দেশৰ ৯খন গাঁৱত ৪২ দিনলৈ মোবাইল, টিভি-ৰেডিঅ’ নিষিদ্ধ, উচ্চস্বৰত কথা কোৱাতো বাধা
হিমাচল প্ৰদেশক ভাৰতৰ দেৱভূমি বুলি জনা যায়। এই ৰাজ্যত বহু দেৱ-দেৱী বাস কৰে বুলি মান্যতা আছে। কংৰা, শিমলা, মাণ্ডী, বিলাসপুৰকে ধৰি বিভিন্ন জিলাত কোনোবা নহয় কোনোবা বিখ্যাত শক্তি পীঠো আছে, য’ত প্ৰতি বছৰে লাখ লাখ ভক্তই এই মন্দিৰসমূহ দৰ্শন কৰে।
পাছে এই ৰাজ্যৰে ৯ খন গাঁৱত অহা ৪২ দিনলৈ বহু ক্ষেত্ৰত নিশেধাজ্ঞা আৰোপ কৰা হৈছে। ৪২ দিনলৈ মোবাইল, টিভি-ৰেডিঅ’ নিষিদ্ধ ৯ খন গাঁৱত, কেৱল সিমানেই নহয় এই ৯ খন গাঁৱত উচ্চস্বৰত কথা কোৱাৰ ক্ষেত্ৰতো নিষেধাজ্ঞা জাৰি কৰা হৈছে।
এই নিয়মৰ মূলতে হৈছে ৰাজ্যৰ কুল্লু জিলাত দেৱ পৰম্পৰা। সৰ্বাধিক প্ৰচলিত এই পৰম্পৰাৰ বাবেই আজি মঙলবাৰৰ মকৰ সংক্ৰান্তিৰ দিনৰে পৰা ৯ খন গাঁৱত মন্দিৰৰ দুৱাৰ বন্ধ কৰি দিয়া হৈছে। ইয়াৰ উপৰিও কোলাহল কৰাৰ ওপৰত নিষেধাজ্ঞা আৰোপ কৰা হৈছে।
হিমাচল প্ৰদেশৰ কুল্লু জিলাৰ পৰ্যটন চহৰ মানালীত এনে এলেকা আছে, য’ত আজিও মানুহে নিজৰ প্ৰাচীন সংস্কৃতি সংৰক্ষণ কৰি ৰাখিছে। এতিয়া ইয়াৰ গাঁওবাসীয়ে আগন্তুক ৪২ দিনলৈ টিভি অন নকৰে, মন্দিৰত পূজাও নকৰে। আমোদজনক কথাটো হ’ল এই সময়ছোৱাত সমগ্ৰ গাঁওখনৰ মোবাইল ফোনসমূহো চাইলেণ্ট মোডত থাকিব।
মান্যতা অনুসৰি এইদৰে শান্তি বৰ্তাই ৰখাৰ বাবে দেৱ-দেৱীয়ে আদেশ কৰে। এই আদেশ অনুসৰিয়ে ইয়াত ৪২ দিন ৯ গাঁৱত কোনোধৰণৰ হাই-উৰুমি নাথাকে, আনকি মন্দিৰৰৰ ঘণ্টা পৰ্যন্ত ওপৰত তুলি ৰখা হয়। উল্লেখযোগ্য যে এই পৰম্পৰা সেই ৯ গাঁৱত প্ৰতি বছৰে পালন কৰা হয়।
গাঁওবাসীৰ মতে এই আদেশ গৌতম ঋষি, বিয়াছ ঋষি আৰু নাগ দেৱতাই জাৰি কৰিছিল। বিশ্বাস কৰা হয় যে মকৰ সংক্ৰান্তিৰ পিছত উপত্যকাৰ আৰাধ্য দেৱ-দেৱীসকলে নিজৰ তপস্যাত মগ্ন হৈ পৰে আৰু এনে পৰিস্থিতিত দেৱ-দেৱীক নিস্তব্ধ পৰিৱেশৰ প্ৰয়োজন হয় আৰু এই কাৰণেই টিভি, ৰেডিঅ’ আৰু ম’বাইল বন্ধ হৈ থাকে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
