মানৱেন্দ্ৰ কুমাৰ দাসঃ যোৱা ৩০ জুনত মহাৰাষ্ট্ৰৰ মুখ্যমন্ত্ৰী আৰু উপমুখ্যমন্ত্ৰী হিচাপে শপতগ্ৰহণ কৰিছিল ক্ৰমে একনাথ সিন্দে আৰু দেৱেন্দ্ৰ ফাড়নাৱিছে৷ তাৰ পাছতে আৰম্ভ হ’ল মন্ত্ৰীসভা গঠন প্ৰক্ৰিয়া৷
কিন্তু সেইসময়তে থমকি ৰ’বলগীয়া হয় মুখ্যমন্ত্ৰী একনাথ সিন্দে আৰু উপমুখ্যমন্ত্ৰী দেৱেন্দ্ৰ ফাড়নাৱিছ৷ ইফালে মন্ত্ৰীসভাৰ সম্প্ৰসাৰণক লৈ একনাথ সিন্দে শিবিৰৰ ৪২ গৰাকী বিধায়ক আৰু বিজেপিৰ মাজত সৃষ্টি হৈছে উৎকণ্ঠাৰ৷ কিন্তু কিয়?
৯ জুলাইত দিল্লীত গৃহমন্ত্ৰী অমিত শ্বাহেৰে বৈঠক। ৬ ঘণ্টীয়া বৈঠকৰ অন্তত মন্ত্ৰীসভাক লৈ সিদ্ধান্ত। ১১ জুলাইলৈ স্থগিত মন্ত্ৰীসভা গঠন প্ৰক্ৰিয়া। সুভাষ দেশায়ে বাধা দিলে একনাথ সিন্দেক।
মহাৰাষ্ট্ৰৰ নতুন মন্ত্ৰীসভা গঠনৰ বাবে একনাথ সিন্দে আৰু কেন্দ্ৰীয় গৃহমন্ত্ৰী অমিত শ্বাহে প্ৰস্তুতি সম্পূৰ্ণ কৰি তোলাৰ সময়তে সৃষ্টি হৈছে বাধাৰ৷
মুখ্যমন্ত্ৰী একনাথ সিন্দেৰ বৈধতাক লৈ উচ্চতম ন্যায়ালয়ত গোচৰ দাখিল প্ৰাক্তন মুখ্যমন্ত্ৰী উদ্ধৱ থাকৰেৰ অতি ঘনিষ্ঠ তথা শিৱসেনাৰ নেতা সুভাষ দেশায়ে মুখ্যমন্ত্ৰী একনাথ সিন্দেক ন্যায়ালয়ত জনালে প্ৰত্যাহ্বান৷
১১ জুলাইত দেশৰ সৰ্বোচ্চ ন্যায়ালয়ে শুনানি গ্ৰহণ কৰিব সেই গোচৰৰ৷ সেইবাবে মন্ত্ৰীসভা গঘন প্ৰক্ৰিয়া স্থগিত ৰাখিবলৈ বাধ্য হ’ল মুখ্যমন্ত্ৰী একনাথ সিন্দে আৰু বিজেপিৰ শীৰ্ষ নেতৃত্ব৷
অন্য অৰ্থত একনাথ সিন্দে আৰু বিজেপিৰ সন্মিলিত চৰকাৰক প্ৰথমটো বাধা দিবলৈ সক্ষম হৈছে শিৱসেনাৰ মুৰব্বী উদ্ধৱ থাকৰে৷
অৱশ্যে তাৰ মাজতো মন্ত্ৰীসভাৰ প্ৰাৰম্ভিক খচৰা সাজু হোৱাৰ তথ্যও অসম লাইভ ২৪ৰ হাতত পৰিছে৷ মন্ত্ৰীসভাত কাৰ কি স্থান হ’ব?
মহাৰাষ্ট্ৰত মন্ত্ৰীসভাত কাৰ সংখ্যা অধিক হ’ব? ৪০ৰ পৰা ৪৫ জনীয়া হ’ব পাৰে মন্ত্ৰীসভা। বিজেপি ভাগত পৰিব অধিক মন্ত্ৰী। মন্ত্ৰীসভাত ২৫-২৮ গৰাকী হ’ব বিজেপিৰ মন্ত্ৰী।
সিন্দে শিবিৰে পাব সৰ্বাধিক ১৫ মন্ত্ৰী। দেৱেন্দ্ৰ ফাড়নাৱিছলৈ আহিব অধিক ক্ষমতা।
ইফালে কেন্দ্ৰীয় গৃহমন্ত্ৰী অমিত শ্বাহৰ এক ঘনিষ্ঠ সূত্ৰৰ পৰা সম্ভেদ পোৱা অনুসৰি মন্ত্ৰীসভাত সৰ্বাধিক ৪৫ গৰাকী মন্ত্ৰী থাকিব৷ বিজেপিয়ে ২৫ৰ পৰা ২৮ গৰাকী লাভ কৰাৰ সম্ভাৱনা আছে৷
তাৰ বিপৰীতে একনাথ সিন্দে শিবিৰৰ পৰা মুখ্যমন্ত্ৰীসহ সৰ্বাধিক ১৭ গৰাকী মন্ত্ৰী থাকিব পাৰে৷ মহাৰাষ্ট্ৰৰ উপমুখ্যমন্ত্ৰী দেৱেন্দ্ৰ ফাড়নাৱিছে গৃহ ৰাজহ আৰু বিত্তীয় বিভাগৰ দায়িত্ব লাভ কৰা নিশ্চিত হৈছে৷
তাৰ লগতে জলসম্পদ নগৰ উন্নয়ন, কৃষি আৰু গড়কাপ্তানি বিভাগো বিজেপিৰ নিজৰ দখলত ৰাখিব৷ অন্য অৰ্থত মুখ্যমন্ত্ৰী একনাথ সিন্দে হয়তো কাৰ্যক্ষেত্ৰত সম্পূৰ্ণভাৱে উপমুখ্যমন্ত্ৰী দেৱেন্দ্ৰ ফাড়নাৱিছৰ ওপৰত নিৰ্ভৰশীল হ’ব লাগিব৷
উল্লেখ যোগ্য যে উপমুখ্যমন্ত্ৰী দেৱেন্দ্ৰ ফাড়নাৱিছে ইয়াৰ পূৰ্বেও সংবাদমাধ্যমত প্ৰকাশ কৰিছিল যে মহাৰাষ্ট্ৰত বিজেপিৰ ক্ষমতা বৃদ্ধিৰ লক্ষ্যৰেহে দলে তেওঁক উপমুখ্যমন্ত্ৰীৰ দায়িত্ব দিছে৷
কিয়নো কেন্দ্ৰীয় গৃহমন্ত্ৰী তথা বিজেপিৰ অন্যতম ৰণকৌশল প্ৰস্তুতকাৰী নেতা অমিত শ্বাহৰ প্ৰত্যক্ষ নিৰ্দেশত উপমুখ্যমন্ত্ৰীৰ পদ লৈছিল দেৱেন্দ্ৰ ফাড়নাৱিছে৷
১১ জুলাইত আদালতৰ ৰায়ৰ পাছতে হয়তো মন্ত্ৰীসভা গঠন প্ৰক্ৰিয়া চূড়ান্ত হ’ব৷ কিন্তু তাৰ পূৰ্বে এইটো স্পষ্ট হৈ উঠিছে যে মহাৰাষ্ট্ৰত শিৱসেনা আৰু বিজেপি মিত্ৰজোঁট চৰকাৰ পৰিচালিত হ’ব উপমুখ্যমন্ত্ৰী দেৱেন্দ্ৰ ফাড়নাৱিছৰ নীতি অনুসৰিহে৷
অৰ্থাৎ শিৱসেনা শক্তিহীন কৰি বিজেপিয়ে এককভাৱে মহাৰাষ্ট্ৰৰ শাসনভাৰ পৰিচালনা কৰাৰ সকলো পৰিকল্পনা চূড়ান্ত হৈছে৷ তৎসত্ত্বেও আগন্তুক সময়ছোৱাত শিৱসেনা আৰু একনাথ সিন্দে শিবিৰৰ ৰাজনৈতিক কৌশল বিশেষভাৱে লক্ষ্যণীয় হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
