্ত্ৰী এছ জয়শংকৰে। ২০ জানুৱাৰীত আমেৰিকাৰ নতুন ৰাষ্ট্ৰপতি হিচাপে শপত গ্ৰহণ কৰিবলৈ ওলাইছে ড’নাল্ড ট্ৰাম্পে।
এই শপত গ্ৰহণ অনুষ্ঠানত এছ জয়শংকৰৰ অংশগ্ৰহণ সন্দৰ্ভত বৈদেশিক পৰিক্ৰমা মন্ত্ৰালয়ে এক বিবৃতি প্ৰকাশ কৰিছে। বিবৃতিটোত কোৱা হৈছে যে ট্ৰাম্প-ভ্যান্সৰ শপত গ্ৰহণ সমিতিৰ আমন্ত্ৰণত বৈদেশিক মন্ত্ৰী এছ. জয়শংকৰ, আমেৰিকাৰ ৪৭ সংখ্যক ৰাষ্ট্ৰপতি নিৰ্বাচিত ৰাষ্ট্ৰপতি ড’নাল্ড জে. ট্ৰাম্পৰ শপত গ্ৰহণ অনুষ্ঠানত ভাৰত চৰকাৰক প্ৰতিনিধিত্ব কৰিব।
আমেৰিকা ভ্ৰমণৰ সময়ত বৈদেশিক পৰিক্ৰমা মন্ত্ৰী জয়শংকৰে আমেৰিকাৰ ভৱিষ্যত প্ৰশাসনৰ প্ৰতিনিধিৰ লগতে অনুষ্ঠানত অংশগ্ৰহণ কৰিবলৈ আমেৰিকালৈ অহা আন কিছুমান গণ্যমান্য ব্যক্তিৰ সৈতেও বৈঠকত মিলিত হ’ব।
লাভ কৰা তথ্য অনুসৰি অহা ২০ জানুৱাৰীৰ দিনৰ ১২ বজাৰ পৰা (ভাৰতীয় সময় অনুসৰি নিশা ১০:৩০ বজাত) শপতগ্ৰহণ অনুষ্ঠান আৰম্ভ হ’ব। এই অনুষ্ঠানৰ বাবে সমগ্ৰ বিশ্বৰ পৰা বিশিষ্ট ব্যক্তিক আমন্ত্ৰণ জনোৱা হৈছে। এই উপলক্ষে বহু দেশৰ মুৰব্বীও উপস্থিত থাকিব পাৰে বুলি কোৱা হৈছে।
২০২৪ চনৰ আমেৰিকাৰ ৰাষ্ট্ৰপতি নিৰ্বাচনত ৰিপাব্লিকান পাৰ্টিৰ প্ৰাৰ্থী তথা প্ৰাক্তন ৰাষ্ট্ৰপতি ড’নাল্ড ট্ৰাম্পে ডেম’ক্ৰেটিক পাৰ্টিৰ প্ৰাৰ্থী তথা বৰ্তমানৰ উপ-ৰাষ্ট্ৰপতি কমলা হেৰিছক পৰাস্ত কৰিছিল। এই জয়ৰ লগে লগে ২০২৫ চনৰ ২০ জানুৱাৰীত ট্ৰাম্পে আমেৰিকাৰ ৪৭ সংখ্যক ৰাষ্ট্ৰপতি হিচাপে শপত গ্ৰহণ কৰিব।এই নিৰ্বাচনত ট্ৰাম্পে ২৭৯টা নিৰ্বাচনী ভোট লাভ কৰাৰ বিপৰীতে কমলা হেৰিছে ২১৯টা নিৰ্বাচনী ভোট লাভ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
