ওস্তাদ জাকিৰ হুছেইনৰ অৱস্থা সংকটজনক, আমেৰিকাৰ চিকিৎসালয়ত ভৰ্তি
বিখ্যাত তবলাবাদক তথা ওস্তাদ আল্লাহ ৰাখাৰ জ্যেষ্ঠ পুত্ৰ ওস্তাদ জাকিৰ হুছেইনৰ অৱস্থা সংকটজনক। তথ্য অনুসৰি জাকিৰ হুছেইন বৰ্তমান আমেৰিকাৰ এখন চিকিৎসালয়ত ভৰ্তি হৈ আছে আৰু তাতেই চিকিৎসাধীন হৈ আছে। ওস্তাদ গৰাকীৰ স্বাস্থ্য গুৰুতৰ , তেখেতৰ আশু আৰোগ্যৰ বাবে প্ৰাৰ্থনা কৰিছে অনুৰাগী সকলে।
লাভ কৰা তথ্য অনুসৰি জাকিৰ হুছেইনক আমেৰিকাৰ ছান ফ্ৰান্সিস্কো হাস্পতালত ভৰ্তি কৰা হৈছে। একে সময়তে জাকিৰৰ আশু আৰোগ্যৰ বাবেও প্ৰাৰ্থনা জনাইছে জাকিৰৰ পৰিয়ালে।
জাকিৰ হুছেইনৰ স্বাস্থ্যজনিত এই খবৰ তেওঁৰ ভাতৃ আয়ুব আউলিয়াই সাংবাদিকক ফোনযোগে জনাইছিল। ইয়াৰ পিছত নিজৰ এক্স একাউণ্টত এটা পোষ্টো শ্বেয়াৰ কৰিছে, য’ত তেওঁ এই খবৰৰ তথ্য সদৰি কৰিছে।
পোষ্টটো শ্বেয়াৰ কৰি লিখিছে যে তবলাবাদক, পাৰ্কাচনিষ্ট, সুৰকাৰ, প্ৰাক্তন অভিনেতা তথা বিখ্যাত তবলাবাদক ওস্তাদ আল্লাহ ৰাখাৰ পুত্ৰ ওস্তাদ জাকিৰ হুছেইনৰ স্বাস্থ্য ভাল নহয়। আমেৰিকাৰ ছান ফ্ৰান্সিস্কোৰ এখন চিকিৎসালয়ত তেওঁ গুৰুতৰ ৰোগত চিকিৎসাধীন হৈ আছে।
উল্লেখযোগ্য যে মুম্বাইত জন্ম হোৱা জাকিৰ হুছেইনে মাথো ৩ বছৰ বয়সৰ পৰাই পিতৃৰ পৰা তবলা বাদন শিকিছিল। তেখেতৰ তবলাৰ ওপৰত থকা দক্ষতা তথা দখলৰ বাবে ভাৰত চৰকাৰে পদ্মশ্ৰী, পদ্মভূষণ আৰু পদ্ম বিভূষণেৰে সন্মানিত কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
