ৰাম মন্দিৰ নিৰ্মাণৰ পাছৰে পৰাই অযোধ্যাত বিনিয়োগ কৰিব বিচাৰিছে ডাঙৰ ডাঙৰ সংস্থাই৷ পিছপৰি থকা নাই টাটাও৷ বৃহৎ কেইবাটাও বিনিয়োগেৰে অযোধ্যালৈ আহিবলৈ সাঁজু হৈছে টাটা গোষ্ঠীৰ প্ৰধান ইনভেষ্টমেণ্ট হোল্ডিং কোম্পানী টাটা ছঞ্চ৷ সূত্ৰৰ খবৰ অনুসৰি সকলো মিলি অযোধ্যাত ৭৫০ কোটি টকা বিনিয়োগ কৰিবলৈ আগবাঢ়িছে টাটা ছঞ্চ৷ ইয়াৰ মাজতেই ৬৫০ কোটি টকা ব্যয়েৰে এটা বিশেষ জাদুঘৰো নিৰ্মাণ কৰিব টাটাই৷ মন্দিৰৰ জাদুঘৰ৷ ভাৰতৰ বিভিন্ন মন্দিৰৰ কথা এই জাদুঘৰত দেখুওৱা হ’ব৷ সম্প্ৰতি এই মন্দিৰত জাদুঘৰ তৈয়াৰত সেউজ সংকেত দিছে উত্তৰ প্ৰদেশ চৰকাৰেও৷
টাটাৰ এই পৰিকল্পনা সম্পৰ্কে জনাইছে উত্তৰপ্ৰদেশৰ পৰ্যটন মন্ত্ৰী জয়বীৰ সিঙেও৷ সম্প্ৰতি মুখ্যমন্ত্ৰী যোগী আদিত্যনাথৰ সভাপতিত্বত মন্ত্ৰীসভাৰ এই বৈঠকত টাটা ছঞ্চৰৰ জাদুঘৰ নিৰ্মাণৰ প্ৰস্তাৱত অনুমোদন দিয়া হয়৷ এই বৈঠকৰ পাছতেই জয়বীৰ সিঙে কয়, ‘টাটা ছঞ্চে কেন্দ্ৰীয় চৰকাৰৰ মাধ্যমেৰে এই প্ৰকল্পৰ প্ৰস্তাৱ আমাক দিছিল৷ সংস্থাৰ সামাজিক দায়বদ্ধতা তহবিলৰ অধীনত ৬৫০ কোটি টকা ব্যয় সাপেক্ষে এই জাদুঘৰ নিৰ্মাণৰ প্ৰস্তাৱ তেওঁলোকে ৰাখিছে৷ আমি এই প্ৰস্তাৱত অনুমোদন দিছো৷’
জয়বীৰ সিঙে লগতে কয় যে, এই জাদুঘৰতো আন্তৰ্জাতিক মানৰ জাদুঘৰ হ’ব৷ ইয়াৰ বাবে ৯০ বছৰৰ লীজত টাটাক প্ৰায় ২ একৰ ভূমি যোগান ধৰিছে আদিত্যনাথ চৰকাৰে৷ অযোধ্যাত এতিয়া মাটিৰ দাম বহু বাঢ়ি গৈছে৷ সেই হিচাপত মাটিখিনিৰ প্ৰকৃত মূল্য এতিয়া প্ৰায় ১ কোটি টকা৷ কিন্তু টাটাৰ পৰা এই ভূমিৰ বাবদ মাত্ৰ ১টকা হে লৈছে যোগীয়ে৷
অযোধ্যাৰ সদৰ মহকুমাৰ, মাঞ্জা জামতাৰা গাওঁত তৈয়াৰ হ’ব এই জাদুঘৰ৷ এই জাদুঘৰ তৈয়াৰৰ বাবে টাটাই ৬৫০ কোটি ব্যয় কৰাৰ ওপৰিও আশেপাশে থকা এলেকাসমূহৰ পৰিকাঠামো উন্নয়নৰ বাবে আৰু ১০০ কোটি খৰচ কৰিব টাটা ছঞ্চে৷ পৰবৰ্তী সময়ত টাটা ছঞ্চৰেই এই জাদুঘৰৰ চোৱাচিতাৰ দায়িত্বও পালন কৰিব৷
উল্লেখ্য যে ৰামমন্দিৰৰ উদ্বোধনী অনুষ্ঠানৰ পাছতেই মন্দিৰৰ জাদুঘৰ তৈয়াৰৰ কথা ঘোষণা কৰিছিল যোগী আদিত্যনাথে৷ ২০২৩ চনৰ ছেপ্টেম্বৰত প্ৰধানমন্ত্ৰী নৰেন্দ্ৰ মোদীৰ সন্মুখত বিষয়টোক লৈ পৰিকল্পনাৰ কথাও তুলি ধৰিছিল যোগীয়ে৷ শেহতীয়াভাৱে সেই জাদুঘৰক জীৱন্ত ৰূপ দিবলৈ আগবাঢ়িছে ৰতন টাটাৰ সংস্থা টাটা ছঞ্চৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
