আমি যেতিয়াই ভ্ৰমণলৈ যাওঁ, তেতিয়াই প্ৰথমে থকাৰ বাবে এখন হোটেল বিচাৰোঁ। কিন্তু আপুনি কেতিয়াবা লক্ষ্য কৰিছে নে যে প্ৰায়বোৰ হোটেলত ১৩ নম্বৰৰ কোঠাটো নাথাকে? ১২ নম্বৰ ৰূমৰ কাষৰ ৰূমটোত পোনে পোনে ১৪ নম্বৰ লিখা থাকে, অথবা কিছুমান ৰূমত হয়টো 12(A) বুলি লিখা থাকে। এয়া আচৰিত যেন লাগিলেও, ইয়াৰ আঁৰত আছে ইতিহাস, ধৰ্মীয় বিশ্বাস, সংস্কৃতি আৰু ব্যৱসায়িক যুক্তিৰ এক আকৰ্ষণীয় সংমিশ্ৰণ।
পশ্চিমীয়া সংস্কৃতিত ১৩ সংখ্যাক অশুভ বুলি ধৰা হয়
বহু পশ্চিমীয়া দেশত ১৩ সংখ্যাক বহু যুগ ধৰি অশুভ আৰু অমংগলীয়া বুলি বিশ্বাস কৰা হয়। খ্ৰীষ্টান ধৰ্মীয় বিশ্বাস অনুসৰি, যীশুখ্ৰীষ্টৰ শেষ ভোজত মুঠ ১৩ জন লোক উপস্থিত আছিল। এই ১৩ জনৰ ভিতৰত ১৩ তম ব্যক্তি আছিল Judas Iscariot, যিয়ে পিছত যীশুক বিশ্বাসঘাতকতা কৰিছিল। এই ঘটনাৰ বাবেই ১৩ সংখ্যাক অশুভ বুলি ধৰা হয়। সময়ৰ লগে লগে এই বিশ্বাস ইমানেই শক্তিশালী হৈ উঠে যে বহু লোকৰ মনত ১৩ সংখ্যাৰ প্ৰতি এক বিশেষ ভয়ৰ সৃষ্টি হয়। মনোবিজ্ঞানত এই ভয়ক Triskaidekaphobia নামেৰে জনা যায়।
নৰ্ডিক পৌৰাণিক কাহিনীতো ১৩ সংখ্যাৰ নেতিবাচক ধাৰণা
নৰ্ডিক পৌৰাণিক কাহিনীতো ১৩ সংখ্যাৰ সৈতে এক অশুভ ধাৰণা জড়িত। কাহিনী অনুসৰি, ১৩ তম দেৱতা লোকি আছিল প্ৰতাৰণা, কপটতা আৰু অশুভ শক্তিৰ প্ৰতীক। লোকিৰ ষড়যন্ত্ৰৰ ফলতেই সৌন্দৰ্য, শান্তি আৰু পোহৰৰ দেৱতা বাল্ডাৰৰ মৃ*ত্যু হৈছিল বুলি বিশ্বাস কৰা হয়। সেইবাবেই নৰ্ডিক পৰম্পৰাতো ১৩ সংখ্যাক শুভ বুলি গণ্য কৰা নহয়। চলচ্চিত্ৰ আৰু সাহিত্যই এই বিশ্বাসক অধিক শক্তিশালী কৰিছে। বহু পশ্চিমীয়া চলচ্চিত্ৰ, উপন্যাস আৰু ভৌতিক কাহিনীত ১৩ সংখ্যাক বহু সময়ত ৰহস্য, ভয় আৰু অশুভ ঘটনাৰ সৈতে জড়িত কৰি উপস্থাপন কৰা হৈছে।
ব্যৱসায়িক কাৰণো আছে
হোটেল উদ্যোগৰ ক্ষেত্ৰতো ইয়াৰ এক বাস্তৱিক দিশ আছে। বহু অতিথিয়ে ১৩ নম্বৰৰ কোঠাত থাকিবলৈ অনিচ্ছুক হয়। ফলত এনে কোঠাবোৰ সহজে বুকিং নহয় আৰু ব্যৱসায়িক ক্ষতিৰ সম্ভাৱনা থাকে। এই কাৰণেই বহু হোটেলত ১৩ নম্বৰৰ পৰিৱৰ্তে 12A ব্যৱহাৰ কৰে। বহু হোটেলত আকৌ ১২ৰ পিছতে পোনে পোনে ১৪ নম্বৰ ৰূম বুলি উল্লেখ কৰা হয়।
সকলো হোটেলত একেই নিয়ম নেকি?
অৱশ্যে, বিশ্বৰ সকলো হোটেলতে এই নিয়ম অনুসৰণ কৰা নহয়। এছিয়া আৰু অন্যান্য বহু দেশত ১৩ সংখ্যাক লৈ বিশেষ কোনো নেতিবাচক বিশ্বাস নাথাকে। সেইবাবে তেনে ঠাইত ১৩ নম্বৰৰ কোঠা বা ১৩ তম মহলা স্বাভাৱিকভাৱে দেখা যায়। হোটেলত ১৩ নম্বৰৰ কোঠা বা মহলা নথকাৰ মূল কাৰণ কোনো আইন বা বাধ্যবাধকতা নহয়; বৰঞ্চ পশ্চিমীয়া কুসংস্কাৰ, ধৰ্মীয় আৰু পৌৰাণিক বিশ্বাস, সমাজত গঢ় লৈ উঠা মানসিকতা আৰু ব্যৱসায়িক স্বাৰ্থৰ সংমিশ্ৰণেই ইয়াৰ মূল ভিত্তি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
