বলীউডৰ জনপ্ৰিয় অভিনেত্ৰী এইবাৰ কেঞ্চাৰৰ গ্ৰাসত, চতুৰ্থ পৰ্যায় পাইছেগৈ ৰোগ
মনোৰঞ্জন জগতৰ চেলিব্ৰিটিসকলে কৰ্কট ৰোগত আক্ৰান্ত হোৱাৰ বাতৰি অহৰহ প্ৰকাশ পাই আছে। শেহতীয়াকৈ টিভি অভিনেত্ৰী দীপিকা কক্কাৰৰ ষ্টেজ ২ লিভাৰ কেন্সাৰৰ অস্ত্ৰোপচাৰ সম্পন্ন হয়, এতিয়াও হাস্পতালতে আছে দীপিকা। এইবাৰ আন এগৰাকী অভিনেত্ৰী কেন্সাৰ ৰোগত আক্ৰান্ত হোৱাৰ খবৰ পোহৰলৈ আহিছে।
বলীউডৰ বহু ছবিত অভিনয় কৰা চৰিত্ৰ বিশেষ অভিনেত্ৰী তনিষ্ঠা চেটাৰ্জীৰ ষ্টেজ ৪ স্তন কেন্সাৰ ৰোগত আক্ৰান্ত হৈছে। এই ৰোগৰ বিষয়ে তনিষ্ঠাই মাথো ৪ মাহ পূৰ্বেহে জানিব পাৰিছিল যদিও এতিয়াহে এক সাক্ষাৎকাৰত এই ৰোগৰ কথা সদৰি কৰিছে।
সাক্ষাৎকাৰত তনিষ্ঠাই কয় যে এই ৰোগৰ বিষয়ে গম পোৱাৰ লগে লগে তাই বিধ্বস্ত হৈ পৰিছিল, নিজতকৈ অধিক চিন্তা হৈছিল ৯ বছৰীয়া কণমানি কন্যাক লৈ।
শেহতীয়াকৈ টাইমছ অৱ ইণ্ডিয়াক দিয়া এক সাক্ষাৎকাৰত তনিষ্ঠা চেটাৰ্জীয়ে তেওঁৰ কৰ্কট ৰোগৰ বিষয়ে কয়। লগেত ইয়াকো কয় যে, বিগত বৰ্ষত কেন্সাৰ ৰোগত পিতৃকো হেৰুৱাইছিল তনিষ্ঠাই।
সাক্ষাৎকাৰৰ সময়ত আৱেগিক হৈ পৰা তনিষ্ঠাই কয়- ‘মোৰ জীৱনত সকলো ছিন্নভিন্ন হৈ পৰিছে। কিন্তু তথাপিও মই ভাঙি যোৱা নাই কাৰণ মই মোৰ ৭০ বছৰীয়া মা আৰু ৯ বছৰীয়া কন্যাক চোৱাচিতা কৰিব লাগিব। অৱশ্যে শক্তিশালী হোৱাৰ পিছতো প্ৰথমবাৰৰ বাবে ভাগৰুৱা অনুভৱ হৈছে।’
তনিষ্ঠা চেটাৰ্জীয়ে লগতে কয় যে, কেঞ্চাৰৰ বিষয়ে জানিব পৰাৰ লগে লগে কন্যাক নিজৰ পৰা আঁতৰ কৰি ভনীয়েকৰ লগত থাকিবলৈ আমেৰিকালৈ পঠিয়াইছে।
তনিষ্ঠাৰ কেইখন মান উল্লেখ্য যোগ্য চবি হৈছে- গুলাব গেং, সুখা, অনইণ্ডিয়ান, ডাক্তৰ ৰখমাবাই ইত্যাদি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
