সংগ্ৰামৰ আন এক নাম জীৱন…সপোন তেওঁলোকৰো আছে, ইচ্ছা তেওঁলোকৰো আছে পৃথিৱীখন এবাৰ চোৱাৰ। কিন্তু নিয়তিয়ে সেয়া বিচৰা নাছিল। আপুনি হয়তো দেখিছে, এখন ঘৰৰ এজন ব্যক্তিয়ে চকুৰে নেদেখা। কিন্তু এখন ঘৰৰে ৭ জন সদস্যৰ ৬ গৰাকীয়ে চকুৰে নেদেখাৰ কথা শুনিছিলনে? তথাপিও তেওঁলোকে অদম্য ইচ্ছাশক্তিৰে চলাই গৈছে জীৱন সংগ্ৰাম।
আচৰিত যেন লাগিলেও এয়াই সঁচা। জন্মৰ পৰা পৃথিৱীৰ কোনো ৰং স্বচক্ষুৰে দেখা নাই পৰিয়ালটোৰ সদস্যকেইজনে। মাতৃৰ বাহিৰে আটাইকেইটা সন্তানৰ লগতে পিতৃও দৃষ্টিহীন। তেওঁলোকে মাত্ৰ মাতৃৰ চকুৰে পৃথিৱীখন দৰ্শন কৰিছে, তেওঁলোকে শুনিছে পৃথিৱীখন কেনেকুৱা!
আপুনি বা মই হয়তো কেতিয়াও কল্পনা কৰিব নোৱাৰা এক ঘটনা। পৰিয়ালটোৰ এইকেইজন সদস্যই বহু কষ্ট কৰি নিজৰ জীৱন-জীৱিকা চলাই গৈছে। কেতিয়াও তেওঁলোকে জীৱনকলৈ আক্ষেপ কৰা নাই। সকলোৱে নিজৰ নিজৰ প্ৰতিভাৰে জগত জিনিবলৈ কৰিছে মাথোঁ দুৰ্বাৰ হাবিয়াস। কোনোৱে যদি বজাইছে গীতাৰ, কোনোৱে বজাইছে কি-বৰ্ড আন কোনোৱে সংগ দিছে সংগীত পৰিৱেশনত। কেৱল সেয়াই নহয়, পিতৃয়ে অন্ধ হৈয়ো সন্তানৰ প্ৰতিটো আশা-ভৰষা পূৰণ কৰিবলৈ চেষ্টা কৰি গৈছে আৰু তেওঁক সহায় কৰি গৈছে পত্নীয়ে।
আজিকালি মানুহে সহজে বিলাসী জীৱন উদযাপন কৰিবলৈ বিচাৰে। সমাজৰ আন একাংশ লোকে সহজলভ্য ধনৰ পিছতো দৌৰি ফুৰে। পিছে এই পৰিয়ালটোৱে শাৰীৰিক প্ৰতিবন্ধকতা থকা সত্ত্বেও আনৰ ওপৰত ভৰষা নকৰি সৎ কামেৰে জীৱন পথত আগবাঢ়িবলৈ চেষ্টা কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
