শ্বাহৰুখ খান৷ আক্ষৰিক অৰ্থতেই তেওঁ ইণ্ডাষ্ট্ৰিৰ কিং৷ অনুৰাগীসকলৰ মনত তেওঁ বাদশ্বাহ৷ একাধিকবাৰ মানৱধৰ্মত বিশ্বাসী বুলি প্ৰমাণ দিছে শ্বাহৰুখে৷ মানুহেই তেওঁৰ বাবে ভগৱান সেয়ে সাধাৰণ মানুহৰ মনত তেওঁ ভগৱান৷ অসমকো তেওঁ বান পৰিস্থিতিত সহায় কৰি থৈছে৷ শেহতীয়াকৈ বাদশ্বাহ শ্বাহৰুখ ঠিয় হৈছে বানবিধ্বস্ত পঞ্জাৱৰ জনতাৰ কাষত৷ কিং চিনেমাৰ শ্বুটিং কিংবা সন্তান আৰিয়ান খানৰ প্ৰথম পৰিচালিত ছিৰিজৰ প্ৰচাৰৰ ব্যস্ততা যিমানেই নাথাকক কিয় তেওঁৰ স্বেচ্ছাসেৱী সংস্থা মীৰা ফাউণ্ডেছন কিন্তু প্ৰতিনিয়ত ব্যস্ত হৈ আছে অসহায়ৰ সেৱাৰ বাবে৷ বানবিধ্বস্ত পঞ্জাৱৰ ক্ষেত্ৰতো ব্যতিক্ৰম নহ’ল মীৰা ফাউণ্ডেছন৷
বিগত ৩৭ বছৰৰ পাছত আকৌ ভয়াৱহ বানৰ কৱলত পৰিছে পঞ্জাৱ৷ লেথাৰিকৈ বৰষুণ দি থকাৰ বাবে পানীৰ তলত পঞ্জাৱৰ বিস্তীৰ্ণ এলেকা৷ বাঢ়িছে মৃতকৰ সংখ্যাও৷ পৰিস্থিতি ইমানেই ভয়ংকৰ যে পঞ্জাৱত বহু ঠাইত এতিয়া হাই এলাৰ্ট জাৰি কৰা হৈছে৷ পঞ্জাৱক বিপৰ্যস্ত ৰাজ্য হিচাপে ঘোষণা কৰিছে আপ চৰকাৰে৷ দিনে নিশাই চলিছে উদ্ধাৰকাৰ্য৷ আৰ্মি, নেভি আৰু বায়ুসেনাও নামিছে উদ্ধাৰ অভিযানত৷ তেনে সময়তে জলমগ্ন পঞ্জাৱৰ কাষত প্ৰচাৰ বিহীনভাৱেই থিয় হৈছে কিং খান৷
বাদশ্বাহ শ্বাহৰুখৰ স্বেচ্ছাসেৱী সংস্থা মীৰা ফাউণ্ডেছনে পঞ্জাৱৰ স্থানীয় স্বেচ্ছাসেৱী সংস্থাসমূহৰ সৈতে কান্ধ মিলাই উদ্ধাৰ কাৰ্য আৰম্ভ কৰিছে৷ ইয়াৰোপৰি বান বিধ্বস্তসকলৰ প্ৰয়োজনীয় বিভিন্ন সামগ্ৰীও যোগান ধৰিছে তেওঁলোকে৷ ঔষধপাতি পঠিওৱা চিকিৎসক পঠিওৱা আদিৰ দৰে কাম নিজেও তদাৰক কৰিছে কিং খানে৷ জনা গৈছে শ্বাহৰুখ খানৰ তৰফৰ পৰা এই পৰিসেৱা ইতিমধ্যেই পাইছে অমৃতসৰ, পাতিয়ালা, ফজিলকা, ফিৰোজপুৰসহ পঞ্জাৱৰ একাধিক বন্যাকৱলিত এলেকাৰ বাসিন্দাই এই পৰিসেৱা লাভ কৰিছে৷
কিং খানৰ মীৰা ফাউণ্ডেছনৰ প্ৰতিশ্ৰুতি, বন্যাৰ্ত পৰিয়ালসমূহক পুনৰাই মূৰৰ ওপৰত এখন ছাদ গঢ়ি দিয়াতো সহায় কৰিব কিং খানৰ ফাউণ্ডেছনে৷ ইয়াৰ পূৰ্বে পঞ্জাৱবাসীসকলৰ মানসিক শক্তি প্ৰদানৰ কামনাতে এক্সত তেওঁ এটা পোষ্টো কৰিছে৷ তাত তেওঁ লিখিছে, ‘ভয়াৱহ বানত ক্ষতিগ্ৰস্থ পঞ্জাৱৰ মানুহৰ বাবে আমাৰ মনেও কান্দি উঠিছে৷ সকলোৰে বাবে প্ৰাৰ্থনা কৰিছো আৰু ঈশ্বৰৰ ওচৰত শক্তি কামনা কৰিছো৷ পঞ্জাৱৰ মনোবৰ যেন কাহানিও ভাঙি নপৰে৷ ঈশ্বৰে তেওঁলোকৰ মঙ্গল কৰক৷’ লগতে ১৫০০ পৰিয়ালক অন্ন আৰু সংস্থাপনৰো দায়িত্ব লৈছে শ্বাহৰুখ খানে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
