ছ’চিয়েল মিডিয়াত দ্ৰুতগতিত ভাইৰেল হৈ পৰিছে অভিনেত্ৰী স্বৰা ভাস্কৰৰ এটা পুৰণি ভিডিঅ’। ভিডিঅ’টোত ‘পদ্মাৱত’ ছবিখন চোৱাৰ পিছত কিয় তেওঁ ইমান ক্ষুব্ধ হৈছিল, সেই বিষয়ে মুকলিকৈ মন্তব্য কৰা দেখা গৈছে। প্ৰায় আঠ বছৰ পূৰ্বে ছবিখনৰ পৰিচালক সঞ্জয় লীলা ভাঞ্চালীলৈ স্বৰাই এখন মুকলি চিঠি লিখিছিল। ছবিখনত জৌহৰ আৰু সতীক মহিমামণ্ডিত কৰা হৈছে বুলি অভিযোগ তুলি সেই সময়ত তেওঁ কেইবাটাও প্ৰশ্ন উত্থাপন কৰিছিল। স্বৰাৰ সেই চিঠিক লৈ তেতিয়া ছ’চিয়েল মিডিয়া আৰু চলচ্চিত্ৰ জগতত তীব্ৰ বিতৰ্কৰ সৃষ্টি হৈছিল। এতিয়া দিল্লীৰ এটা অনুষ্ঠানত অভিনেত্ৰীগৰাকীয়ে পুনৰ সেই পুৰণি বিষয়টো উত্থাপন কৰাত ভিডিঅ’টো নতুনকৈ ভাইৰেল হৈছে।
ভাইৰেল ভিডিঅ’টোত স্বৰাই কয় যে ‘পদ্মাৱত’ত প্ৰায় ৮০০গৰাকী মহিলাই জৌহৰ কৰা দেখুওৱা হৈছিল অৰ্থাৎ ছবিখনত প্ৰায় ৮০০গৰাকী মহিলাই শত্রুৰ হাতত বন্দী হোৱাৰ আশংকাত জুইত সমূহীয়াভাৱে আত্মাহুতি দিয়া দৃশ্য দেখুওৱা হৈছিল। এই দৃশ্য চোৱাৰ পিছত তেওঁৰ মনত এটা গভীৰ প্ৰশ্ন উদয় হৈছিল। স্বৰাৰ মতে, যদি ভগৱানে নকৰক, তেওঁ নিজেই ধ*ৰ্ষণৰ বলি হ’লহেঁতেন, তেন্তে ছবিখনে তেওঁক কি বাৰ্তা দিলেহেঁতেন? তেওঁ কয় যে এনে পৰিস্থিতিত তেওঁ নিজকে ভীৰু যেন অনুভৱ কৰিলেহেঁতেন। ইয়াৰ পিছতে স্বৰাই এটা গুৰুত্বপূৰ্ণ প্ৰশ্ন উত্থাপন কৰে—সমাজে নাৰীক এই বাৰ্তাই দিব বিচাৰেনে যে ধৰ্ষ*ণৰ বলি হ’লে তেওঁলোকৰ জীয়াই থকাৰ অধিকাৰ নাই? তেওঁ লগতে প্ৰশ্ন কৰে, “ধ*ৰ্ষণ এগৰাকী নাৰীৰ জীৱনৰ অন্ত নেকি?”
কেৱল জৌহৰৰ দৃশ্যই নহয়, ছবিখনৰ আন এটা দৃশ্যও স্বৰাৰ বাবে যথেষ্ট আমনিদায়ক আছিল বুলি উল্লেখ কৰিছে। তেওঁ উল্লেখ কৰে যে ছবিখনত এগৰাকী গৰ্ভৱতী মহিলাৰ পেটৰ ক্ল’জ আপ দৃশ্য দেখুওৱা হৈছিল। স্বৰাৰ মতে, এই দৃশ্যটো চোৱাৰ সময়ত তেওঁৰ মনলৈ আহিছিল—গৰ্ভস্থ সন্তানটো যদি ছোৱালী হয়, তেন্তে ভৱিষ্যতে তাই ধ*ৰ্ষণৰ বলি হ’ব পাৰে বুলি ভাবি তাইৰ জন্মৰ অধিকাৰক লৈও প্ৰশ্ন কৰিব নেকি? এই দৃশ্য আৰু ছবিখনৰ আন কেইবাটাও উপস্থাপনাই তেওঁক গভীৰভাৱে বিচলিত কৰিছিল বুলি স্বৰাই কয়। ছবিখন চোৱাৰ পিছত তেওঁৰ যথেষ্ট খং উঠিছিল বুলিও তেওঁ প্ৰকাশ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
