অসম লাইভ২৪ঃ অসম চৰকাৰ আৰু ব্ৰাইট ষ্টাৰ ইনভেচমেন্ট প্ৰাইভেট লিমিটেড, মুম্বাইৰ মাজত শুকুৰবাৰে বুজাবুজিৰ এখন চুক্তি স্বাক্ষৰিত হয়। গুৱাহাটীৰ দ্বিতীয়খন মেডিকেল কলেজৰ আন্তঃগাঁথনি নিৰ্মাণৰ বাবে সহায় কৰাৰ বাবে চুক্তি পত্ৰত স্বাক্ষৰ কৰে ষ্টাৰ ইনভেছমেন্ট প্ৰাইভেট লিমিটেডে।
অসম চৰকাৰৰ হৈ মুখ্যমন্ত্ৰী ড০ হিমন্ত বিশ্ব শৰ্মা আৰু স্বাস্থ্যমন্ত্ৰী কেশৱ মহন্ত উপস্থিত থকা সভাখনত ব্ৰাইট ষ্টাৰ ইনভেছমেন্ট প্ৰাইভেট লিমিটেডৰ হৈ প্ৰমোটাৰ ৰাধাকৃষ্ণ ডামানি উপস্থিত থাকে। মুখ্যমন্ত্ৰী কাৰ্যালয়ৰ প্ৰেক্ষাগৃহত অনুষ্ঠিত হোৱা সভাত ব্ৰাইট ষ্টাৰ ইনভেছমেন্ট প্ৰাইভেট লিমিটেডে মেডিকেল কলেডৰ বাবে আগতীয়াকৈ ৫ কোটি টকা প্ৰদান কৰে।
উল্লেখ্য যে ব্ৰাইট ষ্টাৰ ইনভেছমেন্ট প্ৰাইভেট লিমিটেডে গুৱাহাটীৰ দ্বিতীয়খন মেডিকেল কলেজৰ বাবে ১৫০ কোটি টকা আগবঢ়াব। প্ৰাগজ্যোতিষ মেডিকেল কলেজ নামেৰে গুৱাহাটীত হ’বলগীয়া দ্বিতীয়খন মেডিকেল কলেজ ২০২৪ চনৰ ভিতৰত শুভাৰম্ভ কৰিব বুলি জনায় মুখ্যমন্ত্ৰী ড০ হিমন্ত বিশ্ব শৰ্মাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
