পূজাৰ আনন্দ উলাহৰ মাজতে দুই পত্নীৰ হাতত প্ৰাণ হেৰুৱালে মেৰাপানীৰ এগৰাকী জোৱানে
ৰাজ্যবাসী পূজাৰ আনন্দ উলাহত মতলীয়া হৈ থকাৰ সময়তে গোলাঘাট জিলাৰ মেৰাপানীত সংঘটিত হৈছে এক সন্দেহজনক হত্যাকাণ্ডৰ ঘটনা। মেৰাপানীৰ পুলিবাগান এলেকাত দুই পত্নীৰ হাতত প্ৰাণ হেৰুৱালে সেনা জোৱান হিচাপে কাম কৰা স্বামীয়ে। দুই পত্নীৰ বিৰুদ্ধে সেনা জোৱান স্বামীক হত্যা কৰাৰ গুৰুতৰ অভিযোগ উত্থাপিত হৈছে।
ঘটনা সন্দৰ্ভত জানিব পৰা অনুসৰি, অৰুণাচল প্ৰদেশত কৰ্মৰত সেনা বাহিনীৰ জোৱান বেনুধৰ বৰা এমাহ পূৰ্বে চুটিত ঘৰলৈ বুলি আহিছিল। কিন্তু যোৱা নিশা নিজ গৃহতে হঠাৎ মৃত্যুমুখত পৰে । আত্মীয় স্বজন তথা ওচৰ চুবুৰীয়াই বেনুধৰ বৰাৰ মৃত্যু এক পৰিকল্পিত হত্যাকাণ্ড বুলি সন্দেহ কৰি অভিযোগৰ আঙুলি উঠিছে মৃতকৰ দুই পত্নীলৈ।
কিয়নো দুই পত্নী ক্ৰমে ময়ুৰী বৰা আৰু পিংকু বৰায়ে দীৰ্ঘদিনৰ পৰা স্বামী বেনুধৰ বৰাৰ ওপৰত শাৰীৰিক তথা মানসিক অত্যাচাৰ চলাই আহিছিল। তাতোকৈ ডাঙৰ চাঞ্চল্যকৰ কথা যে, দুই পত্নী সমকামী বুলি প্ৰশ্ন উত্থাপন কৰিছিল স্বামীয়ে।
অভিযোগ অনুসৰি দুই পত্নীৰ সমকামিতাৰ সম্পৰ্কত স্বামী বেনুধৰ বৰা হেঙাৰ হোৱাৰ বাবেই স্বামীৰ ওপৰত নিৰ্যাতন চলাই আহিছিল বুলি জানিব পৰা গৈছে। সেয়েহে প্ৰায়ে চুটিত ঘৰলৈ আহিলে নিজ গৃহৰ পৰিবৰ্তে জ্যোষ্ঠ ভগ্নীৰ ঘৰত আশ্ৰয় লৈছিল সেনা জোৱান বেনুধৰ বৰাই।
উল্লেখযোগ্য যে, বেনুধৰ বৰাৰ প্ৰথমা পত্নীয়েই জোৰ কৰি স্বামীৰ দ্বিতীয় বিবাহ কৰাইছিল। বেনুধৰ বৰাই মৃত্যুৰ সময়ত প্ৰথমা পত্নীৰ ফালৰ পৰা দুই পুত্ৰ, কন্যা সন্তানক এৰি থৈ গৈছে। স্থানীয় লোকৰ খবৰৰ ভিত্তিত মেৰাপানী আৰক্ষী ঘটনাস্থলীত উপস্থিত হৈ ঘটনাৰ তদন্ত আৰম্ভ কৰিছে। আৰক্ষীৰ তদন্ততহে সকলো কথা স্পষ্ট হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
