সোমবাৰৰ পৰা অসম বিধানসভাৰ চলিত বৰ্ষৰ বাজেট অধিবেশন আৰম্ভ হৈছে৷ অধিবেশনৰ আজিৰ প্ৰথমটো দিনতে সদনৰ পৰা বহিষ্কাৰ হ’ল ৰাইজৰ দলৰ সভাপতি তথা শিৱসাগৰ বিধানসভা সমষ্টিৰ বিধায়ক অখিল গগৈ৷
বাজেট অধিবেশনৰ আৰম্ভণিৰ দিনটোৰ ৰাজ্যপালৰ বাজেট ভাষণৰ সময়তে নিজ আসনৰ পৰা থিয় হৈ প্ৰতিবাদ সাব্যস্ত কৰাৰ বাবে অধ্যক্ষ বিশ্বজিৎ দৈমাৰীয়ে বিধায়ক অখিল গগৈক সদনৰ পৰা বহিষ্কাৰ কৰে৷
উল্লেখ্য যে ৰাজ্যপাল প্ৰফেছৰ জগদীশ মুখীয়ে বাজেট ভাষণ দি থকা সময়তে বিধায়ক অখিল গগৈয়ে ‘১০ মে’ৰ ভিতৰত ১ লাখ নিৱনুৱাক নিযুক্তি দিয়ক’ লিখা প্লে কাৰ্ড লৈ সদনৰ মজিয়াতে প্ৰতীকী প্ৰতিবাদ সাব্যস্ত কৰিছিল৷
লগতে পঢ়ক কেন্সাৰ আৰু মানসিক বিকাৰগ্ৰস্ততাত আক্ৰান্ত ৰাছিয়াৰ ৰাষ্ট্ৰপতি ভ্লাদিমিৰ পুটিন!
ৰাজ্যপালে বাজেট ভাষণত মিথ্যাচাৰৰ আশ্ৰয় লোৱা বুলিও গুৰুতৰ অভিযোগ তুলি বিধায়ক গগৈয়ে প্ৰতিবাদ কৰি সদন উত্তাল কৰে৷ বিধায়ক গগৈয়ে তথ্যসহকাৰে ৰাজ্যপালে বাজেট ভাষণত চাকৰি নিযুক্তিৰ ক্ষেত্ৰত মিথ্যাচাৰৰ আশ্ৰয় লোৱা বুলি গুৰুতৰ অভিযোগ কৰাৰ লগতে চৰকাৰে ঘোষণা কৰা ১ লাখ চাকৰিৰ নিযুক্তি কেতিয়া দিব বুলিও প্ৰশ্ন কৰিছিল৷
বিধানসভাৰ অধ্যক্ষই ৰাজ্যপালৰ ভাষণৰ পাছত তেওঁৰ ভাষণ ৰাখিবলৈ অনুৰোধ কৰিছিল যদিও ক্ষান্ত হোৱা নাছিল বিধায়ক অখিল গগৈ। ইয়াৰ পিছতে বাহিৰত ধৰ্ণা দিয়কগৈ বুলি মন্তব্য কৰি অধ্যক্ষ বিশ্বজিৎ দৈমাৰীয়ে বিধায়ক অখিল গগৈক বহিষ্কাৰ কৰে৷
বহিষ্কাৰ হোৱাৰ পিছতে সদনৰ বাহিৰত বিধায়ক অখিল গগৈয়ে সংবাদ মাধ্যমৰ আগত ৰাজ্যপালে বাজেট ভাষণত মিছা কথা আৰু তথ্য সন্নিৱিষ্ট কৰা বুলি মন্তব্য কৰে৷
লগতে পঢ়ক নতুন শিক্ষা নীতি মঞ্জুৰ কেন্দ্ৰীয় কেবিনেটৰ, নৱম মানৰ পৰাই আৰম্ভ হ’ব ছেমিষ্টাৰ পদ্ধতি
ইফালে, সদনৰ বাহিৰত বিধায়ক অখিল গগৈয়ে চৰকাৰে ১ লাখ চাকৰি নিযুক্তি আৰু ছয় জনগোষ্ঠী জনজাতিকৰণক লৈ মিথ্যাচাৰৰ আশ্ৰয় লোৱা আৰু প্ৰতিশ্ৰুতি পালনত ব্যৰ্থ হোৱা বুলি গুৰুতৰ অভিযোগ কৰে৷
উল্লেখ্য যে ১ এপ্ৰিললৈকে চলিবলগীয়া অসম বিধানসভাৰ বাজেট অধিৱেশন আজিৰ পৰা আৰম্ভ হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
