যুদ্ধৰ প্ৰভাৱ এতিয়া দেশৰ বিভিন্ন খণ্ডত পৰিছে৷ ইৰান-আমেৰিকাৰ সংঘাতৰ ফলত এইবাৰ দাম বাঢ়িছে এল পি জি চিলিণ্ডাৰৰ৷ ইয়াৰোপৰি এইবাৰ দাম বাঢ়িছে ইন্ধনৰো৷ পেট্ৰল আৰু ডিজেল উভয়ৰেই দাম বাঢ়িছে৷ সাধাৰণ পেট্ৰল, ডিজেলেই নহয়, প্ৰিমিয়াম ইন্ধনৰ লিটাৰে প্ৰতি দাম একধাক্কাত ১১ টকা বাঢ়িছে৷ জনা গৈছে ইণ্ডিয়ান অয়েলৰ প্ৰিমিয়াম পেট্ৰল এক্স পি ১০০ পেট্ৰল আৰু প্ৰিমিয়াম ডিজেল এক্সট্ৰা গ্ৰীণৰ দাম বঢ়োৱা হৈছে৷
পূৰ্বে এক্সপি ১০০ পেট্ৰলৰ দাম আছিল লিটাৰে প্ৰতি ১৪৯ টকা৷ বৰ্তমান সেই দাম বাঢ়ি লিটাৰে প্ৰতি ১৬০ টকা কৰা হৈছে৷ উল্লেখ্য যে ইণ্ডিয়ান অয়েলৰ এক্সপি ১০০ ভাৰতৰ প্ৰথম ১০০ অক্টেন প্ৰিমিয়াম পেট্ৰল, লাক্সাৰি বাহন আৰু ছুপাৰবাইকৰ বাবেই মূলত ব্যৱহৃত হয়৷ পেট্ৰলৰ ওপৰিও প্ৰিমিয়াম ডিজেলৰ দামো বাঢ়িছে৷ এক্সট্ৰা গ্রীণ প্ৰিমিয়াম ডিজেলত পূৰ্বে ৯১.৪৯ টকা দাম আছিল, এতিয়া সেয়া ৯২.৯৯ টকা হৈ গৈছে৷
হঠাৎ প্ৰিমিয়াম ইন্ধন অৰ্থাৎ প্ৰিমিয়াম পেট্ৰল-ডিজেলৰ দাম কিয় বৃদ্ধি কৰা হৈছে সেয়া বাখ্যা কৰা নাই ইণ্ডিয়ান অইলে৷ ধাৰণা কৰা হৈছে যে বিশ্বৰ বজাৰত ক্ৰুৰ তেলৰ দাম বঢ়োৱাৰ কাৰণেই প্ৰিমিয়াম ইন্ধনৰ দামো বঢ়োৱা হৈছে৷ ইয়াৰ পূৰ্বে প্ৰায় দুই সপ্তাহ পূৰ্বে হিন্দুস্তান পেট্ৰলিয়াম কৰ্পৰেছন লিমিটেড আৰু প্ৰিমিয়াম পেট্ৰলৰ দাম লিটাৰে প্ৰতি ২ টকাকৈ বঢ়োৱা হৈছিল৷ ৯৯.৮৭ টকাৰ পৰা দাম বাঢ়ি ১০১.৮৯ টকা হৈছিল৷
প্ৰিমিয়াম পেট্ৰল -ডিজেলৰ দাম বাঢ়িলেও কেন্দ্ৰীয় চৰকাৰে এতিয়াও সাধাৰণ পেট্ৰল ডিজেলৰ দাম বৃদ্ধি কৰিবলৈ দিয়া নাই৷ ইয়াৰ বাবে বিগত ২৭ মাৰ্চত কেন্দ্ৰীয় চৰকাৰে পেট্ৰল আৰু ডিজেলৰ ওপৰত অতিৰিক্ত আবকাৰী শুল্ক বা এক্সাইজ ডিউটিত লিটাৰে প্ৰতি ১০ টকা ৰেহাই ঘোষণা কৰিছে৷
ইফালে এলপিজি চিলিণ্ডাৰৰ দামো বাঢ়িছে৷ ইণ্ডিয়ান অয়েলৰ ১৯ কেজি এল পি জি চিলিণ্ডাৰৰ দাম প্ৰায় ১৯৫ টকা বাঢ়িছে৷ যুদ্ধ আৰম্ভ হোৱাৰ পাছৰে পৰা বৰ্তমান পৰ্যন্ত ৩০০ টকা বাঢ়িছে এল পি জি চিলিণ্ডাৰৰ দাম৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
