যুদ্ধবিৰতি চুক্তিৰ মাজতে গাজা ষ্ট্ৰিপত পুনৰ আক্ৰমণ, ১৮ নিহত
ইজৰাইল আৰু হামাছৰ মাজত যুদ্ধবিৰতি চুক্তিৰ আলোচনা চলি থকাৰ মাজতে ইজৰাইলে পুনৰ গাজা ষ্ট্ৰিপত আক্ৰমণ কৰে। এই আক্ৰমণত মহিলা আৰু শিশুসহ ১৮ জন লোকে প্ৰাণ হেৰুৱায়। য়েমেনৰ ইৰাণ সমৰ্থিত হাউথী বিদ্ৰোহীয়ে মঙলবাৰে মধ্য ইজৰাইলত ক্ষেপণাস্ত্ৰ আক্ৰমণ চলায়।
স্বাস্থ্য বিষয়াসকলে জনোৱা মতে, গাজাৰ মধ্য চহৰ ডেইৰ আল বালাহত সংঘটিত হোৱা দুটা আক্ৰমণত দুগৰাকী মহিলা আৰু তেওঁলোকৰ চাৰিটা সন্তান নিহত হয়। শিশুসকলৰ বয়স এমাহৰ পৰা ন বছৰলৈকে আছিল বুলি সদৰি। মৃতদেহকেইটা আল-আকছা শ্বহীদ চিকিৎসালয়ত ৰখা হৈছে। মৃত্যু হোৱা এগৰাকী মহিলা গৰ্ভৱতী আছিল বুলিও জানিব পৰা গৈছে।
ইয়াৰ উপৰিও ইউৰোপীয় চিকিৎসালয়খনে জনোৱা মতে, দক্ষিণৰ খান ইউনিছ চহৰত সংঘটিত দুটা আক্ৰমণত ১২ জন লোক নিহত হৈছে।
ইজৰাইলৰ সেনাই অৱশ্যে এতিয়ালৈকে এই আক্ৰমণৰ কোনো সঁহাৰি দিয়া নাই। ইজৰাইলে ধাৰাবাহিকভাৱে কৈ আহিছে যে তেওঁলোকে কেৱল হামাছৰ যোদ্ধাকহে লক্ষ্য কৰি লৈছে।
উল্লেখ্য যে, ইজৰাইল আৰু হামাছৰ মাজত যুদ্ধবিৰতি চুক্তি সন্দৰ্ভত আলোচনা অব্যাহত আছে। কোৱা হৈছে যে ইজৰাইল আৰু হামাছৰ মাজত যুদ্ধবিৰতি আলোচনা চূড়ান্ত পৰ্যায়ত উপনীত হৈছে। হামাছে প্ৰথম পৰ্যায়ত ৩৩ জন ইজৰাইলী পণবন্দীক মুকলি কৰি দিবলৈ সন্মত হৈছে। কোৱা হৈছে যে মঙলবাৰে কাটাৰৰ দোহাত এই চুক্তি সন্দৰ্ভত চূড়ান্ত ৰাউণ্ডৰ আলোচনা অনুষ্ঠিত হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
