‘কালা হিৰণ: দ্য বেটল ফৰ লেগেচি’ চলচ্চিত্ৰখন ঘোষণা হোৱাৰ পাছৰে পৰা বিভিন্ন বিতৰ্কৰ মাজত সোমাই আছে। ছবিখনৰ মূল চৰিত্ৰ আৰু কাহিনীত অভিনেতা ছলমান খানৰ ১৯৯৮ চনৰ ক’লা হৰিণ চিকাৰ গোচৰৰ সৈতে মিল থকা বুলি অভিযোগ উত্থাপিত হৈছে। আনকি ছবিৰ পোষ্টাৰত অভিনেতাজনক ছলমান খানে পিন্ধা ব্ৰেচলেটৰ দৰে ব্ৰেচলেট পিন্ধা অৱস্থাতো দেখুওৱা হৈছে। পোষ্টাৰ মুকলি হোৱাৰ লগে লগে ছলমান খানে চলচ্চিত্ৰখনৰ মুক্তি বন্ধ কৰাৰ দাবীৰে নিৰ্মাতাসকলৰ বিৰুদ্ধে আদালতত আবেদন দাখিল কৰে। ইয়াৰ মাজতে ছবিখনৰ প্ৰযোজক অমিত জানীয়ে দাবী কৰিছে যে তেওঁ অবিৰতভাৱে বিভিন্ন পক্ষৰ পৰা ভাবুকি লাভ কৰি আছে। এই সন্দৰ্ভত ছবিখনৰ পৰিচালক ভৰত এছ শ্ৰীনেটে কয় যে-চলচ্চিত্ৰখন ছলমান খানক কেন্দ্ৰ কৰি নিৰ্মাণ কৰা হোৱা নাই। তেওঁ কয়, ‘ছলমান ভগৱান নহয় আৰু তেওঁ মোৰ কোনো গডফাদাৰো নহয়। তেওঁ মোক ৰখাবও নোৱাৰে।’
ছবিখনৰ নায়কৰ ব্ৰেচলেটক লৈ উত্থাপন হৈছে অভিযোগ
ছবিখনৰ নায়কে পিদ্ধা ব্ৰেচলেট সন্দৰ্ভত ছবিখনৰ পৰিচালক ভৰত এছ শ্ৰীনেটে কয়—’এই ব্ৰেচলেট কোনো পেটেণ্ট কৰা বস্তু নহয়। যদি ছলমান খানৰ ধাৰণা যে কেৱল তেওঁহে এই ব্ৰেচলেট পিন্ধিব পাৰে, তেন্তে তেওঁ ইয়াৰ পেটেণ্ট কৰাব লাগে। তেতিয়া পৃথিৱীৰ আন কোনো ঠাইত এই ব্ৰেচলেট উপলব্ধ হ’ব নালাগে। মই একেবাৰেই মানি নলওঁ যে এই চলচ্চিত্ৰ বা ইয়াৰ চৰিত্ৰ ছলমান খানৰ ওপৰত ভিত্তি কৰি নিৰ্মাণ কৰা হৈছে। আমাৰ চৰিত্ৰ ছলমান খানৰ নহয়।’ তেওঁ আৰু কয় যে-ছবিৰ অভিনেতা আৰু ছলমান খানৰ মাজত দেখা পোৱা সাদৃশ্য কেৱল এক সংযোগমাত্ৰ, ইচ্ছাকৃতভাৱে সৃষ্টি কৰা হোৱা নাই। তেওঁ লগতে কয়—’মই তেওঁৰ মুখমণ্ডল সলনি কৰিব নোৱাৰো বা আন কাৰোবাৰ দৰে দেখুৱাবলৈ প্ৰস্থেটিক্স ব্যৱহাৰো কৰিব নোৱাৰো। যদি কোনোবাই ইয়াক লৈ আপত্তি কৰে, তেন্তে মই তাত কি ক’ব পাৰো?’
‘ছলমান মোক ৰখাব নোৱাৰে’
চলচ্চিত্ৰখনৰ বিৰুদ্ধে আইনী ব্যৱস্থা গ্ৰহণৰ খবৰক লৈ হতাশা প্ৰকাশ কৰি পৰিচালক শ্ৰীনেটে কয়— ছলমান খান ভগৱান নহয়। তেওঁ মোৰ গডফাদাৰো নহয়। তেওঁ মোৰ কেৰিয়াৰ গঢ়ি দিব বা ধ্বংস কৰিব নোৱাৰে। মোকো ৰখাব নোৱাৰে। তেওঁ লগতে আৰু কয়— ‘এখন চলচ্চিত্ৰৰ প্ৰভাৱ আৰু গুৰুত্ব শেষত দৰ্শকেই নিৰ্ধাৰণ কৰে। এই ছবিখন নিৰ্মাণত বহু লোকৰ কঠোৰ পৰিশ্ৰম জড়িত আছে। এনে সময়তে হঠাতে আইনী নোটিচ পোৱা আৰু ছবিৰ মুক্তি বন্ধ কৰাৰ চেষ্টা কৰাটো স্বাভাৱিকতে বেদনাদায়ক।’
অন্তৱৰ্তীকালীন স্থগিতাদেশ দিবলৈ অস্বীকাৰ আদালতৰ
ইপিনে দিল্লী উচ্চ ন্যায়ালয়ে ছলমান খানৰ আবেদনৰ ভিত্তিত তাৎক্ষণিকভাৱে ছবিখনৰ মুক্তিৰ ওপৰত কোনো অন্তৱৰ্তীকালীন স্থগিতাদেশ জাৰি কৰিবলৈ অস্বীকাৰ কৰিছে। এক সূত্ৰ অনুসৰি ন্যায়াধীশ মধু জৈনৰ বিচাৰপীঠে ছলমান খানৰ আইনী দলক নিৰ্দেশ দিয়ে যে তেওঁলোকে গোচৰ-সংক্ৰান্ত সকলো নথিপত্ৰ চলচ্চিত্ৰ নিৰ্মাতাসকলক প্ৰদান কৰিব, যাতে তেওঁলোকে নিজৰ উত্তৰ প্ৰস্তুত কৰিব পাৰে। উক্ত গোচৰৰ পৰৱৰ্তী শুনানি ১ জুলাইত সম্পন্ন হ’ব।
প্ৰযোজকলৈ হত্যাৰ ভাবুকি, গোচৰ ৰুজু
‘কালা হিৰণ: দ্য বেটল ফৰ লেগেচি’ ছবিখনৰ প্ৰযোজক অমিত জানীয়ে অভিযোগ কৰিছে যে পাকিস্তানৰ ফোন নম্বৰৰ পৰা তেওঁক হত্যাৰ ভাবুকি দিয়া হৈছে। তেওঁৰ দাবী অনুসৰি, এই ভাবুকিসমূহ ছলমান খানৰ নিৰ্দেশতে দিয়া হৈছে। এই সন্দৰ্ভত বৃহস্পতিবাৰে যোধপুৰৰ ৰাতানাডা আৰক্ষী থানাত এক গোচৰ ৰুজু কৰা হৈছে। ঘটনা সন্দৰ্ভত প্ৰযোজক অমিত জানীয়ে কয়-‘বিগত দুবছৰ ধৰি মোক ডিঙি কাটি হত্যা কৰা, ঘৰ উৰুৱাই দিয়া আৰু পেট্ৰ’ল বোমা ব্যৱহাৰ কৰি আক্ৰমণ কৰাৰ ভাবুকি দি আহিছে। মই কোনো গেঙৰ সদস্য নহয়। মোৰ চলচ্চিত্ৰৰ বিষয়বস্তু সন্ত্রাসবাদ আৰু অপৰাধ-সংক্ৰান্ত। মই কেৱল প্ৰেমৰ গান বা ৰোমাণ্টিক চলচ্চিত্ৰ বনাই নাথাকো।’
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
