দেশৰ সৰ্ববৃহৎ ৰাজহুৱা খণ্ডৰ বেংক ভাৰতীয় ষ্টেট বেংক (SBI)ৰ গ্ৰাহকসকলৰ বাবে এক গুৰুত্বপূৰ্ণ খবৰ। কাইলৈ অৰ্থাৎ ১৯ নৱেম্বৰত প্ৰায় ৪৫ মিনিটৰ বাবে সাময়িকভাৱে বন্ধ থাকিব SBIৰ UPI সেৱা। বেংকৰ তৰফৰ পৰা কৰা নিৰ্ধাৰিত ৰক্ষণাবেক্ষণৰ কামৰ বাবে এই সিদ্ধান্ত গ্ৰহণ কৰা হৈছে। ফলত উক্ত সময়ছোৱাত গ্ৰাহকসকলে গুগল পে, ফোন পে, পেটিএম আদিৰ জৰিয়তে এছ বি আইৰ একাউণ্টৰ পৰা ইউপিআইৰ মাধ্যমেৰে ধনৰ লেনদেন কৰাত সমস্যাৰ সন্মুখীন হ’ব পাৰে।
কিমান সময়ত বন্ধ থাকিব সেৱা?
প্ৰকাশিত তথ্য অনুসৰি, ১৯ নৱেম্বৰৰ পুৱতি নিশা ১ বাজি ১৫ মিনিটৰ পৰা ২ বজালৈ প্ৰায় ৪৫ মিনিটৰ বাবে SBIৰ UPI সেৱা সাময়িকভাৱে ব্যাহত হ’ব। এই সময়ছোৱাত বেংকৰ ফালৰ পৰা প্ৰয়োজনীয় ৰক্ষণাবেক্ষণৰ কাম সম্পন্ন কৰা হ’ব। অৰ্থাৎ, উক্ত সময়ত গ্ৰাহকসকলে ইউপিআইৰ জৰিয়তে টকা পঠিওৱা, ধন গ্ৰহণ কৰা বা আন কোনো ধৰণৰ ডিজিটেল লেনদেন কৰোঁতে অসুবিধাৰ সন্মুখীন হ’ব পাৰে। সেয়েহে যিসকল গ্ৰাহকে নিশাৰ ভাগত UPIৰ জৰিয়তে ধনৰ লেনদেন কৰে, তেওঁলোকে এই বিষয়টো আগতীয়াকৈ মনত ৰখা উচিত।
কিয় বন্ধ থাকিব UPI সেৱা?
SBIৰ UPI সেৱা বন্ধ ৰখাৰ মূল কাৰণ হৈছে ৰক্ষণাবেক্ষণৰ কাম। বেংকৰ ডিজিটেল লেনদেন ব্যৱস্থা সুচাৰুৰূপে পৰিচালনা কৰা, সেৱাৰ মান উন্নত কৰা আৰু প্ৰযুক্তিগত সমস্যাসমূহ দূৰ কৰাৰ বাবে মাজে-সময়ে এনে ৰক্ষণাবেক্ষণৰ প্ৰয়োজন হয়। এই কামৰ সময়ছোৱাত ইউপিআই সেৱাত সাময়িকভাৱে প্ৰভাৱ পৰিব। অৱশ্যে বেংকে উল্লেখ কৰিছে যে নিৰ্ধাৰিত সময়তকৈ আগতেই ৰক্ষণাবেক্ষণৰ কাম সম্পূৰ্ণ হোৱাৰ সম্ভাৱনাও আছে। যদি কাম সোনকালে শেষ হয়, তেন্তে গ্ৰাহকসকলে নিৰ্ধাৰিত সময়ৰ আগতেই পুনৰ ইউপিআই সেৱা ব্যৱহাৰ কৰিব পাৰিব।
গ্ৰাহকে কেনেদৰে কৰিব পাৰিব ধনৰ লেনদেন?
ইউপিআই সেৱা সাময়িকভাৱে ব্যাহত হ’লেও গ্ৰাহকসকলৰ বাবে বিকল্প ব্যৱস্থা থাকিব। এই সময়ছোৱাত গ্ৰাহকে ইউপিআই লাইট (UPI Lite) সেৱা ব্যৱহাৰ কৰি ধনৰ লেনদেন কৰিব পাৰিব। ইউপিআই লাইট হৈছে সৰু পৰিমাণৰ ডিজিটেল ধনৰ লেনদেনৰ বাবে ব্যৱহাৰ কৰা এক বিশেষ সুবিধা। ইয়াৰ জৰিয়তে সাধাৰণ ইউপিআই লেনদেনৰ ওপৰত নিৰ্ভৰ নকৰাকৈ সহজে ধন পৰিশোধ কৰিব পাৰি। সেয়েহে এছ বি আইৰ সাধাৰণ ইউপিআই সেৱাত সমস্যা দেখা দিলেও ইউপিআই লাইট ব্যৱহাৰকাৰীসকলে এই সুবিধাৰ জৰিয়তে লেনদেন অব্যাহত ৰাখিব পাৰিব।
গ্ৰাহকৰ বাবে কি পৰামৰ্শ?
এছ বি আইৰ যিসকল গ্ৰাহকে নিশাৰ ভাগত অনলাইন পেমেণ্ট কৰে, তেওঁলোকে ১৯ নৱেম্বৰৰ পুৱতি নিশাৰ এই সময়ছোৱাৰ কথা মনত ৰখা উচিত। বিশেষকৈ জৰুৰী ধনৰ লেনদেন কৰিবলগীয়া থাকিলে নিৰ্ধাৰিত সময়ৰ আগতেই সেই কাম সম্পূৰ্ণ কৰি ৰখাটো ভাল। লগতে বিকল্প হিচাপে ইউপিআই লাইটৰ সুবিধাও ব্যৱহাৰ কৰিব পাৰে। মন কৰিবলগীয়া যে এই সাময়িক বাধা কেৱল নিৰ্ধাৰিত ৰক্ষণাবেক্ষণৰ সময়ছোৱাৰ বাবেহে। গতিকে এছ বি আইৰ গ্ৰাহকসকলে আতংকিত হোৱাৰ কোনো কাৰণ নাই। ৰক্ষণাবেক্ষণৰ কাম সম্পূৰ্ণ হোৱাৰ পিছত পুনৰ স্বাভাৱিকভাৱে ইউপিআই সেৱা ব্যৱহাৰ কৰিব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















